Прессалул байран Буйнакскалий

bft_26Махъсса ппурттуву республикалий хъуннасса къулагъас дуллай бур миллалирттал мазурдих, миллатирттал прессалул даву ларай даврих. ДР-лул печатьрал ва информациялул министр Азнаур Аджиев къуллугърай ивтун махъ, мунал хIукму бунни рес­публикалул прессалул фестивальлу дуллан.
«Родная газета» тIисса цIанилу цалчинсса прессалул байран дурссия МахIачкъалалив. Уттинин укунсса фестивальлу дурссар Хасаврай ва Дарбантлив.
Апрель зурул 5-нний «Родная газета» тIисса Республикалул прессалул байран хьунни Буйнакскалийгу. Ва фестивальданий гьуртту хьунни ДР-лул печатьрал ва информациялул министр Азнаур Аджиев, мунал хъиривчу Миясат Муслимова, ДР-лул Журналистурал союзрал председатель, «ХIакъикъат» кказитрал хъунама редактор Аьли Камалов, Буйнакск шагьрулул администрациялул бакIчинал хъиривчу Асият Аьлиева ва республикалул миллатирттал мазурдийсса ва оьрус мазрайсса кказит-журналлал редактортал.
Фестивальданул сакиншинначи хьунни ДР-лул Печатьрал ва информациялул министерство.

Имара Саидова
Фестивальданул даву дайдихьлай, ихтилат бувна ДР-лул печатьрал ва информациялул министрнал хъиривчу Миясат Муслимовал.
bft_25— Буйнакс шагьру — Дагъусттан Республикалул тарихраву агьамсса кIану бугьлагьисса, гьарица чулуха хьхьичIун ливчусса шагьру бивкIссар. Мунияту бухьунссар хIакьину залданувун бувкIун ляличIинува чIявусса культуралул зузалт, миллатирттал мазурдил учительтал ва творчествалул интеллигенция. ХIакьину шиккун бувкIсса прессалул зузалтрал агьаммур мурадгу цалва буккулт­ращал хьунабакьаву, миллатир­ттал мазурдий чичин бюхъайсса журналистал аьлтту баву, миннащал кIул шаву бур. Ва журалул хьунабакьавуртту жул уттинингу хьуссия Хасаврай ва Дарбантлив. Пикрилий буру прессалул фестивальлу дуллалаврийн бувну, жула буккултращалсса арарду цIакь дуллансса мюнпат бусса даву хьунссар тIий. Жулва буккултрал масъаларттах къулагъас даву мурадрай, гихуннай вай фестивальлу, аьдатравун дуртун, ччя-ччяни дуллан, — увкунни Миясат Муслимовал.
ДР-лул печатьрал ва информациялул министр А. Аджиевлул цалва ихтилатраву кIицI лавгунни ДР-лул Президент Рамазан АьбдуллатIиповлул хъуннасса тIалавшинна душиву республикардал СМИ-рдал даврил даража лавай бавриву. Мукунма кIицI лавгунни республикалий хъанай душиву хъунисса, агьамсса дахханашивуртту ва миннуцIун бавхIусса масъалартту щаллу бавриву, рес­публикалий хъанахъимур аьлтту бавриву хъуннасса хъар душиву республикардал СМИ-рдахьгу. Мукунма кIицI лавгуна Буйнакск шагьрулийсса буккултращал хъунмасса хIаллай хьунакъабавкьушиву, миннал масъаларттах вичIикъадирхьушиву ва прессалул фестиваль сававну гихунмай ччя-ччяни хьунабакьлансса ниятрай бушиву.
Фестивальданий хьусса ихтилатру бия, мукунма, миллатирттал мазурдийсса ва оьрус мазрайсса кказит-журналлал подписка яларай дагьлай, миллатирттал мазру хъамабитлай, миннух къулагъас чанну душивриясса.
«Илчи» кказитрал хъунмур редактор Качар ХIусайнаева:
— Буйнакск шагьру ттун оьрчI­нийва ххира хьусса, дакIнил лавсъсса шагьру бия. НахIакьдан бакъахьунссия Темирхан -Шура тIий, му Дагъусттаннал хъуншагьруну бивкIсса. Ва шагьрулийри бивкIсса Дагъусттаннал яла ххаллилмур, яла хьхьичIунмур, яла узданмур интеллигенция. Ва залдануву щябивкIсса чIявуминнан бюхъай «Илчи» кказитрая хавар къабикIан. Амма жул кказит­рай ччя-ччяни чичайссар Буйнакск шагьрулул лавгмуния ва хIакьинусса оьрмулия. ЧIярусса шиннардий Буйнакскаллал педучилищалуву бусравну зий бур ттул буттарссу Фаталиева ПатIимат. Ва мудангу тIун бикIай: «Ци неъмат цамур шагьрулий бухьурчангу, ттун ттулла дакIнин лавсъсса, ххира хьусса, ттула оьрмулуцIун бавхIусса Буйнакск шагьру ссахчIав баххана къабавияв», — тIий.
Ттун хъунмасса буруккин бикIай уттиния тихунмай, ни­ттил маз кIулсса, му ххирасса ник ларгун мукьах, ци бучIавивав жула мазрачIан, хьувивав буру­ччин жула ниттил маз, жущава кунма, ялун нанисса никираща тIий. Жущарагума чан-кьансса зат дакъахьувкун, буруккинттарай бикIару, жула багьа бищун къашаймур маз – ххазина, бакъа хъанахъаврил ялув буруккин­ттарайсса чансса бур. ХIакьину Буйнакскалий, 1000-хъайсса лак ялапар хъанахъисса кIанай, бувагу 10 «Илчи» кказит бур чивчуну. ПаччахIлугърал чулуха гьаксса, мазру бухлаган къабитан, шаймур буллай, чIарав бацIлай бур, жуннив хIакьину миннуяргу зулмур чIарав бацIаву, зучIа жула кказитрал тIалавшинна душиву ччива. Умудрай буру лакрал бу­ккулт зучIагу гьарза хьунссар тIий, — увкунни К. ХIусайнаевал.
Хьунни шикку цикссагу хъин-хъинсса агьамсса ихтилатру. Ши­ккун бувкIсса циняв прессарду бия махъва-махъ итабавкьусса кказит-журналлу буккултрайх бачIлай. Мукунма ва кьини ши­ккун бувкIминнаща бюхълай бия ялун нанисса дачIишинал подписка дан.
Цала дуклаки оьрчIан «Илчи» кказит тIалав бан жучIангу бувкIунни Буйнакскаллал 9-мур классрал лакку мазрал дарсирал учительница Зулайха МахIаммадова ва 4-мур школалул лакку мазрал учительница Аьйшат Оьмарова. Вайннал бувсунни, школалий ниттил мазурдин кка­ккан дурсса дарсру чансса душиврийн бувну ва мукунма чIявуми кулпатру интернациональныйсса буну, ичIува лакку мазрай гъалгъа къатIий бушаврийн бувну, оьрчIан лакку маз лахьхьин буван захIматну бушиву. Вай кIивагу школалул дуклаки оьрчIан бахшишран жугу пишкаш барду Илиясова Марияннул итабавкьу­сса «Мюрщи щаращал щурщу» тIисса ххаллилсса жужру.