Дуниял даххана хъанахъисса чIумал Дагъусттаннай хъинну машгьурну дуссия дахьра-дахьра тани сакин дурсса «Ватан» тIисса ассоциация-ккуран. Таниннин гъапIну ларкьуну диркIсса билаят­рал дазурду аьч хъанан диркIукун, дазул кьатIувсса жула дагъусттанлувтуращал кIул хьун, гъан хьун, кувнначIан кув биян кумаг таний ва идаралуву зузисса инсантуралъя байсса.

«Ватандалул» сий таний цIакьссия. Мадарасса бия таний дазул кьатIувсса цала мачча-гъан кIулсса, хъамакъабивтсса, хьунабакьин ччисса. Жула редакциялийгума хьуссия Туркнавасса лакращал­сса хьунабакьаву. Исттанбуллая увкIун уссия Ххюлу­ссуннал Муса-Рамазан, Туркнаву­сса лакран ватандалийсса цала гъан-маччанащал кIул хьун хъунмасса кумаг бувсса. Туркнавусса лакрая цимигу лу чивчусса. Тийх Дагъус­ттаннал къавтIавурттал ансамбль сакин бувсса. Оьруснал театрдануву хьуссия дунияллул зума-зумардая бувкIсса дагъусттанлувтуращалсса хьунабакьаву, хъинну бюхттулсса сийлий, Москавуллал хъуни къуллугъчиталгу хIала-гьурттусса.
Дазурду тIиртIуну, каши дунаща бигьанма ччимур билаят­райн гьан бюхълан бивкIукун, «Ватан» жяматийсса идаралул кумаграх мюхтажми чан хъанан бивкIукун, идаралул сийгу чан хьуну чIалай дия. Амма махъппурттуву, дунияллийсса арардугу чIуллан диркIукун, чIаравсса билаятирттай политикалул тагьарду хIуркку тIун диркIукун, цIунилгу «Ватан» ккурандалул кумаггу, опытгу аьркин багьлан бивкIунни. Вана вания бия вай гьантрай «Дом Дружбылул» къатраву «Ватан» ассоциациялул муданасса президентнал, сиясийсса элмурдал доктор, профессор, Аьра­сатнал Академиялул академик МахIаммадов Аьбдулла Аьбдуллаевичлул ихтилатгу. Ванал дакIнийн бувтунни Дагъусттаннал БакIчинал рисалалувугу кIицI лавгун бушиву, чIахху-чIарахсса хIукуматирттал хъуниминнащалсса хIала-гьурттусса давурттал хIакъиравусса икьраллу дуршиву. Миккугу жула дазул кьатIувсса инсантал хIалану бикIан аьркиншиву.
Ассоциация уттара дуккан дуллай, дунияллийгу, республикалийгу хъанахъисса дахханашивурттугу хIисавравун ларсун, зун аьркиншивриясса доклад бунни уттигъанну Сириянава зана хьусса «Ватан» ассоциациялул вице-президент Сабир НурмахIаммадовлул. ЦIуну сакин хъанахъисса ассоциациялул сияхIраву 43 инсан ия. Ва батIавривух гьуртту хьун увкIун ия Дагъусттан Республикалул БакIчинал Виваллил политикалул управлениялул хъунама Артур Анварович Исрапиловгу.
— Дазул кьатIувсса инсантурая жула давурттавух хIала буххаву тIалав булланнин, жувагу жущава шайсса кумаг буллан аьркинну тайннан. Ниттил маз лахьхьавриву, цала буттахъал культуралущал, тарихращал, хIакьинусса кьинилул масъаларттащал кIул баврийну. Дазурду тIиртIуну мукьах жула оьрчIру мугьали бивхьуну бавчунни чил билаятирттайн. Миккугу жува чIумуй бакIрай къабавцIуру. Ялув бацIан чIал хьуру. Мунил ахиргу пашмансса дукIлай дур. Цаппарасса жагьилтал бяйкьусса ххуллийх най бур. ХIазран бакъар уттигъанну Рес­публикалул БакIчинал цинявппагу дазул кьатIув дуклан лавгсса диндалул ххуллийх нанисса оьрчIал сияхI тIалав дурсса. Ассоциациялул дан­сса давурттив чIярур. ТIайлабацIу ва кабакьу чIа тIий ура, — увкунни А. Исрапиловлул.
Ихтилатру ялагу бувна. ДР-лул миллатирттал министрнал хъиривчу Зикрулла Илиясовлул увкунни «Ватангу», цала министерствагу ца мурадирай зун аьркинссар, жула халкьуннан хайрданунну, куну. Масалдаран, чIаххуврай, Ставрополлал крайрай миллатру хIисаврай дарги оьрусналгу, арманиналгу хъирив яла чIявуми хIисав хъанай бусса бур. Тиккусса масъалагу хIакьину бигьа бакъасса бур, жунма кIулсса куццуй. «Ватандалул» дуллай бивкIсса ва дуллан дакIнийсса давурттивгу, жулла Республикалул БакIчинал тIалав буллалисса куццуй, жула бренд гьаз дуллалисса, жула халкь ххуй чулий ккаккан буллалисса дикIан аьркинни, — увкунни ванал. Шиккува гьаз хьунни масъала Дагъусттаннал бикIлил агьулданул бакъа, Дагъусттанная лавгсса оьрус­нащалгу, жула агьлу хIисаврай, дахIаву дуну бикIан аьркиншиврия. С. МахIаммадовлул сипталийну гьаз хьунни Сириянаву дяъвилул балардахьхьун биривну лихъачалт, мугьажиртал хIисаврай Туркнавун багьсса дагъусттанлувтурал масъала. Тайннавух мадарасса лакгу бусса бия. ХIукуматирттал дянивсса арарду Аьрасатнал федерал идарарттайхну дакъа щаллу дан къашайсса духьувкун, тайннан кумаг бансса, тай ххассал бансса ххуллу-хха лякъин аьркиншиврия.
Ассоциациялул зузаврил вания тихуннайсса плангу ххалдиргьунни. Ккурандалул исполкомрал чулуха каши-кьудрат ххисса «Сумма Капитал» компаниялул Директортурал Советрал председатель З.М. МахIаммадовлуйнсса чагъаргу чивчунни, чIаравгу ацIу, давривухгу гьуртту хьу тIий миннат буллалисса. Ванийну цалчинсса «Ватан» ассоциациялул батIаву къуртал хьунни. Ва гьантлия гьантлийн аьраттал дуклакисса дунияллий Ватандалул цIаний дакIнийхтунусса захIмат бихьлахьисса, дакIру уздансса инсантал чан къахьунхьуви тIисса умудрай.
Жул корр.