Мартрал 24-нний Каспийскаллал «Анжи-Ареналий» Ма­хIачкъалаллал футболданул команда «Анжи» ччаллий дурккунни Москавуллал ЦСКА-ращал. Цуксса хIайпнугу, жулла команда дух хьунни 0:3 счетрайну. Ва бивкIссар Аьрасатнал чемпионатрал 22-мур турданул тIуркIу.

Дагъусттаннал командалул къапулувун цалчинмур гол бавкьуна 26-мур минутIраву ЦСКА-рал угловойрая бивщуну махъ. Гол бавкьуна ЦСКА-рал гьужумчи Сейду Думбиял, яла 45-мур минутIравугу ганалва бавкьуна жулла командалул къапулувун кIилчинмур голгу.
75-мур минутIраву МахIач­къалаллал командалул къапулувун шамилчинмур гол бавкьуна, жула голкипернащал баранбал увккун, муттаэтурал футболчи Муса АхIмадлул. Ва тIуркIулия махъ «Анжи» уттигу личIлай дур чемпионатрал турнирдал таблицалий махъва-махъмур ххуттай, ванил активраву бур бувагу 12 очко.
Жулла командалул хъиривмур тIуркIу хьунтIиссар мартрал 29-нний Екатеринбурграй тайннал «Урал» командалущал.

«Анжи» — ЦСКА-0:3
Голлу бавкьуми: Думбия, Муса
«Анжи»: Кержаков, Агъаларов, ХIажибеков, Григалава, Ещенко, Аьлиев (Смолов), АхIмадов, Билялеттинов, Максимов, Мкртчян (Быстров), Бухаров (Сердеров).

ЦСКА: Акинфеев, Фернандес, Березуцкий, Игнашевич, Щенников, Эльм, Дзагоев, Тошич (Вернблум), Миланов (Цубер), Муса, Думбия