2013 шинал ЕГЭ дулавриву низам дакъашиву ашкара шаврийну «лухIи сияхIравун» дагьсса Аьрасатнал 15 региондалул кьюкьлуву Дагъусттангу бур. ЕГЭ дулавриву вихшала кьуркьусса цинярдагу регионнал ялув бацIаву кьянкьа дан тIий дусса дур гьашину федерал центрданул. Муния баян буллайнмагу бур дуккаврил шин дайдирхьуния шихунмай. ЦIусса шинаву жулла республикалий яла агьамми масъаларттаву хьхьичIххуттай бихьлахьимургу ва бухьунссар.

Зулайхат Тахакьаева
Хъуннасса къулагъас дуллай бур ва масъалалух Лакрал райондалийгу. КIулшиву дулаврил управлениялул каялувчинал сипталийну, райондалул цаппарасса школарттай хьунни гьашину ЕГЭ дулаврил тIалавшиннардая бусласисса хьунабакьавуртту. Хьунабакьин дакIний бур ливчIми школарттайгу.
Гьашинусса ЕГЭ-лул тIалав­шиннардая бусан вай гьантрай Лакрал райондалийн увкIун ия ДИПКПК-лул ЦОИ-лул (Центр обработки информации Дагестанского института повышения квалификации педагогических кадров) хъунама Бакмаев Арсен Ширванинал арс. БатIаву дайдишин хьхьичI ва лавгунни Гъумучиял лицейравун ва школалийн. Ванан хъинну дакI даркьунни школалийгу, лицейравугу «Готовимся к ЕГЭ» тIисса стендру хIадур даврий.
Райондалул администрациялул актовый залдануву ЕГЭ-лун хас дурсса батIаврий гьуртту хьунни райондалул администрациялул бакIчинал хъиривчу Соня Макьаева, КIулшиву дулаврил управлениялул каялувчи Явсупи ХIамзаев, школарттал директортал, завучтал ва ЕГЭ дулунсса дарсирдал учительтал, Гъумучиял лицей ва школа къуртал буллалисса оьрчIру-душру ва миннал нитти-буттахъул.
БатIаву тIиртIуна Явсупи ХIамзаевлул. Хъирив Арсен Бакмаевлул бувсуна ларгсса дуккаврил шинал ЕГЭ дулавриву низам дакъашивуртту ялун личаву сававну, гьашину Дагъусттан Аьрасатнал КIулшиву дулаврил министерствалулгу, кIулшиву дулаврил ва элмулул аралувусса ялув бацIаврил федерал службалулгу итталун багьшиву, муницIун бавхIуну кьянкьа дуршиву ЕГЭ дулавривусса тIалавшиннарду. Арсен Бакмаевлул бусласимунийн бувну, ттигъанну республикалий ДР-лул бакIчи Рамазан АьбдуллатIиповлул каялувшиннаралу хьуну дур Рособрнадзорданул каялувчи Сергей Кравцов гьурттусса ЕГЭ дулаврин хас дурсса батIаву. Му батIаврия мукьах ДР-лул КIулшиву дулаврил ва элмулул министерствалул пландалувун дирчуну дур республикалул шагьрурдай ва районнай му масъалалун хасъсса батIавуртту дан.
— ЕГЭ цирив ва му вайксса шиннардил дянив цукун дуллай бивкIссарив буслан аьркиншиву дакъар. Тагьар жунна цинявннаннагу кIулсса куццуйсса дия – нину-ппу оьрчIан за лахьхьин баврил буруккинттарай бакъаяча, цукун-духьурчагу ЕГЭ дулунсса ххуллурду ляхълай бия. «Дургьумурди ттихIайсса» тIисса кунма, тти тагьар оьнивун дагьунни – хIатта федерал центрданул къулагъасралун багьунну жува.
ДР-лул бакIчи гьурттусса батIаврий Сергей Кравцовлул балжину бувсъссар Дагъусттаннай ЕГЭ дулавриву хьунадаркьусса гьарцагу диялдакъашивурттая. Я федерал центрданул, я Аьрасатнал КIулшиву дулаврил министерствалул ва тагьар гихуннайгу вара куццуй ритан дакIний бакъар. Сергей Кравцовлул увкусса куццуй, низам дакъашивуртту гьашинугу ялун личирча, ялунчIил ЕГЭ-лулсса буллан тIий бусса бур кIулшиву дулаврил министерство бакъача, чиннавусса инсантал. Жунма му аьркинсса иш бакъар. Мунийну Дагъусттаннал цIа гьаз къахьунссар. Мунийн бувну, жунма багьлай бур гьашину ЕГЭ дулаврива лажин кIялану буккан, — увкуна Арсен Бакмаевлул.
Гихунмай ванал балжину бувсуна гьашину ЕГЭ дулавриву хьусса дахханашиннардая ва тIалавшиннардая. Дурну дусса дур ЕГЭ дулайсса кIанттурдал оптимизация. Ттинин 129 бивкIхьурча, гьашину миннува чан бувну бусса бур 8. Гьарца пунктрайгу экзамен дулун багьлай бусса бур шан­ттуршуннияр ххибакъасса дуклаки оьрчIал. Выпускниктурал аьдад ххи хьурча, му ккалли бан тIий бусса бур низам зия даврин.
Ларгсса шинал ЕГЭ дулавриву ялун лирчусса тIайла­дакъашивурттавасса ца дусса дур щалва Дагъусттаннай школарттал директортурал ва экзамен кьамул дуллалисса кIанттурдал хъуниминнал сияхIрай бакъасса, яни цалла язи къадургьусса экзамендалийн выпускниктал итабакьаву, миннал нитти-буттахъал тавакъюрайн бувну. Гьашину мукунсса иш хьурча, экзамен къадуллушиврун хIисав бан тIий бусса бур. Мукунсса ишру хьусса школарттал директортал жаваблувшиннарайн кIункIу буллан тIий бусса бур. Мунийн бувну, школа къуртал буллалисса оьрчIал нитти-буттахъан багьлай бур экзамен язи дугьаврил ялув хъинну пикри бан.
КIилчинсса дахханашинна. Хъунисса тIайладакъашивуртту аьч хьусса (оьрчIахь телефонну дирирну, давуртту кьатIув ласун битлатисса) ишру сававну, сайки 50 процентрал баххана бувну бусса бур экзамен кьамул дуллалисса пунктирдал каялувчитал ва зузалт. Мяйва процентрал баххана бувну бусса бур школарттайн материаллащал букIлакIисса КIулшиву дулаврил министерствалул уполномоченныйтал. Ми цанна арцу ляхълай биривну бусса бур. Гьашину миннал хъиривгу бацIлан тIий бусса бур, мигу жаваблувшиннарайн кIункIу буллан тIий бусса бур. Жаваблувшиннарайн кIункIу увну усса ур ларгсса шинал давуртту ххал дуллай ивкIсса 133 эксперт.
— Гьамин, Москавлия комиссия бувкIсса ппурттуву жу хъирив лаян ккаккан дурсса 1000 давриву ялун ливчунни ца экспертнал 10 балл, гаманал 25 балл бивхьусса ишру. Му хьун къабюхъайсса ишри, — увкунни Арсен Бакмаевлул.
Рособрнадзорданул хIукму бувну бусса бур ца региондалул давуртту цамур региондалул ххал дуллан. Масалдаран, Дагъусттанналсса — Саратоврай, цамур региондалулсса тIурча — Дагъусттаннай.
Гьарца ЕГЭ дуллалисса пунктрай, гьарца аудиториялуву бишин тIий бусса бур кIи-кIива видеокамера, ми бишин тIий бусса бур жанахIраву ва лагма-ялттусса кIанттурдайгу. Ласлан тIий бу­сса бур директорнал кабинетраву бакъача, чIурду булайни кунма, онлайн режимрай Москавлиява. Масалдаран, Саратовуллал областьрал ласлан тIий бусса бур Дагъусттаннал кIива-шанма пункт. Му кьяйдалий щалва Аьрасатнан чIалан тIий бусса бур Дагъусттаннай ЕГЭ дуллалисса куц.
ЕГЭ-рал хIасиллу ххалдигьаву лахъи лаган бюхъан тIий дусса дур шинал лажиндарай. Цукунсса-дунугу диялдакъашиву ялун личирча, дуклаки оьрчI дуклан увхсса дуккаврил идаралува уккан уллан тIий усса ур.
Экзамендалийн буххан буллан тIий бусса бур сияхIрай оьвтIий. Му сияхI ккаланнинма баян буллан тIий бусса бур телефонну къадикIан аьркиншиву, аудиториялувун итабакьиннин металлодетектордавух оьрчIру ххал буллан тIий бусса бур цайми районнаясса МВД-лул ва ФСБ-лул зузалтрал. Масалдаран, Лакрал райондалий -Сергокъалаллал райондалиясса, Лакрал райондалулсса — цумур-дунугу цамур райондалий. Телефон дирирсса оьрчI экзамендалийн итавагу къаакьин тIий усса ур. Мукунма пунктирдал каялувчиталгу, яни Гъумучиял пунктрал каялувчи тIайла уккан тIий усса ур цамур райондалийн, цумур-дунугу райондалул пунктрал каялувчи учIан тIий усса ур Гъумукун.
Гьарца пунктрай бикIан тIий бусса бур федерал центрдания­сса инспектортал. Экзамендалул материаллугу тIайла дуккан тIий дусса дур, хьхьичIра кунна уполномоченныйтуращал дакъача, хасъсса спецсвязьрайхчил федерал инспекторнащал. Мунал дулун тIий дусса дур пунктрал каялувчинахьхьун, муналгу ганахьхьун махъуннай. Федерал инспекторнахь дусса дур ихтияр дуклаки оьрчI уккан анссагу, экзамен дацIан данссагу, хIатта пункт лакьинссагума.
Школарттал вив бишин тIий бусса бур биотуалетру, оьрчIру школалул кьатIув къабукланшиврул.
— КIулшиву дулаврил хьхьи­чIавама министрнал ишла дайва «ЕГЭ – туризм» тIисса калима, шагьрурдаясса оьрчIру шяраваллавун дуклан букIлакIаврийн учайва мукун. Уттисса министр Шахабас Шагьовлулгу, республикалул бакIчиналгу баян бунни шагьрурдаясса оьрчIру шяраваллавун дуклан гьан буллалаврин къадагъа дан, амма Аьрасатнал Федерациялул Конституциялул ихтияр дуллуну дур Аьрасатнаву чув ччай урив ми­кку дуклан, агарда нитти-буттал му кIанттай прописка духьурча. Жулва халкьгу пропискарду дуллай бур оьрчIал ЕГЭ дуллан тIайла буккан дакIнийсса кIанттай. Шагьрурдая шяраваллавун дуклан бувкIсса оьрчIал — ми хIакьину Дагъусттаннай бур 450-ксса, ЕГЭ дулун кка­ккан бувну буссар МахIачкъалалив личIисса пунктрай. Экзаменну кьамул дуллантIиссар Дагъусттанная бакъасса, цамур региондалиясса педагогтал, — ххи бувна Арсен Бакмаевлул.
Ванал кIицI лавгуна жулва халкь «Дагъусттаннай ци-бунугу чаран лякъин бюхъаншиврийн» вардиш шаврил, утти ялув бацIаву кьянкьа дантIишиврийн вихгума хъанай бакъашиву. Хъуннасса чIурчIав дуллай ия ва информациялул даву чялиш дан багьлай бушиврий.
ЦIусса шинайннин Рособрнадзорданул ххалбигьавурттайн бувну, Дагъусттаннал бачIи школарттал дакъасса дур лицензия. Коми­ссиялул баян бувну бусса бур ми школарттай хьусса ЕГЭ-рду къадуллушиврун ккалли дан, аттестатру къалпсса бушиврун хIисав бан.
Ванал ялагу бувсунни школа къуртал буллалиминнаща цала хушрай багьлух дулун бюхъантIишиву пробныйсса ЕГЭ, оьрчIру психологически хIадур баву мурадрай, Москавлия материаллу дучIан дурну. Ца экзамендалул багьа бусса бур 550 къуруш.
Москавлия бувкIсса инспекторталгу, КIулшиву дулаврил ва элмулул министерствалул вакилталгу, ЕГЭ дуллалисса пунктирдал каялувчиталгу, МВД-лул ва ФСБ-лул зузалтгу ца экзамендалия цамур экзамендалийннин баххана хъанан тIий бусса бур.
Гьашину ЕГЭ дулунсса щалва харжлугъ бихьлай бусса бур федерал центрданул. Тагьар ххуйчулиннай даххана хьуншиврул хъунисса харжлугъ бакIрайн лавсун бур Рособрнадзорданул.
Арсен Бакмаевлул ялагу кIицI лавгунни Дагъусттан «лухIи сияхIравун» багьшиву жува тахсирну.
— Бургияра жулва оьрчIал камерардайн лавсун, яла интернетраву бивхьусса лахIзардах, миннул хIакъираву чирчусса комментариярдах. Ми гьарзад щалва Аьрасатнан чIалачIиссархха, — увкуна.
— Гьай-гьай, ЕГЭ-лул хIасиллу гьашину чIаланну хьхьара хьунтIиссар, чIявуми аттестатрувагу къалавсунма личIантIиссар. Амма гихунмай, ЕГЭ так кIулшивурттайну дакъа дулун къабюхъантIишиву исват хьувкун, жулва оьрчIру лахьлантIиссар, мунил чулухуннайсса бургаву да­ххана хьунтIиссар, — ххи бувна Арсен Бакмаевлул.
КIицI лавгуна ЕГЭ-лул хIасиллу хьхьарасса районнай кIулшиву дулаврил управлениялул каялувчиталгу, районнал бакIчиталгу цала къуллугъран лайкь бакъашиврун хIисав бантIишиву.
Цаппара шиннардий Лакрал райондалул ЕГЭ дулай­сса пунктрай каялувшиву дуллай бивкIсса Соня Макьаевал кIицI лавгуна уттинин учительтуралгу, нитти-бутталгу ца мурад бивкIшиву – цукун-духьурчагу ЕГЭ дулунсса. Утти тIурча федерал центрдания укун кьянкьасса тIалавшиннарду духьувкун, ми мурадру баххана бан багьлай бушиву. Низам лиян дурсса ишругу ттинин къавхьушиву райондалий. Хъунмур гъалатIну ванил кIицI лавгуна нитти-буттахъал оьрчIру цила чIумал ЕГЭ язи дугьан къабувну, экзамен дуллалисса кьини та къачча ва чча тIий, цалла язи дургьумургу кьадиртун, цамур дуллалаву. Бувсунни ларгсса шинал оьрчIахь телефонну дирирну, багьана бакъасса организатортурай аькIри дирхьусса ишру хьушиву.
— Жулва оьрчIру хъинну бюхъу бусса бур, итххявхсса бур. Так иш лахъсса бал ласуншиврул нину-ппу чялиш буклакавриву бур. ОьрчIру цала бакIрава экзамен дулун битлай бакъар. Гьарцаннан ччай бур цалва оьрчIру яла сий думи вузирдавун — медакадемиялувун, юридический ва экономический факультетир­ттайн дуклан бакьин. Цала бюхъулуха лавхьхьуну, дуклан чун буххан ччай буссарив чIумуй пикри бувну, язи дугьияра гьашину экзаменну, — увкуна Соня Макьаевал.
Ванил ялагу кIицI лавгуна ЕГЭ дулаврил низам лиршиву мунил тIалавшиннарду цIубутIуйра кьянкьа къадаврийнугу.
КIулшиву дулаврил управлениялул каялувчи Явсупа ХIамзаевлул кIицI лавгуна гьашину ЕГЭ-лул чулухуннайсса къулагъас ххи даву, мунил тIалавшиннарду кьянкьа даву цува хъинчулий ккак­лай ушиву, хIатта миннул хIасиллу хьхьарасса хьуну, цува жаваблувшиннарайн кIункIу арчагума.
— Цанчирча так кьянкьасса ялув бацIаву духьурчанни жулва оьрчIал дуккаврихсса къулагъас ххи дан бансса чаран лякъинтIисса, — увкуна ванал.
ЕГЭ-лул хIакъиравусса цала-цала пикрирду бувсуна Гъумучиял лицейрал директор МахIаммад Хъунбуттаевлул, Щардал школалул директор Ибрагьим Ибрагьимовлул, Кьубиял школалул директор Муса Братиловлул, Гъумучиял оьрчIал магьирлугърал школалул директор Лида Кьурбановал.