Миллатрал яла багьа бакъамур ххазналун ккалли дай аьдат­ру. Гьамин, аьдатирттавур бусса лавгмунил щалва ирс. Лавгмур хъамабивтнан бучIантIимур бакъассар, учай жула. Хъун хъанахъисса ник бучIантIимур бакъасса къахьуншиврул, лакрал аьдатирттая якъабуцаву мурадрай, цин лархьхьусса даву дуллай бур Лакрал райондалул ОьрчIал творчествалул къатлул зузалтгу.

Ттигъанну ОьрчIал творчествалул къатлуву хьунни аьдатравун багьсса конкурс «Юный краевед». Му хIадур бувну бия методист ПатIимат Парамазовал. Муний гьуртту хьунни ОьрчIал творчествалул къатлул, Гъумучиял лицейрал ва Гъумучиял, Ххюлуссуннал, Хьурттал, Хъурхърал, Кьубиял, КIундиннал, ЧIарттал, Кумиял школарттал дуклаки оьрчIру. Дук­лаки оьрчIал гьантрал хьхьичIва хIадур бувну, ОьрчIал творчествалул къатлувун биян бувну бия цалла-цалла шяраваллил аьдатирттая бусласисса докладру. Яла конкурсрай ми докладру буручлай бия. Гьарца шяраваллил цалла-цалла хасшивуртту духьурчагу, оьрчIру буслай бия щалва лакрал миллатран аьмсса Интнил хьхьунил, Хъарас щаврил, душ була учаврил, хъатIул, оьрчIан цIа дизаврил аьдатирттая. Докладирттащал оьрчIал ишла дурну дия шяраваллил хъуначу цумур-дунугу аьдатрая бусласисса видеоматериаллу, папкардаву дирхьуну дия ми аьдатирттацIун дархIусса шадлу­гъирттаясса суратру.
Конкурсрал бусравсса хъамаличу бия райондалул администрациялул бакIчинал хъиривчу Соня Макьаева. Жюрилуву бия ОьрчIал творчествалул къатлул методист Залихха Акаева, Лакрал телевидениялул корреспондент Дамадан Щамххалов, «Ххяххабаргъ» кказитрал корреспондент Валерий Амиров.
Конкурсрал хIасиллайн бувну, 1-мур кIану бувгьунни Ххюлу­ссуннал школалул 10-мур классрал дуклаки душ Яганова Аьйшал (каялувчи ЩайхахIмадова Рукьижат), Хьурттал школалул 9-мур классрал дуклаки душ Аьбдуллаева Асватлул ва Ванатиева Миясатлул (каялувчи Бижитуев Аьбдул). Доклад хIадур баву бакъассагу, Яганова Аьйшал архIал дуклакисса душругу, ни­ттихъулгу, школалул учительницахъулгу, ФАП-рал ва культуралул зузалтгу хIала-гьурттуну ккаккан дуруна жалин щинав лагайсса аьдат. Дурну дия хъатIул дукрарду: ккурч, аьтIиччатI ва цаймигу.
ХъатIул аьдатран хас бувсса докладраву Аьбдуллаева Асватлул ва Ванатиева Миясатлул бувсуна, цанма бугьарасса хъанния бавсса, Хьурттал шяраву хьхьичIва хъатIай хьусса иширттаягу.
КIилчинмур кIану бувгьунни ХIасанова Зулайхатлул – ОьрчIал творчествалул къатта (каялувчи Карнаева Жамила) ва Хъурхърал школалул 10-мур классрал дуклаки душ Хизиева Камилал (каялувчи Куччаева Зайнап). Зулайхатлул бувсуна гъарал чIа учаврил, хъарас щаврил ва хъатIул аьдатирттая. Камилал кутIа-кутIану бувсуна лакрал цинярда аьдатирттая ва сянатирттая.
Шамилчинмур кIану бувгьунни Кьубиял школалул 10-мур классрал дуклаки душ Буттаева ХIалиматлул (каялувчи Шабанова Улияна) ва КIундиннал школалул 8-мур класс­рал дуклаки оьрчI Ибрагьимов Кьурбаннул (каялувчи Шихлаев Аьбдул).