Рамазан АьбдуллатIипов гьуртту хьунни Щалвагу Дагъусттаннал субботникрай
Апрельданул 19-нний Дагъусттаннал циняв шагьрурдай ва районнай дунни щаллагу республикалул субботник, микку гьуртту хьунни азарахъул инсантал. Лаващиял райондалий Ххажалмащиял шяраву дуллалисса субботникрай гьуртту хьунни Дагъусттаннал БакIчи Рамазан АьбдуллатIиповгу.
ХI. Аьдилов
Дагъусттаннал бакIчинал Ххажалмащиял Хъун дяъвилий ливтIуминнал аьпалунсса аллеялий бувгьунни цаппара мурхьру.
Рамазан АьбдуллатIиповлул ихтилат бунни райондалул хIакинтуращал. Духтуртурал тавакъю бунни шяраву азархана бан. Дагъусттаннал бакIчинал бувсунни ялунчIил шяраву 25-30 инсаннансса азархана бансса арцу лякъин.
Райондалул бакIчи МахIаммадхIажи МахIаммадовлул бувсунни кIа шяраву бакIуйн буккавай бушиву оьрчIал садик ва спортзал.
Гара кьини Республикалул БакIчи лавгунни Шамиллал райондалийсса Хебедуллал шяравун. Тикку Рамазан АьбдуллатIипов гьуртту хьунни шяраваллил жяматрал дуллалисса субботникрай. Тикку дузал бунни Хебедуллал парк. Яла бусравсса хъамаличу ивунни райондалул поликлиникалийн, ккаккан дунни тиккусса диялдакъашивуртту, ихтилат бунни духтуртуращал. Гара кьини Дагъусттаннал БакIчи лавгунни Гергебиллал райондалийн. Гергебиллал шяраву Рамазан АьбдуллатIипов гьуртту хьунни ахъвазандалул мурхьру бугьаврил давурттавух. Республикалул БакIчинал школалун пишкаш бунни Расул ХIамзатовлул луттирду ва цалва чивчусса «Мой дагестанский народ» тIисса лу. Бувсунни га лу чичаврил мурадрая.
