Февральданул 25-нний ссят 19 хьусса чIумал «Дагестан» РГВК-лий хьунни ДР-лул БакIчи Рамазан АьбдуллатIиповлул «Открытая власть» проектран хасъсса тIайланнасса эфир. Мунил тема дия: «Разумные слова и реальные дела. Итоги года работы».

ХIасан Аьдилов
Дагъусттанлувтуращал ихтилат буллан хьхьичI, Рамазан АьбдуллатIиповлул бувсунни республикалул БакIчинал къуллугърай авцIуну махъ шинай дурсса давурттал хIасиллая.
«20-ннияр ххишаласса шиннардий рес­публика диркIссар личIи-личIисса тагьардаву, власть дия цалий дакъасса, хьхьарасса, каялувшиву заэвну дуллалисса. Ми цинярда шиннардий халкь ялапар хъанай бия хавардайну, бурушинттайну, аьвамсса, аьвсса пикрирдайну. ХIакьину на, мудана куна, дакI тIиртIуну гъалгъа тIун ччай ура.
На чIявуну тахсирлув уллан бикIай, дакI тIиртIуну жавабру дуллалаву сававну, бюхъай цаппарассаннан къаччангу бикIан. Амма ттун бусравну бур дагъусттанлувтал, мунияту, ттул пикрилий, гъалгъа тIун аьркинссар дакI тIиртIуну, тIайлану, маччасса инсантуращал куна.
Политикийсса буругаву цукунсса духьурчагу, диндалул мазгьай цумур дунугу, цумур миллатраясса бухьурчагу, циняв дагъусттанлувтал ттун цакуцну бусравну чIалай бур. На ура Дагъусттаннал каялувчи, мунияту на дуллалиссара циняв дагъусттанлувтурал жаваб, цанчирча жува чIявусса халкь бакъару (сайки 3 млн. инсантурал), мунияту жува аьркинссар куннал куннаха аякьа дуллан, цачIу щаллу буллан жулва оьрмулийн багьайсса масъалартту», — увкунни Р. АьбдуллатIиповлул.
Республикалул БакIчинал циняв да­гъусттанлувтурахь барча увкунни Сочилий кIинт­нил Олимпий тIуркIурду узданну баву ва хха­ллилсса ккаккияртту хьун даву Аьрасат­нал командалул, медальлал зачетрай цалчинмур кIану бувгьуну.
— Олимпиадалул тIуркIурду баву – му Аьрасат цIубуккаврил, цIунилгу ччаннай бацIаврил лишанни. Жува циняв тамашалий бивкIру, буруккинттарай бивкIру, амма цинявннаяр хъунмур буруккин ттул бия, бала-апатIсса иш къавхьуния тIий. Сочилий мюхчаншиву дуручлай бия яла лаваймур даражалий. Га Аьрасатнал ва В. Путиннул яла хъунмур ххувшавур.
Жува тIайланнасса эфирдануву махъва-махъ хьунабавкьуния шинмай къачансса ишру хьунни — дурккунни ДР-лул Халкьуннал Мажлисрайнсса Республикалул БакIчинал Рисала. Тикку на бувсъссия жулла культурагу, адав-мяърипатгу дуручлантIишиву. Муниха зий буру жува махъсса шинал лажиндарай.
Ва шин Культуралул шин хъанахъиссар. ХIакьину жура ишакаш дуллалиссару Да­гъусттаннай культуралул проект. Рисалалуву на хIарачат бувссия дурмунияр ххишала Дагъусттаннай ялун нанисса чIумуву дансса давурттаятугу бусан. ЧIявусса гъалгъарду, хаварду бия на Республикалул бакIчинал къуллугърая укьан уллалишиврул хIакъираву. Амма ттун ччай бур учин: жулва дянив бакъассар абадлийми, мукунма къуллугъраймигу.
Официальсса рейтингирттайн бувну, каялувшивруясса мюнпатрал чулуха жулла республика 68-мур кIанавату 20-мур кIанайн дуркIун дур. ЦIуллушиву дуруччаврил модернизациялул чулуха Дагъусттан 6 -мур кIанай бур. Агьалинал властьрайн вихшала дишаврин хасну 70-мур кIанавату 3-мур кIанайн бувкIун буру.
Экономикалул тагьар Дагъусттаннай уттигу захIматнура личIлай дур, цанчирча экономикалул чIявуми бутIри зий бакъар. Му мукуннугу, 2013 шинал промышленностьрал дуккан даймур гьарза хьунни 1,37 процентрал. Циняв муниципал сакиншиннал налогру датIаврил программа цалчин биттур дурссар 100 процентрал. Мукунмасса задачартту бивхьуну буссар 2014 шиналгу. Ларгсса шинал цIуну тIивтIуссар 30-яр ххишаласса дуккаврил учрежденияртту. Жу бувссар ва цIубуккан бувссар 440 километра ххуллурдал, 193 километра газрал бургъурдал. Бувссар цаппара заводру, бакIуйн буккан бувссар пюрунтирттал завод, асфальтрал ва бетондалул завод, томатрал паста байсса завод. Уттигъанну жу барду цIусса перинатальный центр Хасавюрт шагьрулий. Мува куццуйсса центр буллай байбишинтIиссар гьашину МахIачкъалаливгу. Жу хIарачат банну федерал программалийхчил бувну къуртал бан оьрчIал садикру. ХьхьичIми шиннардий МахIачкъалалив щаллу байсса бивкIссар садикирттай 300-400 оьрчIансса кIану. Ларгсса шинал дузал бувссар 3000-яр ххишаласса кIанттурду. Жу жува увкумур бацIан байссар, — увкунни Республикалул БакIчинал.
Яла журналистътурал ва кIантту-кIанттурдая телефондалувух буллай бия суаллу. Цукунсса суаллу буллуссарив Респуб­ликалул БакIчинахьхьун ва ганал дуллусса жавабирттал хIакъираву жу чичинну хъиривмур номерданий.