Мукун тIий бия МахIачкъалалив мартрал 12-нний Родопуллал бульварданий хьусса митинграй. Яру­ссаннал драмтеатрданучIан бавтIун бия чIявусса дагъусттанлувтал, бия ттуршвахъул Аьрасатнал ва Дагъусттаннал ттугъру, транспорантру, лозунгру. Цинявннал пикри-зикри ца бия – захIматсса тагьардануву хьусса Крымнал Республикалул халкьуннал чIарав бацIаву.

ХIасан Аьдилов
Митинг даврил сиптачитал хьуну бур республикалул профсоюзирттал организациялул цачIуншиву. МиннацIун бавкьунни студентътал, ветерантал, жяматийсса организациярду ва политикийсса партияртту. Митинграй гьуртту хьунни ДР-лул ХIукуматрал Председательнал хъиривчу Анатолий Карибов, ДР-лул цачIун дурсса профсоюзирттал председатель Аьбдулла МахIаммадов, ДР-лул Жяматийсса Палаталул председатель ХIамзат ХIамзатов, политикийсса партиярттал региондалийсса отделениярттал каялувчитал.
Митинг тIиртIуну махъ Аьбдуллал бувсунни, бавтIминнан баян бан ччай бушиву цивппа Украиннал агьалинащал цашиврий бушиву, Крымнал халкьуннал паракьатну, бавкьуну яхьунсса пикри-зикрирдацIун бакьлай бушиву, миннал чIарав бацIан ччай бушиву захIматсса чIумал.
— Жу цинявннал кабакьлай буру билаятрал Президент Владимир Путиннул Украиннаву хьусса къалмакъал цалийн дуцаву, паракьат даву мурадрай дуллали­сса давурттацIун. Украиннаву хъанахъисса ишру, жул пикрилий, ккаллиссар инсантурал ихтиярду лиян даврин. Украиннал властирдан аьркинссар цалва инсантурал иширттах къулагъас дуллан, цалва захIматрайну ччатI лякъинсса, яхьунсса шартIру щаллу дуллан. Цуксса хIайпнугу, властьралгу, майдандалийн бувкминналгу дянив къалмакъаллу хьуну, инсантал ливтIунни. Му жунгу кьувтIунни, — тIий ия Аьбдулла МахIаммадов.
Ихтилатчинал увкусса куццуй, чялиш бувккунни кIива уссушиврийсса миллатрал дянив ссивцIу бичин хIарачат буллалисса агрессивсса гужру. Миннал хIарачат буллай бур оьрус мазрай гъалгъа тIун къабитан Украиннаву, лакьлай бур оьруснай гъалгъа тIутIисса телеканаллу. Му захIматсса ппурттуву Аьрасат къанигьа бувсунни дунияллул империализмалул гьужумирттая. «Жу кьянкьану баян буллай буру – жу жулва уссушиврийсса халкь къакьабитанну цайнува цивппа!» — увкунни Аь. МахIаммадовлул.
Аьрасатнал Президентнал Украиннаву хъанахъисса иширттал хIакъираву дуллалисса давуртту хъинчулий ккаклакисса ихтилатру бунни мукунма ХIамзат ХIамзатовлул, Тарумовкаллал райондалул бакIчи Марина Абрамкинал, ДР-лул БакIчиначIасса Хъунисриннал Советрал член Оьмар Муртузааьлиевлул, Къизлардал къазахътурал обществалул атаман Николай Спириннул ва цайминнал.
Ахирданийгу митинграйн бавтIминнал кьамул дунни цалва пикри-зикрирду бусласисса ва Украиннавусса къалмакъал цалийн дуккан даврил хIакъиравусса цалла предложенияртту чирчусса резолюция.