Апрель зурул 14-нний «Молодежь Дагестана» кказитрал редакциялий хьунни «Проза – детям» тIисса литературалул конкурсраву гьуртту хьуну ххув хьусса оьрчIан бахшишру дуллалисса хьунабакьаву.
Имара Саидова
Щалвагу Аьрасатнавусса дуклаки оьрчIал гьунарду ялун личин баву мурадрай, прозалул конкурсру буллан дакIнийн багьну бур чичу, режиссер Вера Львован. Уттинин Вера Львовал ва журалул конкурсру бувну бур Бакуй, Чебоксардай ва цаймигу шагьрурдай. Бакуйсса оьрчIал дянив прозалул конкурс бувну махъ Вера Львовахь увкуну бур «Ина бура оьрчIан леххансса хъару дуллалисса хIурулъэн», — куну. Ми махъру хъиннува асар хьуну бур Вера Львован хаснува цищава мушакъатсса оьрчIал гьунарду ялун личин бан бюхъавриву. Ванил дуллалисса даву дур багьа бакъасса. «Барчаллагь хъунмасса, Вера, утти ттун хъунмасса умуд бур ттуява шаэр, чичу хьунссар тIисса», -тIий чичлай бур Вера ЛьвовачIан мушакъатсса оьрчIру.
«Проза – детям» тIисса проектрал лагрулуву гьуртту хьунни МахIачкъала шагьрулул Расул ХIамзатовлул цIанийсса 50-мур, 6-мур школардал, 13-мур гимназиялул, «Сафинат» школалул дуклаки оьрчIру ва учительтал. «Проза – дятям» тIисса конкурсрал лагрулуву хьусса «Красота вокруг нас» тIисса проектрал давриву аьлтту бунни шагьрулул школардайсса гьунар бусса тамансса дуклаки оьрчIру. Шикку гьуртту хьусса оьрчIал бувсунни цивппа дуклакисса школардая, цалла дуллалисса прозалул ва поэзиялул даврия. Вайннал чирчусса давурттив ххал дан бюхълай бия залданувусса стендирттай. Вайннух бурувгун мяйжан хъанай бия Вера Львоваща бювхъушиву чантI учин бан оьрчIавусса мюрщи гьунарду. Ва проектравух гьуртту хьусса оьрчIру занай бур экологиялул ва цаймигу темардан хас бувсса экскурсиярдайн, яла чичлай бур микку хIисав хьумуния. Му бакъассагу, конкурсрал лагрулуву дур художествалул гьунарду ялун личин буллалисса кружокру, хIасил ва проектраву гьуртту хъанахъисса оьрчIру оьнма бакъар.
Конкурсравух гьуртту хьуну ххув хьуминнавух бия лакку душругу: 13-мур гимназиялул дуклаки душ Аьлишаева Камилла ва 50-мур школалул дуклаки душ КьурбанмахIаммадова Диана.
«Молодежь Дагестана» кказитрал редакциялул чулуха ва ДР-лул Журналистурал союзрал чулуха Вера Львован ва шикку гьуртту гьусса учительтуран дуллунни ХIурматрал грамотарду.
