Февральданул 11-нний Дагъусттан Республикалул бакIчи Рамазан АьбдуллатIиповлул ва Аьрасатнал регионнал иширттал министр Игорь Слюняевлул дунни совещание. Тикку ххалбигьлай бия 2013 шинал республикалул социал-экономика хьхьичIуннай даврил хIакъиравусса ва АьФ-лул Президентнал майрал (2012 ш.) хIукмурду ишакаш буллалаврил хIакъиравусса масъалартту.
Республикалул бакIчинал кутIану бувсунни ларгсса шинал Дагъусттаннай дурсса давурттая.
Масъалалул хIакъираву хъунмур ихтилат бунни ДР-лул экономикалул министр Раюдин Юсуповлул. Ганал мукъурттийн бувну, ларгсса шинал давурттал хIасиллу хъинчулийсса дур, гьануми макроэкономикалул ккаккияртту лахъ хъанай най дур.
Министрнал бувцунни цалва тIутIимур хIакь буллалисса цаппара цифрарду. Раюдин Юсуповлул бувсунни мукунма ДР-лий цIакь дурну душиву 10 приоритетсса проект экономикалул циняв бутIран хасну. Кьамул бувну бур ДР-лул бакIчинал хIукму «Об ускоренном социально-экономическом развитии Республики Дагестан в 2013-2014 годах». Му хIукмулун хасну ХIукуматрал ва районнал ва шагьрурдал округирттал дянив кьутIирду чирчуну дур 2013 шинал социал-экономикалул давуртту хьхьичIуннай хъит учин даврил ккаккияртту лахъ даврил хIакъираву.
Совещаниялий ихтилат бунни ДР-лул ХIукуматрал Председательнал 1-ма хъиривчу Анатолий Карибовлул.
Аьрасатнал регионнал иширттал министр Игорь Слюняевлул хъинчулийсса кьимат бивщунни 2013 шинал давурттал ккаккиярттан. Ганал бувсунни промышленностьраву шяраваллил хозяйствалул, къатри даврил бутIраву хьхьичIуннайшивуртту хьуну душиву. ЛяличIисса асарду министрнайн биян бувну бур Каспийскаллал пюрунтрал заводрал. «Архитектуралул пюрунтру баву – му цалчинмур хьхьичIунсса проектри дузрайн дуккан дурсса. Хъуннасса даву дурну дур инвестортурал ва республикалул бакIчинал. Ва проект хъанахъиссар эталондалул проектну федерациялул циняв субъектирдан. Жу зул опытрая гьарца кIанай бусланну ва чIалачIи банну Дагъусттаннай бушиву къулагъас дуван лайкьсса практиктал», — увкунни министрнал.
