Елкалул байран Лаккуй

gofro_6Декабрь зурул 30-нний Гъумучиял клубраву хьунни аьдатравун дагьсса елкалул байран. Му сакин дурну дия райондалул администрациялул, Магьирлугърал ва КIулшиву дулаврил управлениярттал цачIуну.

Дайдирхьуна байран Гъумучиял детсадрал мюрщултрал. Бувккуна шеърирду, увкуна балайрду. Байран дачин дурну бия магьирлугърал къатлул зузалт АьлихIажи Щамххалов ва Шамсият Ибрагьимова.
Райондалул агьали барча бувуна Лакрал райондалул бакIчи Юсуп МахIаммадовлул.
Гихунмай куннал хъирив кув райондалул агьали цалва гьунардайну ЦIусса шинащал барча буллай бия Мариян Дандамаевал цIанийсса Гъумучиял магьирлугърал школалуву ва райондалул ОьрчIал творчествалул къатлуву тарбия хъанахъисса оьрчIал. Байрандалий бия ЦIушинал байрандалул яла бусравми хъамал Дякъил Ттатта (Гъумучиял магьирлугърал къатлул зузала МахIаммад ХIасанов) ва Марххаладуш (ПатIимат АхIмадова). Гьунарду ккаккан буллалиминнан вайннал буллай бия райондалул администрациялул чулухасса ссайгъатру.
Гихуннай райондалул Магьирлугърал къатлул зузалтрал ккаккан дуруна концерт.