ЧIявусса билаятирттай цала-цала аьдатирттай, тяхъану, ххарину кIицI дайсса, мюрщинангу, хъунанангу ххирасса байран дур ЦIусса шинал байран.
Махъсса шиннардий ва байран тяхъану, лахъа-хъунну, райондалул администрациягу, шяраваллил жяматгу, дуклаки оьрчIру ва учительталгу лагма лавгун, кIицI дуллан бивкIунни Новостройрайгу.
Трестрал залдануву бацIан бувсса елкалухун бавтIун бия цинярдагу шяраваллал агьлу. Шадлугърай гьуртту хьун бувкIун бия Экспертизалул ва проектный управлениялул масъалартталсса буллалисса ДР-лул президентнал управлениялул хъунама ХIажи Султанов, райондалул администрациялул бакIчи МахIаммадхIажи Айдиев, Новостройрал иширтталсса буллалисса мунал хъиривчу Алик Исрапилов, райондалул КIулшивуртту дулаврил управлениялул хъунаманал хъиривчу Малика Акаева.
Новостройрал агьлу ЦIусса шинащал барча бунни райондалул администрациялул хъунама МахIаммадхIажи Шихамировичлул.
— Ххирасса оьрчIрув, хIурмат бусса нину-ппу, учительтал! Ларгунни ца ттигу шин жулла ва цIусса миналий. Уттинингу жура мадарасса давуртту дарду ва миналий ххуйсса оьрму дузал шаву мурадрай. ТIитIарду цIу-цIусса школарду, зузи буварду личIи-личIисса объектру.
Уттиния тихунмайгу жула масъалартту лябукку буну щаллу бан хIарачат булланну. Жува циняв уттигу ца миналийн бивзун бакъашиврул, кIибивщуну бушиврул, ттунна ччиссаксса аякьа зуха дан хъанай акъара.
Гьаксса ттунгу ччива мудан шийх, зул чIарав икIан. ДучIантIиссар жува циняв ца миналийсса, оьрму цила нирхиравун багьсса чIунгу.
Ва жула цIусса мина тIутIайх дичин дан хъунмасса бияла зухь буссар, оьрчIрув! Ттун ччива зу школарду къуртал бувну махъ, институтирттавун бувххун, ххуйсса пишакарталгу хьуну, райондалийн кIурабавну, — увкунни М-ХI. Айдиевлул.
Хъирив ванал цинявппагу Новостройрал школардай марцIну ххювардай дуклакисса оьрчIан бахшишран буллунни луттирду. ЛичIи-личIисса бахшишру дунни райондалул ва республикалул конкурсирдай хьхьичIунсса кIанттурду бувгьуминнангу.
Дуклаки оьрчIалгу цала-цала концертрал программарду ккаккан дунни. Гихуннай шадлугъ хъиннура тяхъа дунни оьрчIал дянив хьусса личIи-личIисса конкурсирдал ва тIуркIурдал.
Дуклаки оьрчIру ва нину-ппу барчаллагьрай бия ва байран тяхъану, шадну гьан хъунмасса захIмат бивхьусса Новостройрай культуралул давриха зузисса ХIабибат Буттаевайн.
Дуклаки оьрчIал ккаккан дурсса концертрал программардай дакI даркьусса МахIаммадхIажи Шихамировичлул баян бунни ЦIусса шинал гьарица Новостройрайсса школалун костюмру ласун 50 азарда къуруш итадакьинсса, мукунма Новостройрайсса школардал дянив художествалул самодеятельностьрал конкурс баян бувну, 1-мур кIану бувгьуминнан 60 азарда, 2-мур кIану бувгьуминнан 40 азарда, 3-мур кIану бувгьуминнан 20 азарда къуруш дулунсса пикри хьушиву цанма.
Му хаваргу хъатру ришлай ххарину кьамул бунни залданувун бавтIминнал.
Тяхъашивурттал хъирив цинявппа бавтIунни трестрал столовайлуву тIивтIусса авадансса ссупралухун.
