ta_3Сочилий хьунтIисса Олимпий тIуркIурду байбишин бувккусса гьантри личIлай бур. Жулва билаятрайх нанисса Олимпий цIарал Эстафеталул бущигу цалнияр цал анавар буклай бур. Эстафеталул ирглийсса этап хьунни январьданул 17-нний Белгородуллал областьрайгу.
Белгородуллал область хъанай бур Олимпий цIу кIилчин кьамул дуллалисса Аьрасатнал къачIярусса регионнавасса ца. Цалчин Олимпий цIарал Белгородуллал область чанна лахъан бувну бур 1980-ку шинал. Ялагу ва этапрал ляличIишиву дур мунивух лакрал жагьилталгу гьурттуну бушивруву: ДР-лул Жагьилтурал иширтталсса байсса комитетрал «РДДМОО» (Республиканский Дом детских и молодежных общест­венных объединений) ГКУ-лул оьрчIал ва жагьилтурал жяматийсса сакиншиннардищалсса даврил отделданул начальник, Хъусращиял шяравасса Индира Аюбова ва ЦРДИ-рал (Центр развития добровольческих инициатив) волонтер, «Илчи» кказитрал зузалал арс Нурислан Аьдилов. Ттуршлий мяйцIала инсаннавух жулва лакрал жагьилтал ба­къасса, бивкIун бур машгьурсса инсанталгу — спортсментал Федор Емельяненко, Сергей Тетюхин ва Бельгиянал принц Андриан де Круа-Ре.
Ва агьамсса иширал хIакъи­равусса ихтилат хьуну бур Индира Аюбовал ва лавайгу кIицI лавгсса «РДДМОО» ГКУ-лул информацион технологиярттал ва общественностьращалсса ва СМИ-рдащалсса дахIавурттал отделданул начальник Амина Оьмаровал дянив.

— Индирай, инава Олимпий цIарал Эстафеталувух гьуртту хъанахъиминнал дянив цукун багьссарав буси.
— Олимпий цIарал Эстафеталувух гьуртту хьуншиврул на буцIин бувссия хасъсса анкета, цувгу буцIин буван бюхъайсса ччинаща. Ттул ххаришиврун, ттулмур анкетагу язи бувгьуну бия.
— Ссайн бувну, ци кьяйдалий тIайла буклай бия му Эстафеталувух гьуртту хьун ччими личIи-личIисса шагьрурдайн? ЛяличIийну Белгородрайн цукун багьра ина?
— КIулсса куццуй, Олимпий цIарал МахIачкъалалиймур этап­рал маршрут кутIа даврицIун, факелоносцынал сияхIгу 270 инсанная 67-ннайн дияннин кутIа дурну дия. Мукун, Эстафеталул Дагъусттаннаймур этаправун къабагьминнан аьркинну бия Олимпий цIу Аьрасатнал цайми регионнай ларсун бачин. Эстафеталул партнер «Кока-Кола» компаниялул на Белгородрайн тIайла бувккунна.
— Цукун бивра ина Белгород­райн, ягу биян буврав?
— На цал Москавлив бивра самолетрай. Москавлиягу поездрай лавгра Белгородрайн. Ва аьрххилухсса харжлугъ щаллуну цийнна ларсунни Олимпий цIарал Эстафеталул спонсор «Кока-Кола» компаниялул.
— Эстафеталул Белгородуллалмур этапрал ци ххуллийх бачин нясив хьур вин?
— Му чулуха ттун хъунмасса тIайлабацIу хьуна. Му ххуллул ттулмур бутIа бия шагьрулул центрдания арх бакъа — Преображенская кIичIираву. Цуппагу ттулмур аьрххи хьуна ахттаяр махъ, цIан ларкьуну махъгума. Мунилгу ттул каруннихьсса цIаран ляличIийссара яргшиву дуллай дия. Эстафеталуву на левчура 150-ннийн дирсса метрардай.
— Муниннин хIадур хъанайгу буссияв, цукун цIу дугьантIиссарив, цукун къуццу тIунтIиссарив лахьлай?
— Тунукьай, стартрал хьхьичI жу тренингирттай буссияв. Жун бувчIин бунни каних цIу тIайлану цукун дугьантIиссарив, цайминнахьхьун му цукун дуллантIиссарив. Мукунма бувсунни ва иширах бурган бувкIсса инсантуращал цукун къуццу тIун аьркинссарив. Ттун тIайлабацIу хьуна — бювхъуна факел канил дугьан.
— Факелоносцынал Олимпий янналия ци учин бюхъанссар вища?
— Янна гьакссагу ххуйсса дур, гъилисса, ккаккангу диц-куц дусса, цIу бусса.
— Вин винна Олимпиада му цир, аьмну ларсун?
— Олимпиада — му хъинну хъунмасса агьамсса ишри, му дунияллул язими спортсментал ца кIанай ккаккан бюхъан­сса хIалур. Яла-яларив тIааьнну бикIай жулва спортсментал ххув хъанахъисса чIумал, муна му чIумал на пахрулийгу бикIара жулла хIукуматрая.
— Эстафеталувух гьуртту шаврия вил цукунсса асарду ливчIри? Олимпий цIаращалсса факел канил дургьусса чIумал ци пикрирду, асарду бия виву?
— Ва аьрххилуя на яла хъинми, чаннами асардащал зана хьура. Факелоносец хьунсса хIалу оьрмулуву цал дирияйхьунссар. Му ппурттуву ттувува ци асарду бивкIссарив бусангу махъру биял къахьунссар. Микку дия гьалакшивугу, ххаришивугу, жулва билаятраясса дазу дакъасса пахругу. ХIайп нава гьуртту хьусса Эстафета жулва шагьрулий МахIачкъалалив бакъа, Белгородрай хьусса. Амма утти ттул хIалу дур январьданул 27-нний МахIачкъалалив хьунтIимур Эстафета хIадур буллалавривухгу волонтер хIисаврай гьуртту хьунсса.
— КIулсса куццуй, Эстафеталувух гьуртту хъанахъиминнаща бюхълай бур Олимпий цIарал факел машан ласун. Инна ишла дував му хIалу?
— Туну. На бура му Олимпиадалул лишан ласун бахтти хьуминнавух ва хъисвагу хIайп тIий бакъара му ласун харж дурмуния. Машан ласав ттунна ва ттула кулпатран Олимпиадалиясса хъамакъабитулун. Олимпиада дайдирхьуну махъ, февраль зуруй школардайнгу ттущалла ласунна, гьарцагу оьрчIаща ва байрандалул лишандалийн ка щун бюхъаншиврул. Ккаккан данна дуклаки оьрчIан, кIулну бикIаншиврул миннан мюнпатсса давурттивгу душиву, компьютердал тIуркIурдах щябикIаву ва заралсса, ххуй дакъасса аьдатирттал бакIрачIан цичIав ххуйсса къабуцайшиву. ЦIуллу-сагъшивурив дур яла агьаммургу, яла аьркинмургу. Цинявппагу дагъусттанлувтурайнгу мукуннасса оьвчаву дуллай бура.
— Пахрулий бурав инавагу Олимпиадалул бутIа хьуну?
— Гьай-гьай, хъинну ххарину бура Олимпий суккушиннараву чIивисса бутIа ттущавагу бишин бювхъуну тIий. На муданмагу спортрал ва цIуллу-цIакьсса оьр­мулул чул бувгьумурда, мунияту Эстафеталувух гьуртту шавугу ккалли дуллай бура ттулва къачIявусса язими хияллавасса ца щаллу шаврин.
ХIадур бувссар
Бадрижамал Аьлиевал