Мусал арс Мирза Мусаев уголовное праволул ва криминалогиялул областьравусса аьлимчури, юридический элмурдал кандидатри, доцентри, «АьФ-лул аьмсса ва ларайсса профессионал образованиялул бусравсса зузалар», Хасавюртливсса ДГУ-рал филиалданул директорнал хъиривчури, налогирттал инспекциялул зузалтрал аттестация дайсса квалификациялул комиссиялул членни.

Юридический дисциплинардал кафедралул доцент хIисаврай мунал 48 элмийсса даву итадаркьуссар цува зузисса темалун хасъсса. Мукьва учебный пособие итабавкьуссар. Лавайсса даражалий лекциярдугу ккалай уссар. ЗахIматрал аьмсса стаж 36 шинни. Чялишну гьуртту шайссар дунияллул халкьуннал, аьрасатнал ва региондалул элмийсса конференциярдай, элмийсса журналлайн агьамсса масъалартту гьаз буллалисса текстру чичлай уссар. Оьрмулуву яла агьаммур, цаламур ххуллу лякъавур. Инсан бусса оьрмулий луглангу икIай му ххуллух. Мирза Мусаевичлун тIайлабацIу хьуну бур: мунан лявкъуну бур цаламур ххуллу, цацIунна даркьусса, цанна ххирасса даву. Увну ур Мирза Мусаевич ЦIуссалакрал райондалийсса Чапаевкаллал шяраву. Мунал ппу бухгалтерну зий ивкIун ур, нинумур — арулва оьрчI ччаннай бацIан баврилсса, ичIаллил кушурдалсса буллай. Мирза Мусаевич оьрчIаву кIилчинсса уну, мюрщиминнаха аякьа даврил хъар муналми хъачIунттайнгу дагьну дур. ИчIура дулланмур чIярусса духьурчагу, оьрчIаву кIулшивурттахсса гъирагу хъунмасса бивкIун бур. Дуккавриву итххявхсса мунал цал къуртал бувну бур дикIул-накIлил промышленностьрал Москавуллал технологический институт. Му институт ххуйну къуртал бувсса жагьил зун гьан увну ур Краснодарский крайрайсса дикIул комбинатрайн. Амма мунан мудангу юриспруденция лахьлан­сса гъира бивкIун бур, мунияту кIилчинмур ларайсса кIулшивугу ларсун дур. АцIния арулла шинни Мирза Мусаевичлул Хасавюртуллал ДГУ-рал филиалданий зий. Мунал хъунмасса захIмат бивхьу­ссар педагогтурал коллективрал даву лавайсса даражалийн гьаз хьуншиврул. Филиалданул сий гьаз давриву муналмур бутIагу хъунма­ссар. ХIакьину филиалданий 1795 студент ларайсса кIулшивуртту ласлай буссар. Миннавух бур Чачаннал республикалияссагу. Мирза Мусаевичлул хьхьи­чIунсса гьурттушинна дай шагьрулул мероприятиярдай, му шагьрулул муниципал образованиялул Жяматийсса советрал членни, «Лакку мазрал кьинилул» байрандалул оргкомитетрал председательгур. Педагог, юрист, новатор хIисаврай акъассагу, шагьрулул агьалинан Мирза Мусаевич кIулли хъунасса патриот, бучIантIимуний дакIцIуцIаву дусса аьлимчу хIисаврайгу. Му ххаллилсса лас ва ппугу ур. Кулпат Гульфизагу педагогри, №3-мур школалий завучну зий бур. Ххуйсса лас ва щар бур, миннал цалами оьрчIругу ххуйну тарбия бувну бур. Душваврал Ларитал, Лаурал ва арснал Мусалгу буттал пиша язи бувгьуну, юристътал хьуну бур. «ОьрчIру ва миннал наслу ичIува ккуркки лагаврия хъуннасса ххаришиву дикIай. Ттунна ччисса давриха зий ура, кулпат, оьрчIру, миннал наслу ужагърайн батIай, яла ттун ци аьркинни?» — учай Мирза Мусаевичлул. Му бакъассагу, Мирза Мусаевич мудан цIу буну яннагу ларххун, пар-пар тIий икIай. Мудангу костюмраву, мудангу галстук бавхIуну. Ябивнал яру ххари буванну. Дур цамургу бахшиш Мирза Мусаевичлул оьрмулуву – му ниттил увну ур февральданул 23-нний. Гьамин, чиваркIуннал кьини. Мукунсса кьини увсса чувная Мирза Мусаевич кунасса акъа цама чув шайссияв?! Гьашину мунал юбилейри. Оьрмулул 60 шинни. Жугу ххарину барча уллай буру Хасавюрт шагьрулул хъуниминнавугу, шагьрулул агьалинал дянивгу так ххуйчулий цIа кIицI лагайсса Мирза Мусаевич. Уттиния тинайгу цанна ххирасса даврий ххарину захIмат буллансса цIуллушивугу, гъира-шавкьгу чIа тIий буру. Атия Аджиева, ш. Хасавюрт