Байрандалун лавхьхьуну чIюлу бувсса школданул залданувун бавтIун бия учительтал, дуклаки оьрчIру, нину-ппу, бусравсса хъамал. Лехлай бия жула халкьуннан нукIува ххира хьусса дяъвилул балайрду. СахIналул чIирай ккаккан буллай бия жулва саллатIнал ва хIаписартурал чувшиврия бусласисса, дяъвилул кинордавасса парчри. Залдануву, хьхьичI кьюкьлуву щябивкIун бия байрандалул мажлисрай гьуртту хьун бувкIсса, орден-медаллал хъазамру бахьлаган бувсса къучагътал – Буттал КIанттул цIанийсса дяъвилул участниктал, Авгъаннаву интернационал бурж лахълай бивкIми, Чачаннавусса ва Бущихъивсса дяъвилул иширттаву гьуртту хьуми.
Байрандалул шадлугъ тIиртIуна ва гихуннай дачин дурну ия ванил сиптачи, 15 шинай ва школалий зузисса, ОБЖ-лул ва физкультуралул преподаватель, граждан обороналул хъунама Юсупов АхIмад Аьбдуллаевич. Ванал командалий залданувун ттугъ буккан бувна. Мюрщи аьралитурал-бахьттагьалтрал, хьхьирил флотрал, спецназрал кьюкьрал цала-цала кIану бувгьуну махъ АхIмад Аьбдуллаевичлул бувсунни байрандалул тарихрая, Буттал КIанттул цIанийсса дяъвилий ва личIи-личIисса кIирисса точкардай жула чиваркIуннал ккаккан дурсса чувшиврия.
Хъирив ихтилат бунни школалул директор, ДР-лул лайкь хьусса учитель Дибирова Зухра ЯхIияевнал. Ванил кIицI бунни оьрчIру Ватан ххирану тарбия баврил даву цала гимназиялий лавайсса даражалий дирхьуну душиву. Му масъалалух хъуннасса къулагъас дуллай бушиву школалул учительтал, хаснува ОБЖ-лул дарсру дихьлахьисса АхIмад Аьбдуллаевич. Бувсунни ва хIакьинусса байрандалийн хIадур хъанай, школалий ларгшиву къучагъшиврул дарсру, оьрчIал чирчуну диркIшиву сочиненияртту, рефератру, дуклаки оьрчIал дянив баян бувну бивкIшиву конкурс личIи-личIисса номинациярдаву: «Строевая песня», «Страна Спортландия», «Веселые старты» ва м.ц.
— Ва хIакьинусса байрандалий гьуртту хъанахъими ми конкурсирдаву хьхьичIун бувкмири. На дакI дарцIуну бура жула школалий дуклакисса оьрчIая зун лайкьсса наслу хьунтIишиврий, — увкунни ванил дяъвилул ветерантурахь.
Хъирив ихтилатру бунни МахIачкъалаллал Советский райондалул администрациялул вакил Елена Кожухинал, ДР-лул аьрали комиссарнал хъиривчу, МахIачкъалаливсса призыврал пунктрал хъунама Альберт РахIимовлул, Буттал КIанттул цIанийсса дяъвилул ветерантал Раиса Абуевал ва Играмуттин Аьбдуллаевлул, Авгъаннаву интернационал бурж лахълай ивкIсса МахIаммадхIажи ХIасановлул, Кулпатран ва оьрчIан социал кумаг баврил центрданул вакил Салим МахIаммадовичлул, Буйнакскалийсса 136-мур мотострелковый бригадалул аьраличу Юсуп Юсуповлул, хушрайсса пожарный охраналул председательнал хъиривчу ПатIимат Оьмаровал. Вайннал оьрчIахь оьрмулуву бучIи лякъинсса насихIатру бунни.
— Зун жун ккавкмур къа­ккакканнав,- тIий дуаьлий бия дяъвилул ветерантал. Вайннал барчаллагь увкунни школалул директорнахь ва учительтурал коллективрахь лайкьсса ник тарбия дуллай тIий.
Ихтилатирттал лях-карах гимназиялул дуклаки оьрчIру бия байрандалун хасъсса шеърирду ккалай, балайрду тIий. Мукунма школалул сахIналий вайннал ккаккан бунни дяъвилул чIумул лахIзарду.
№11 гимназиялул хьхьи­чIунсса курсант ХI. Муртуза­аьлиевлул чIирисса чIумул дянив, ппивгу бувну, бавтIунни Калашниковлул автомат.
Шиккува бусан, шанна шинал хьхьичI школалий директорнал сипталий сакин дурну дур ххассал бувултрал кьюкьа. Гьашину, тIурча, мунил гьанулий сакин дурну дур СОБР. Минналгу ккаккан бунни цала гьунарду.
Ва кьини шикку цала гьунарду ккаккан буллалисса оьрчIах бурувгукун, чIалай бия вай мяйжаннугу ххуйну хIадур бувсса, итххявхсса оьрчIру бушиву. ЧIалай бия вайннащал хIакьсса пишакартал зий бушиву.
Ва кьини школалул оьрмулуву чялишну гьуртту хъанахъисса оьрчIан хъамаллуралгу, школалул каялувчитуралгу бахшишру дунни. Хъирив школалул директор Зухра Дибировал барчаллагь увкунни цала мероприятиялий гьурттушинна дан бувкIсса хъамаллурахь. Байрандалул шадлугъ цинявппа хIала бувхсса лезгинкалий къуртал хьунни.

Андриана Аьбдуллаева