Аьрасатнал строительствалул ва ЖКХ-лул министр Михаил Меннул регионнал каялувчитурая тIалав бунни гьарца нюжмардий бусаван кугьна хьуну лекьан куннасса къатрава халкь бизан баврил хIакъираву. 2014 шинал февральданул 1-ннин регионнал аьркинссар ЖКХ-лул реформалунсса кумаграл фондравун дулун лекьлакьиссаннун (аварийный) ккаллисса къатраву яхъанахъисса инсантурал цIа-бакI ккаккан дурсса сияхI. Мунил хIакъираву Михаил Меннул бувсунни 2013 шинал декабрьданул 27-нний ХIукуматрал къатраву най диркIсса селекторданул совещаниялий.
«Лекьлакьисса къатрава халкь бизан баврил программа ишакаш даврил анализ дурну, жу ялун личин барду кIива масъала. Ца чулуха цаппара регионнай авариялул фонд­рава халкь бизан баврил масъала аьркинсса куццуй щаллу буллай бакъари, гамур чулуха тIурча — программа биттур дуллалаврил ялув бацIаву дуллай бакъар. Регионал властирдан бувчIин аьркинссар, квадрат метрардал махъ инсантурал оьрмулул кьадарду бушиву, мунияту му даву баччи бакъулну дуллан къабучIиссар. Минстрой му программа биттур даврил ялув кьянкьану бацIантIиссар. Мунияту 2014 шинал февральданул 1-нния тIайла хьуну жу дулланну гьарца нюжмардийсса селекторданул совещанияртту лекьлакьисса къатрал хIакъираву регионнал вакилтуращал, мукунма Счетная палатагу хIала-гьурттуну», — увкунни Михаил Меннул.
Минстройрал бакIчинал регионнайн тапшур бунни 2014 шинал февральданул 1-нин ЖКХ-лул реформалун кумаг баврил фондравун дулун бизан бан багьлагьисса инсантурал цIудуккан дурсса сияхIру. Га сияхIрай ккаккан бувну бикIан аьркинссар пулансса инсан (кулпат) чату, чун изан уллалиссарив. Министрнал регионнал каялувчитурахь бакIрайва бувсун бур, миккун бувкIун, ччитари ххалбан тIий бушиву цума чун изан уллалиссарив. Министрнал мукунма регионнахь увкунни цIуссагу, духссагу къатрал рынок ишла буллан аьркиншиву, яни багьлух ласлан аьркиншиву.
ЖКХ-лул фондрал гендиректор Константин Цициннул мукъур­ттийн бувну, шинал ахирданийннин регионнал отчет дулун аьркинссар уттигу 700 азарда квадрат метрардайсса къатраву яхъанахъисса халкьру бизан баврил хIакъираву. Цанчирча ми давурттансса арцурду 2010-2012 шиннардил программарттан хасну итадаркьуну диркIссар хьхьичIра. ХьхьичIми шиннардий бизан бан аьркинну бивкIсса 60 азарда квадрат мет­рардай яхъанахъисса халкьру 2014 шинал бизан бантIишиву бувсунни Константин Цициннул. ЦIанасса ппурттуву 140 азарда квадрат метрардай яхъанахъисса инсантал цIусса къатравун бизан баву дацIан дурну дур, яхъанахъиминнал судирттайн буллусса бяст-ччал къуртал хьунцIа.
Совещаниялий ихтилат бунни мукунма министрнал хъиривчу Андрей Чибислулгу.
ХIадур бувссар
ХI. Аьдиловлул