Оьрмулуву чансса хьунакъабакьай ишру инсантурал куннайн куннал сси-къащи, къаччанбикIавуртту хьусса, ссивцIу багьсса. Амма ци зарал цанма барчагу, кьисас ласлай цама оьрмулуцIа ан щихьчIав ихтияр дакъассар. Цама оьрмулуцIа увну инсаннал цайнма лавсъсса бунагь ссалчIав къашюшайссар.

2013 шинал август зурул 23-нний МахIачкъалаллал Ленинский райондалул судрал цала куяв ивкIусса жагьилсса адаминан танмихI кьувкьунни. Му иш укун хьуну бур:
— Март зуруй Г.С. Сухановлул ссивцIу багьсса цала ссил адамина С.Н. Люляков чIиллу щуну ивкIуну ур. Вайннал дянив ссивцIу багьну бивкIун бур С.Н. Люляков Сухановлул ссияту личIи хьуну махъ. Судрал заседаниялул чIалачIи бунни, оьрмулул 22 шинаву цыган Люляковлул бувцуну бивкIшиву мува миллатраясса Алена тIисса душ – Сухановлул ссу. 2011 шинал ахирданий С.Н. Люляков телефон дарцуну дуснакь увну ивкIун ур. Му дуснакьраву усса чIумал щарссанил Аленал мунах цукунчIавсса къулагъас къадурну дур ва муная рухсат бакъана цила нитти-буттачIан ливхъун бур. Цыганнал аьдатирттайн бувну, му дащуй бишайсса иширан ккаллиссар. Мунийн бувну, дуснакьрава уккайхту Люляковлул, Сухановлул ссиятугу личIи хьуну, бувцуну бур Н.П. Иванова. Мунияту Сухановлул ва Люляковлул дянив ччя-ччяни рагьавуртту хъанан диркIун дур. Ца мукунсса рагьаву бияврийн кIурадарну, Сухановлул Люляковлуйн ацIийлаксса чIила щуну дур.
Судрал заседание нанисса чIумал Г.С. Сухановлул цайва тахсир хьушиву, бачIи-кьачIи, бакIрайн лавсунни. Мунал бувсунни С.Н. Люляковлул лув увтун цува атлай ивкIшиву, яла цалла чIила дурккун щушиву мунайн ца-кIилла. Сухановлул бувсунни Люляковлуйн ивчIанна тIий къарщушиву чIила, цува къааттаншиврул щушиву. Амма тахсир ккаклакиминнаща исват бан бювхъунни Сухановлул тIутIимур къатIайласса бушиву. Миннал щялушиврий бацIан бунни защиталул хIуччардугу.
Судрал заседаниялий Сухановлул, цайва тахсир хьушиву кIулну буна, Люляковлул гъанссаннахь ялтту бучIияра къаувкунни. Ванал ятин унни цала ссил оьрчI. Люляковлул гъан-маччанал тавакъю бунни судрахь тахсиркарнан кьянкьасса танмихI кьукьаву. Суд­рал, тахсир ккаклакиминнал хIуччардугу хIисавравун лавсун, Сухановлуй ивчIанна тIий инсан ивкIушиврий тахсир ккавккунни (ч.1. ст.105 УК РФ). Тахсир хьуманал цайва тахсир хьушиву, бачIи-кьачIи, бакIрайн ласаву ва мунал чIивисса оьрчI бушиву хIисавравун лавсун (вагу танмихI куклу байсса хIуччар), тахсир кIу буллали­сса хIуччардугу бакъашиврийн бувну, мукунма зарал бивминнал тIутIимургу хIисавравун лавсун, судрал хIукму бунни тахсир хьума 10 шинай дуснакь ансса, му кьянкьасса низам дусса колониялий итансса. Лахъисса чIумуй щяикIансса танмихI кьукьирчагу, Г.С. Суханов та-унугу укканссар дуснакьрава, банссар кулпат, бутланссар гихунмай оьрму. Ванал оьрмулуцIа увсса С.Н. Люляковлун тIурча дуниял духларгунни.
К.А. Хавчаев, МахIачкъалаллал Ленинский райондалул прокурорнал
кумагчи
ХIадур дурссар А. Аьбдуллаевал