Февраль зурул 20-нний ЦIуминалийсса ЦIуссаккуллал школалий дия аьдатравун дагьсса Лакку мазрал байран. Му байран хъун дуван бувкIун бия МахIачкъалалиясса хъамал: чичу Сибирбаг Кьасумов, историк, публицист Дундар ХIажиев, макьанну чичу ва балайчи Карин Кьадинаев, кIунурдай ххаллилсса суратру щащайсса гьунарданул заллу, балайчи Жанна Кьурбанова, «ЧIавалачин» журналданул редактор Сиянат ХIажиева, «Аьрщи ва агьлу» передачалул автор Марианна МахIаммадова, лакрал радиолул журналист Издаг Мамаева ва цаймигу. П. Рамазанова А. Аьбдуллаева Байрандалий гьуртту хьунни ЦIуссалакрал райондалул администрациялул вакилталгу: райондалул администрациялул хъунаманал хъиривчу Исрапилов Аьли, райондалул КIулшиву дулаврил управлениялул хъунама ХIамид Нахаев, ЦIуссаккуллал шяраваллил хъунаманал хъиривчу Руслан МахIаммадов, магьирлугърал отделданул зузалт. Шяраваллил агьалигу чIявусса бия байрандалий. Хъинну ххуйну хIадур бувну бия байрандалунсса кюру: лакку маз буруччара, ябувара тIисса плакатру дия чIирай лархъун, лакрал багьу-бизу ккаккан буллалисса манкьулат, лаххия ва дукрарду дия ккаккиялун дирхьуну. Байрандалул
сакиншинначиталгу бия нукIузаманнул чалагъайртту ва бузмарду ларххун. Байран дайдирхьуна дуклаки оьрчIал къиссулия. Дуклаки оьрчIру, учительтал ва шяраваллил агьлу гьурттуну ккаккан дурна хъатIул аьдат -жалин дуцаву. Дуклаки оьрчIал «Мугьисалт» тIисса хъярчийсса сценкагу ккаккан бувна. Лакрал чичултрал назмурду пасихIну дурккуна дуклаки оьрчIал. Хъамаллурал ихтилатруми хIакьину жунма лакку маз ххирану бакъашиврия, маз – миллатрал ттеркьукьи хъанахъишиврия, му ябан аьркиншиврия, лакку маз къакIулшиву къаххуйшивуну чIалан аьркиншиврия бия. Байран чIюлу дурна Карин Кьадинаевлул, Жанна Кьурбановал ва ПатIимат Гавзиевал балайрдал. Ахирданий, школалийсса лакку байран хъун дан бувкIми хъамалу буван, лакку дукрардал ссупралухунгу лагма лавгуна. Байрандалия рязисса шяраваллил жямат бия, лакку мазрал байран ЦIуссаккуллал школалий гьар шинал дайсса байранну цIакь хьуну дур, му дуклаки оьрчIангу, жяматрангу ххира хьуну дур тIий.
