Новостройрайсса ЦIуссаккуллал шяравасса ца махIлалул жямат, Кьурбан-байрандалул хьхьичI гьантрай, банмур бухлавгун ливчIун бивкIссар, махIлалул ттукIрал къурши пIякь увкуну. Укун махIлардай ттукI бакъа ливчIсса, хаснува ЦIуссаккуллал шяраву, ца-цагу гьантри шайссар. ЦIуминалий ттукI булаврил тагьар хъинну чарагьат хьуну цимигу шинни.

Му тагьарданий ва махIлалул ттукIрал къурши, «мачI дизавай, дуцавай», цукун-бунугу кIункIу буллай, цимигу шин ларгссар. Шиккусса жямат инжит буллай бивкIссар, бумур чIумалгу ттукIрал гуж биял къахъанай, цимурца техника ччучлай. Махъва-махъгу, щалава пIякь увкуну, мукьра кьини ттукI бакъа ливчIун бивкIссар. ТтукIрал къурши тIурча, чара бакъа, цIусса ласун аьркинну бивкIссар. Ва ишираву кумаг бувсса Аьлиев Аьлин – Райондалул Мажлисрал депутат, цIуминалийсса къатри дуллали­сса идаралул зузалан, хъунмасса барчаллагь баян буллай буру ЦIуссаккуллал жяматрал чулуха. Цайва бурж бакъанува, жяматран кумаг буван хьхьичIунай хьу­сса, хаснува Кьурбан-байрандалул гьантрай, ванан Аллагьнал чулуха хъунмасса чири чIа тIий буру.
ЧIун зия къадурну, арцул щаллу бувну, тIайла бувккуна зузалт цIусса ттукIрал къуршилул хъирив. Цуппагу хьхьичIвамунияр даражалул лавайсса (250 КВт), 500 азарда къуруш багьлунсса.
Гава кьини экьибувтун бухмургу, цIусса къурши бацIан бувна, кIилчинмур кьинилул ахттайн бизаннин жямат ттукIрал щаллу бувна.
Хъинну хъунмасса барчаллагь тIий бушиву кказитрайхчIил баян бувара тIий миннат буллай бия га махIлалул жямат.
Аьлий, вин гьарца чулуха дуниял тIитIиннав, тIайлабацIу чан къабаннав!
Хъунмасса барчаллагь!
Татьяна Айгунова