Дагъусттаннал чарххичитал ххув хьунни «ММА-рал цIуртти ринграй» турнирданий

Мартрал 1-нний МахIачкъалаллал Аьли Аьлиевлул цIанийсса спорткомплексраву хьунни «Звезды ММА на ринг» тIисса хIала-ккаласса дандибуккавурттал турнир. Жулва чарххичитурал муттаэталну ринграй бия Бразилиянал, Франциянал, Хорватиянал, Азирбижаннал, Украиннал спортчитал ва мукунма Аьрасатнал личIи-личIисса регионнаятусса чарххичитал.

ХIасан Аьдилов
Ринграй хьунни шоулул зумунусса 11 бияву: 10 бияву хьунни ММА-рал кьяйдардайнусса ва ца кикбоксинграл (К-1) кьяйдардайну.
Турнир сакин дурссар ДР-лул хIала-ккаласса дандибуккавурттал федерациялул президент Аьбдулкерим Айгуновлул. Турнирданул хъуна-хъунама реферину (судияну) ия Аьрасатнал лайкь хьусса тренер Аьбдулманап НурмахIаммадов. Шоу дачин дурну ия жула билаятрал ринг-анонсер Александр Загорский. Турнирданул бусравсса хъамалну бия ММА-рал дунияллул чанна цIуртти: ХIабиб НурмахIаммадов, Аьли Багьауттинов, Расул Мирзаев, Владимир Минеев.
Турнирданий Дагъусттаннал командалувух гьуртту хьунни М-1 Challenge версиялул дунияллул чемпион, боевой самболул дунияллул чемпион Шамил Завуров, дунияллул ушурал бусалардавун агьма Рамазан Рамазанов, джиу-джитсурал дунияллул чемпион Вагьаб Вагьабов, кэмпо-каратэрал дунияллул чемпион Муслимбек Муслимов, тактический борьбалул дунияллул чемпион СалихI Къаравалиев, ММА-рал дунияллул халкьуннал турнирдай ххув хьуми ва призертал: Заур ХIусаниев, Иманаьли ХIамзатханов, Эльдар ХIасанов, Султан Аьлиев, МахIаммад МахIаммадов, Салим Даудов.
Цалчин бивунни «Чемпион» клубрал вакил Эльдар ХIасанов ва Азирбижаннал чарххичи Вугар Мамедзаде. Очкив хIисав бувну ххув хьунни Э. ХIасанов. КIилчинмур бяст-ччал хьунни «Горец» клубравасса СалихI Къаравалиевлул ва француз Гери Конол дянив. Цалчинмур раундрайва цIунцIиялул прием дурну ххув хьунни С. Къаравалиев.
Шамулчинмур бияву хьунни «ММА-Махачкала» спортклубрал вакил Муслимбек Муслимовлул ва азирбижанлув Тофик Мусаевлул дянив. Профессионалтуравух цалчин гьуртту хьусса Муслимбек ух хьунни мадара опыт бусса Т. Мусаевлуяр.
Турнирданий яла ччяни къуртал хьумур бяст-ччал бия МахIаммад МахIаммадовлул ва украинчу Павел Онигурдул дянив хьумур. МахIаммадлул Павел бугъ авай ливчIунни (мукунсса прием ду­ссар) 16 секундравату. Кикбоксинграл («К-1») кьяйдардайну биян бувккунни дагъусттанлув Заур ХIусаниев ва Аьрасатнал командалул вакил Рустам Аьбдуллаев. Технический нокаутрайну ххув хьунни Р. Аьбдуллаев.
Яла данди бувккунни «Белый медведь» клубравасса Иманаьли ХIамзатханов ва хорватчу Трусек. Очкорду хIисав бувну дагъусттанчу ххув хьунни.
Технический нокаутрайну ххув хьунни «Горец» спортклубравасса жула Салим Даудов азирбижанчу Юсиф Агъаевлуяр. Хъиривмур бияву хьунни дунияллул ушу-саньдалул бусалардавун агьсса лаккучу, мукьила дунияллул чемпион, Американал континентрал чемпион Рамазан Рамазановлул ва Украиннал Артем Акуловлул дянив. Рамазан муттаэнаяр ххув хьунни цалчинмур раундрай бугъ айсса прием ишла дурну.
Ва ялагу, жула Султан Аьлиев ххув хьунни бразилчу Чарлес Андредлуяр технический нокаут­райну.
КIира супербой хьунни ва турнирданий. Цалчинмур «Вагьаб Вагьабов – Руслан Хасханов», ва кIилчинмур – «Шамил Завуров – Ринат Латифов». КIирагу биявриву ххув хьунни дагъусттанлувтал.
Му куццуй дунияллул халкьуннал турнир къуртал хьунни Дагъус­ттаннал чарххичитурал ххувшаврийну 9:2 счетрайну.
Вара куццуйсса турнир хьун­тIиссар гьашину ссуттилгу.