Мартрал 14-нний МахIачкъалалив Дагъусттаннал Жагьилтурал тIиртIусса хIукуматрачIасса (открытое Молодежное правительство — ОМП) Культуралул ва халкьуннал аслийсса художествалул касмурдал комитетрал члентал хьунабавкьунни ДР-лул культуралул министр Зарема Буттаеващал.
Бадрижамал Аьлиева
Ва ХIукуматрал жагьилтурал хIадур дурну дия Культуралул шинал тIайла дуккансса, цивгу миллатрал культура хьхьичIуннай даврийн, машгьур даврийн тIайла дурсса, цаппарасса проектру. Ваниннин хьхьичI жагьилтурал гьурттушинна дурну дур «Культура детям села» проект иширайну щаллу даврин хас дурсса совещаниялувухгу.
ДР-лул культуралул министрнащал хьунабавкьунни ОМП-лул председатель Саида Микогъазиева, ОМП-рал куратор, ДР-лул ХIукуматрал председательнал маслихIатчи Камил Сяидов, ОМП-рал председательнал хъиривчу, «Я помощник Президента» жяматийсса организациялул координатор МахIаммад МахIаммадов. Ва батIавривух гьуртту хьунни Дагъусттан Республикалул Жагьилтурал иширтталсса байсса комитетрал председатель Заур Кьурбановгу.
Жагьилтурал проектирдаву итталун дагьансса цикссагу дия. Масалдаран, миллатрал культуралул парк, цувгу шагьрулул цумур-бунугу паркрал базалий буван бюхъантIисса. Жагьилтурал маслихIат бувна республикалул карта щаллу дуван Дагъусттаннал халкьуннал яннардавусса статуярду дирхьуну. Ми цирдагу дуван хъинну кьянкьасса материалдануя, цимигу ттуршукулий яхьунсса куццуй. Миннул ялттугу дуккан хъунмасса хIаллай дияйсса краска. Ва проектрангу къачансса арцу аьркин хьуншивугу хIисавравун лавсун, ми чанссарагу чан дувансса мурадрай, жагьилтурал пикри бия кумаграл хъирив художествалул ва графикалул факультетрал студентътурайн буккансса, миннал цалла дипломрал давурттив хIисаврай ми статуярду даншиврул ва культуралул паркраву ми дишиншиврул, автортурал цIардугу дирхьуну. Зарема Ажуевнал маслихIат бувна ми давуртту дуллан нанисса цинявннаясса царай тIалавшиннарду дуван, цанчирча гьарца скульпторнал цалла стиль, цалва «хатI» буну тIий.
Хъирив хьунни жагьилсса автортурал «Голоса молодых» тIисса клубрал презентация. Ва проект тIайла дурну дур миллатирттал мазру буруччаврийн ва ми жагьилтураву машгьур баврийн. Проектрал лагрулуву бан дакIний бур миллатирттал майданну, дагъусттаннал чичултрал оьрмулиясса ва творчествалиясса видеолекториум «Культура online». Проектрал мурадгу бур итххявхсса, чичин гьунар бусса дуклаки оьрчIру ва студентътал ялун личин баву.
Дия цаймигу хъин-хъинсса проектру. Миннуя цIа дунни ва хьунабакьаву хьусса ДР-лул Культуралул министерствалулгу, Заур Кьурбановлулгу. Миннал жагьилтурайн оьвчаву дунни, дурмуний гьашиву къадурну, гихунмайгу цIу-цIусса проектирдащал бачин.
