ЦIанихсса балайчинан савлугъран

je_3Жулва билаятрал Ухссавнил хъуншагьрулий – Санкт-Петербурграй Елена Образцовал Культуралул центрдануву тIиртIуну дур Дагъусттаннал халкьуннал художник Арсен Къардашовлул «Любовь небесная, любовь земная…» цIанилусса выставка. Ва выставка художникнал хас дурну дур СССР-данул халкьуннал артистка, Социалист захIматрал Виричу, машгьурсса балайчи ва жяматийсса ишккакку Елена Образцован.

Выставкалий дусса дур личIи-личIийсса давур­ттив, графикалулми дакъассагу, сунттул ххаллай чирчумигу. Цинярдагу дусса дур 20-ннийн дирсса давурттив.
Выставка тIитIлатIисса ба­тIаврий махъ лавхъун бур ва центрданул вакил Наталья Игнатенкол. Ванил бувсун бур дахьва оьвтIий бивкIшиву Елена Васильевна цуппа, ва выставкалущал Арсен Къардашов барча уллай, ва, чIун дакъашиву сававну, цищава бучIан къашаврия хIайп тIий бушиву. Гихунмай ванил бавтIминнахь бувсун бур Арсен Къардашовлул душнил Жаннал, куявнал – гьунар бусса художник Туман Джумабаевлул ва Елена Образцовал дянивсса дусшиврийсса арардая, миннал уттинин вай къатраву кIира выс­тавка дуршиврия. «Жу ххариру жулла организациялувун утти Дагъусттаннал халкьуннал художникгу уххаврия», — увкуну бур Игнатенкол.
Арсен Къардашовлул увкуну бур:
— На ххарира хIакьину, зузи кьини душиврух къабурувгун, ттущала ца курсирай дуклай бивкIми, дустал, уртакьтал, ватанлувтал, гъан-маччами бучIаврия. Хъунмасса барчаллагь зун ва, хъамал ххирасса, ва Центрданул залуннан. ЦIанасса выставка хас дурссар эшкьи-ччаврил темалун, цанчирча чIал къархьуну 8-мур мартрал байран дуну тIий. Ва выставка щаллусса зуруй дикIантIиссар. Вай давурттивгу ва хьхьичIавасса залдануцIун даркьуну дикIансса куццуй язи дургьуссар. Ттуща му даву дуван цукун бювхъу­ссарив, зун чIалай бухьунссар, зу бищунссар мунин кьиматгу, — куну.
Арсен МахIаммадхIажиевич 40-хъул шиннардий кIулсса, мунал кунма В. И. Мухинал цIанийсса Ленинградуллал лаваймур художественно-про­мышленный училище къуртал бувсса, ДР-лул лайкь хьусса художник Рассо МахIаметовлул Арсен ккалли увну ур ляли­чIийсса дагъусттанлувнан, хъинну захIмат ххирасса, дакIнил хъинсса, хъамал ххира­сса. Художник хIисаврай ванал давурттая ихтилат буллайгу, Рассо Константиновичлул кIицI лавгун бур ва гьарцагу чулуха итххявхсса ушиву, ванал дахха-дахханасса давурттив душиву, ларгсса ссуттил хьушиву ванал ххаллилсса юбилейрал выставка. Ванал ихтилатравасса цаппара махъру таржума къабувна кьабитан, «Это образцовая выставка шелков Кардашова в залах у Образцовой», — куну, цала дус барча увну ур Рассо МахIаметовлул.
Санкт-Петербург шагьрулий ялапар хъанахъисса дагъусттанлувтурал, ДР-лул каялувшиннарал чулуха художник барча уллалисса махъ лавхъун бур Санкт-Петербурграйсса ДР-лул вакил ХIасан ХIасановлул.
— Жу пахрулий буссару жула ватанлувная, мунал цала тIисса куццуй, «къюкI – Дагъусттаннай, дакI – Санкт-Петербурграй дусса» художникная. Хъинну ххарину буру ванал каруннил дуллалисса эмаратсса давурттая. Му бакъассагу, ва хьхьичIунну зий ур жяматийсса даврихагу. Вана 15-нния лирчусса шиннур Санкт-Петербурграй жу цачIу тIиртIуну дагъусттанлувтурал-художниктурал сакиншинна «Открытая ладонь» цIанилусса, цилгу Дагъусттаннаясса художниктурал выставкарду дуллалисса шагьрулул личIи-личIийсса экспозициялул майданнай. ЧIа тIий ура вин, Арсен МахIаммадхIажиевич, цIакьсса цIуллушиву, барчаллагьрайсса учениктал ва шайссаксса хъунмасса хIаллай вилла давурттайну жу ххари буллалаву, — увкуну бур ванал.
Гихунмай махъру лавхъун бур художник Андрей Кудряшовлул, А. И. Герценнул цIанийсса Санкт-Петербургуллал РГПУ-рал преподаватель Светлана Андрюнинал, искусствоведениялул кандидат, ПаччахIлугърал Эрмитажрал зузала Ольга Чекмаревал ва чIявусса цайминналгу.
Ва кьинисса батIаву хьуну дур личIи-личIийсса миллатирттал инсантурал дянив­сса дусшиву цIакь дувансса, дагъусттанлувтурал сипат, цIа Санкт-Петербурграй хъин чулий ккаккан дувансса, зумух ласлансса ца ххишаласса шану.
ХIадур бувссар
Бадрижамал Аьлиевал