ЧIумул бара

pop_33Апрельданул 16-нний МахIачкъалалий шагьрулул Тарихрал музейраву хьунни художник-фотограф Камил Чутуевлул «Ретроспектива» цIанилусса, 1960-ку шиннардия 1990-ку шиннардийн бияннин рирщусса суратирттал выставка. Ва ххуллухсса выставка хас дурну дия Камил Чутуевлун 75 шин шаврил юбилейран.

Имара Саидова
Выставкалул сакиншинначиталну хьунни МахIачкъала шагьрулул администрация, Шагьрулул культуралул управление ва Шагьрулул тарихрал музей.
Ва кьини К. Чутуевлул творчество ххал дан бувкIминнан тамашалий дирхьуну дия Да­гъусттаннал халкьуннал, миннал багьу-бизу ккаккан буллалисса 110-нния лирчусса тамашасса суратру. Шикку тамашалий дирхьусса чIяруми суратру дия, кказит-журналлай итадаркьусса дунугу, цалчин выставкалий дирхьусса. Камил Чутуевлул зун­ттал щархъавух уклай рирщусса суратру дия зунттал ляличIисса тIабиаьт, шяраваллу, щархъурду, миккусса халкьуннал буллалисса захIмат ккаккан буллалисса. «Ретроспектива» цIанилусса выставка ванал давурттава хъанай дур ца яла халкьуннан ххирамурну. Ми суратирттал буслай бур Дагъусттаннал тарихрая.
Камил Чутуев юбилейращал барча ан, ванал выставка ххал дан МахIачкъала шагьрулул Тарихрал музейравун бувкIун бия республикалул сайки щалва интеллигенция, студентътал, дустал ва гъан-маччами.
pop_16Выставкалул батIаву дачин дурну бия МахIачкъала шагьрулул тарихрал музейрал директор Зарема Дадаева. Ванил цила ихтилатраву кIицI лавгунни Камил Чутуевлул 50-нния лирчусса шиннардий, Дагъусттаннал циняв щархъавух, шяраваллавух занай, рирщусса суратирттайну дагъусттаннал тарих ябувшиву, авадан бувшиву. Мяйжаннугу Камиллуя гьунар бусса фото-художник хьун савав хьухьунссар гьунар бусса сурат рищу ванал ппу Амин Чутуевгу, — увкунни Зарема Дадаевал.
Махъру лавхъунни ва му барча унни Шагьрулул администрациялул бакIчинал хъиривчу Татьяна Гамалейл.
ДР-лул Культуралул министерствалул чулуха барча уллалисса ихтилат бунни культуралул министрнал хъиривчу Мурад ХIажиевлул.
pop_15— Камил Чутуев махъ бакъа гьунар бусса инсан ур. Зува пикри бара, укун ляличIисса суратру рищуншиврул, ванал цуксса захIмат бувну бурив. Уттизаманнул фотографтуран хъинну бигьар электрон журалий 100 сурат дурну, минува ца яла ххуймур язи дугьан. Камиллул суратру рищайсса чIумал пленкарду, чагъарду ххирану бивкIссар, канил дайсса даву гьарзану диркIссар. Мунияту, ванан багьлай бивкIссар суратирттал чагъардугу, пленкардугу зия къабаншиврул, ца сурат рищун хъунмасса захIмат бан, — увкунни Мурад ХIажиевлул.
Изобразительный искусствардал музейрал директор СалихIат ХIамзатова:
– Камил Чутуев хъанай ур жулла республикалул культура авадан дан, ядуван ца агьамсса бутIа бивхьусса инсанну. Ванал творчествалул республикалул тарихрал оьрму авадан бувшиву ва выставкалулгу мяйжан буллай бур.
«Дагестанская правда» кказитрал редакторнал хъиривчу, Олег Санаев:
— Яла-яла Камиллул машгьуршиву дур гьарцаннан ххал шайсса халкьуннал симанну, зунттурду, уртту-тIутIал караматшиву цала суратирттайну аьч дан бюхъавриву. ХIасил, цимурцаннул чIарах увккун къалавгун, ванал миннух дур цанна хасъсса ляличIисса ургаву.
Дагъусттаннал художник, Камил Чутуевлул искусствалул творчество хъинну кIулсса, цимилгу ванал выставкарду хIадур дурсса МахIаммад Къажлаев:
— ХIакьину Камиллуща цалла искусствалийхчIин бювхъунни жува цачIун бан. Камиллул даврин бивщусса яла хъунмур кьиматгу агьалинан ванал творчество ххирасса душавур. Ва ур буниялагусса художник. Укун гьунар бусса халкь жула дянив буссаксса, аваданссар жулва тарих ва культурагу.
Ккавкказуллал литературалул ва художествалул «Горцы» кказитрал хъунама редактор, художник, Камил Чутуевлул хъинсса дус Марат ХIажиев:
— На барчаллагьрай ура хъунмасса хIаллай ялугьлай бивкIсса, Камиллул юбилейран хасну дан тIий бивкIсса выставка тIитIаврихлу. На мудан махIаттал хъанан икIара Камиллул яруннан укунсса суратирттал лахIзарду цукун хIисав шайривав тIий. Шагьрулувугу уруглай, хIисав ласлай икIара ххал шайрив ккаклай Камиллун куннасса чаннасса симанну. Ванал суратирттал ляличIишивугу дур бюхттул зунттал аьчухшиву, къума ратIал, щаращал щинал марцIшиву,уртту-тIутIал караматшиву чIалачIи дан бюхъавриву. Камиллун хъунмасса талихI хьуну бур, чIумул бара хьуну, цала суратирттайну Дагъус­ттаннал тарих ккаккан бан бю­хъавриву. Цикссагу аьрххирду хьуссар ванал ца сурат рищуншиврул, цимилгу зунттал щархъавун занан багьссар. Цукунсса асардащал зана шайхьунссия Камил цалва аьрххи щаллу хьувкун. Мунияту гьарица дуллалисса выставкалия Камиллун цин лархьхьусса ххаришиву ва гьавас бикIай.
Мукунма ва кьини Камил Чутуев юбилейращал барча уллалисса, ванал искусствалун лавайсса кьимат бишлашисса ихтилатру буллалими гьарзая.
Ахирданий Камил Чутуевлул барчаллагь увкунни ва выставкалийн бувкIминнахь ва выставка дуван кумаг бувминнахь.