Февраль зурул 4-нний Расул ХIамзатовлул цIанийсса Миллатрал библиотекалуву хьунни имам Шамил дунияллия лавгун 143 шин шаврин хасну культуралул-тарихрал форум. Му даврил сиптачитал бия дагъусттаннал культура ва аьдатру гьаз давриха зузисса Дагъусттаннал регионал идара «Дагъусттаннал уздантал».
П. Рамазанова
ЧIявусса чичулт, шаэртал, историктал, художниктал, аьлимтал, паччахIлугърал, жяматрал ва динийсса идарарттал вакилтал бавтIсса му форумрал дайдихьу дуллалисса ихтилат бувна «Дагъусттаннал уздантал» организациялул Советрал председатель Умаханов Каримханнул. Мура идаралул Советрал председательнал маслихIатчи, даргиял поэтесса, «Родник» Ассоциациялул хъунмур, «Дагестан» ГТРК-лул журналист Аминат Аьбдурашидовал бувккуна оьруснал машгьурсса шаэр ва таржумачи, Дагъусттаннал дус, «Молитвы в дагестанском небе» автор Сергей Соколкиннул форумрайнсса чагъар: «Аьрасатнал КIяла кьурукьру цIанилусса дунияллул халкьуннал литературалул ва музыкалул фестивальданул цIанияту барча дуллай ура Дагъусттаннал хъунасса арс, имам Шамил дакIнийн утлатисса форум. Жу ххарину ва пахрулий буру му форум «Аьрасатнал кIяла кьурукьру» фестивальданул лагрулий най душиврия, мунил лозунг «Халкьуннал дусшиврувур Аьрасатнал бюхттулшиву» душиврия. Дагъусттаннал агьали цачIунмай бувсса, лагма лаган бувсса имам Шамил бусалардавун агьсса инсан ур, мунал жуйнма аманат бунни дакьаврил ххуллийх бачин хьхьичIунмай. ЧIумуй бакIрай авцIуну, маслихIатрайсса аманат бунни. Мунал тарап дургьуну най ивкIсса Расул ХIамзатовлул тIийкун, «Дагъусттан хушрай къабувхссар Аьрасатнавун, хушрай Аьрасатнавагу къабуккантIиссар».
Бувккуна мукунма Миллатирттал ва регион арардал Москавуллал институтрал ректор Елена Калашниковал барча буллалисса чагъар. Мунилмур чагъаргу дагъусттаннал жагьилтал ххуймур ххуллийн кIункIу буллалисса, агьалинал дусшиву цIакь дуллалисса давурттив дуллалисса «Дагъусттаннал уздантал» идаралийн барчаллагьрайсса бия.
Форумрай бюххансса ихтилатру бувна Дагъусттаннал миллатрал политикалул министрнал хъиривчу Зикрулла Илиясовлул, техникалул элмурдал кандидат, Дагъусттаннал строительный техникумрал директор МахIаммад МахIаммадовлул, Калугалийсса имам Шамиллул цIанийсса музей тIитIаврил сиптачи, имам Шамиллул мюриднал наслулиясса АьлиасхIаб Хархачевлул, профессор, академик, Прикладная экологиялул институтрал директор ХIаирбаг АьбдурахIмановлул, Шамиллул фондрал председатель Оьмар ХIажиевлул, поэтесса ва таржумачи Марина АхIмадовал, Автодорожный университетраву дарс дихьлахьисса аьлимчу Муртазааьли Аьлиевлул, Яруссаннал драмтеатрданул хъунама режиссер ХIайбулла Аьбдулгъапуровлул, яруссаннал шаэртал Тубхат Зургаловал, Аьбдулмажид Гитиновлул, МахIаммад Насруллаевлул ва цаймигу бусравсса инсантурал. Форумрал ахирданий агьалинал дусшиврийсса арарду цIакь дуллалисса давурттив Аьрасатнаву чара бакъа дуллан аьркиншиврий чIурчIав дуллалисса ихтилат бувна «Дагъусттаннал уздантал» идаралул Советрал председатель, ДР-лул Жяматийсса палаталул эксперт, «Имам Шамил дакIнийн утлатисса кьини» форумрал сакиншиннарал комитетрал председатель Каримхан Умахановлул. «Халкьуннал дусшиврувур – Аьрасатнал бюхттулшиву» проектрал автор, оьруснал машгьурсса шаэр Сергей Юрьевич Соколкиннул пикри хъинчулий ккавккунни республикалул бакIчи Рамазан ХIажимурадовичлулгу, дагъусттаннал чичулт, художниктал, аьлимтал, интеллигенция мудангу мукунми проектирдал лагма лавгун, дуллалимуницIун кабакьу буллантIиссар», — увкуна Каримхан Амирхановичлул.
