Вана утти барз лавгунни ххаллилсса зунтталчу, лаккучу, ГьунчIукьатIрал шяравасса Мяммал арс Мяммахъал Загьиди жуятува личIи хьуну. Аьпа баннав цал, ияхха ца ляличIисса инсан, цила багьайкунсса ас-намусрал, багьу-бизулул, яхI-къириятрал адамина.
Ттун танащал кIул хьун нясив хьуна нава, институтгу къуртал бувну, аспирантуралувун уххан лавгсса чIумал. Дия хъуннасса хIукумат, аьрщи, аьжаивсса чIун, шяраваллил хозяйствалух цил багьайкунсса къулагъас дуллалисса. Хъиннува ларайсса бургаву дия элмулул чулухуннай, лахъсса кьяйдалул ххяххия ва продукция гьарза давриха зузи­сса. Ци дикIан бюхъайссар мукунсса масъалалуха зузисса аьлимчунал дуллалимуничIан дучIайсса. Му чIумал Загьиди Мяммаевич ия институтрал мелиоративный давурттал механизациялул отделданувусса культуртехнический давуртту дуллалисса ца агьамсса лабораториялул заведующийну. Загьиди Мяммаевичлун багьайва цалла давурттаву личIи-личIисса даражалул инсантуращал хьунаакьлан, партиялул ЦК-лул члентурая, министртурая, главкирттал начальниктурая, заводирттал директортурая айивхьуну, укунмасса механизатортурайн ияннин. Му буслай икIайва цуксса захIмат хьуссияв цанма Ленинградуллал областьрайсса Ижорский оборонный заводраву заказгу дирхьуну опытныйсса образец итадакьиннин дискардайсса ххялаххул (БДТ-3,0) культуртехнический давурттив дуллансса. Яла му ххуйну серийныйсса производствалуву итадакьлан бивкIссар. Багьайва мунан чIявуну техникалул выставкардай, элмулул симпозиумрай ва конференциярдай докладирттащал чил хIукуматирттай ва СССР- даний гьурттушинна дуллан. На хъинну пахрулий икIайссияв мунал хъинну за кIулну ва компетентныйну механизациялул секция бавтIсса чIумалсса гьурттушиндарай. ЧIун ларгун муная хьуна техникалул элмурдал доктор, профессор, Инженерный академиялул академик ва ВНИИГиМ-рал элмийсса советрал член. Мунал ларсун дур 28 изобретениялул патент, чивчуну бур 10-нния ливчусса луттирду, хIадур бувну бур элмулул кандидатътал ва доктортал, му ия международный конгрессрал дипломат, СССР-данул минводхозрал отличник, мукуна производствалуву дуллалисса хьхьичIуннайшиврухлу лайкь хьуну ур хIурмат бусса цIанин – «Заслуженный мелиоратор РСФСР», лайкь хьуну ур СССР-данул Министртурал Советрал премиялун ва цаймигу бахшиширттан. Ссаяргу лахъмур лахъазаннуну Загьиди Мяммаевичлул хъанай дур халкьуннал дянив ларайну лирчIсса цIа, тIайлану ва узданну бувтсса оьрму ва инсантурал чIарав авцIуну бувсса кумаг, дурсса хIаллихшинна. Жун, танащал зий, занай бивкIминнан, абадлий дакIний личIантIиссар танал чаннасса лажин, бювхъусса чурх, аькьлулул бувччусса гъалгъа, насихIат ва дуллай ивкIсса дугърисса давурттив. Хъуншагьрулий хIатталу нясив хьусса цан Аллагьнал алжан булуннав.
Багьауттин МахIаммадов