«Ккавкказуллал рангру» Лаккуй

Ттигъанну Лакрал райондалул администрациялул актовый залдануву хьунни Дагъусттан Республикалул ва Аьрасатнал Федерациялул Культуралул министерстварттал кабакьаврийну «Арт-плюс» творчествалул ккурандалул ва «Музей-заповедник энографический комплекс «Дагестанский аул» ГБУ-рал сакин дурсса кIанттая кIанттайн ласайсса суратирттал выставка «Многообразие красок Кавказа».

Выставкалущал бувкIун бия искусствовед, «Дагестанский аул» музей-заповедникрал зузала Татьяна Петенина, Дагъусттаннал халкьуннал художник, Аьрасатнал лайкь хьусса художник Хайруллагь Кьурбанов, Дагъусттаннал халкьуннал художник, Аьрасатнал Художниктурал союзрал член Галина Пшеницына, «Дагестанский аул» музей -заповедникрал зузала МахIаммадсяид Давудов.
Муний гьуртту хьунни райондалул каялувчитал, администрациялул ва идарарттал зузалт, Гъумучиял школалул ва лицейрал учительтал ва дуклаки оьрчIру.
Выставка тIитIлай, бувкIсса хъамаллурахь барчаллагь увкуна Лак­рал райондалул администрациялул бакIчи Абакар Къюннуевлул.
— Жунма кIулсса куццуй, 2014 шин баян бувссар Магьирлугърал шинну. Магьирлугърал шинайнсса хIадуршиннарал лагрулуву рес­публикалул хьхьичIвасса культуралул министр Зумруд Запировнал сипталийну сакин дурну дур Дагъусттаннал художниктурал суратирттал выс­тавка. Шикку дирхьусса суратир­ттал буслай бур жулла аьдатирттая, магьирлугърая ва багьу-бизулия, — увкуна ванал.
Татьяна Петенинал бувсуна «Дагестанский аул» музей-заповедникрал ххалбивгьусса проектрая. ТIивтIуну хъуннасса чIун къагьарчагу, музей-заповедникрал хьхьичI бусса бур хъунисса мурадру. Ялув кIицI лавгсса идарарттацIун ва проектрал кабакьулт хьуну бур Дагъусттаннал Художниктурал союзрал выставкарду дайсса зал, ДГПУ-рал художественно-графический факультет ва художест­валул училище.
— ЧIярусса шиннардий жучIава зий буссия Изобразительное искусст­валул музей. Архсса кIанттурдай ялапар хъанахъисса, магьирлугърая ятсса инсантал магьирлугърачIан гъан бансса мурадрай, 1970-80-ку шиннардий сакин дурссия кIанттая-кIанттайн ласайсса выставкарду. Миннущал лагайссияв чIярусса районнайн. ЦIанакул жул музейрал зузалт хIарачат буллай бур ми аьдатру цIудуккан дан. Шикку дирхьуну дур Дагъусттаннал хьхьичIунсса художниктурал суратру. Вайннавасса кIия жущал увкIунни: Кьурбанов Хайруллагь– Дагъусттаннал халкьуннал художник, Аьрасатнал лайкь хьусса художник, личIи-личIисса премиярттал лауреат — зул ватанлув, ххаллилсса художник ушивруцIун зувиллийсса шиннардий уссия Дагъусттаннал Художниктурал союзрай каялувшиву дуллай ва Пшеницына Галина, Дагъусттаннал магьирлугърал лайкь хьусса иш­ккакку, — увкунни ванил.
Цалва ихтилатраву Дагъусттаннал халкьуннал художник Хайруллагь Кьурбановлул кIицI лавгуна дагъусттаннал художниктурал дас­тта хъуннасса душиву, 1936 шинал сакин бувсса Дагъусттаннал Художниктурал союзравун хIакьину бухлай бушиву кIиттуршунничIан бивсса художниктал ва миннал выставкарду шайшиву так ца Да­гъусттаннай дакъассагу, Аьра­сатнал шагьрурдай ва дазул кьатIувгу.
Ттигъанну Ростоврай хьуну дур зональныйсса выставка, тикку биялсса бутIа дагъусттаннал художниктурал давуртталгу бувгьуну бур.
КIицI лавгуна кIанттая-кIан­ттайн ласласисса выставкалий машгьурсса художниктурал давур­ттащал дирхьуну душиву ДГПУ-рал художественно-графический факультетрал студентътурал дип­ломрал давурттугу. МаслихIат бувна оьрчIру му факультетрайн ва Художествалул училищалувун дуклан бакьин, микку жура-журасса пишарду лахьхьин бюхъайшивугу кIицI лавгун.
Галина Пшеницынал кIицI лавгуна цуппа Гъумукун ччянивагу бувкIшиву, Лакку билаятрал тIабиаьтрая ябатIин къахъанай бивкIшиву, Лакку тIабиаьтрая цаппарасса этюдру дуршиву.
Цалла даврил хIасиллу агьалинан ккаккан дан бюхъаврия ххарину бушивугу кIицI лавгуна ванил.
МахIаммадсяид Давудовлул бувсуна дагъусттаннал художниктурал кIанттая кIанттайн ласайсса выставка Аьрасатнал Федерациялул Культуралул министерствалул конкурсрай дирхьушиву.
Выставкалий дирхьусса гьарцагу суратрая балжину бувсуна Татьяна Петенинал.
Выставкалул сакиншинначитуращал увкIсса Дагъусттаннал художествалул училищалул студент ия выставка ххалдан бувкIминнал суратру дихьлай.