Ваччав, ЧIяв, Хъюйн щин дуцлацисса давурттив дайдишаврия жу цакьнивагу бувсъссия кказит буккултрахь. Вай давурттив ссайн дирну дурив кIул дуван, на уттигъанну хьунаавкьуссияв Ккуллал райондалул муниципал сакиншиннарачIасса, ЖКХ-лул, архитектуралул ва гьанусса строительствалул отделданул хъунама Оьмаев Кьурбан Шихшаевичлущал.
ХIажимурад ХIусайнов
— Щин дуцлацисса давурттив дуллай дур кIира организация. Неххай дуллалими давурттив дуллай дур ООО «АРЭМ» организация. Ва цурдагу дур Къарабудахккантуллал райондалиясса. Вай буллай бур Хъуннеххай щин лицIан дувайсса хIавз. Ванил утташиву дуссар 12 метра, лахъишиву – 75 метра. ЧIаравва дуллай буссар щин лирцIуну махъ, гивусса инсаннан зарал буван бюхъайсса затру литIун дувайсса кIану. Буссар гиккува кIира насос дишинсса станциягу. Гай насосирттал ца ссятрал мутталий 328 кубометра щинал кьюч дуван бюхъайссар. Шиккува буссар 600 тонна лагайсса кIива марцIсса щинал хIавзгу. Шивар насосирттал щин Ваччиял шяраваллил кьабакIраву бивхьусса хъуни кьаллавун дачин дуллантIиссагу. КIай муххал кьаллу буссар кIива, ца-цаннивун 1000 тонна щинал лагайсса. Муххал кьаллу буллай дуссар ООО «ССС» тIисса МахIачкъалалиясса «Спецмонтажстрой» организация. МарцI дурну махъ хIавзирдавату кIийн муххал кьаллавун щин кьюч дуллантIиссар муххал диаметр 159-мм дусса турбардавух. Вай давурттив дурну махъ шаннагу шяравун дуцинтIиссар щин цIусса турбардавух, — буслай ур ва.
На лавгссияв Кьурбан Шихшаевичлущал давуртту дуллалисса кIанттайнгу. Гилу Хъуннеххай дуллалисса давурттал сайки дачIи дурну дия. КIий Ваччиял шяраваллил кьабакIравусса муххал кьаллугу бацIан бувну, мадарасса давурттив дурну дия кIиккугу. Га кьини (30-мур сентябрь) вай давурттив дуллалисса кIанттурдай зузисса цучIав акъая. На буллусса суалданун жаваб дуллай, Кьурбан Шихшаевичлул увкуна:
— ХIатта гьашину ккаккан дурсса арцу ххишаласса диркIхьурчагу вания тихунмайгу зунсса, ми цилла чIумал къадуллалаврийн бувну, чIумуйнусса давурттив дацIан дурссар, — куна.
Укун лябуккулий зузисса пишакартал бигьалаглай хъунмасса хIал хьун къабивтун, вайннан зунсса арцу итадакьинссар Дагъусттаннал ХIукуматрал тIисса умуд бур. Ккуллал райондалий вай давурттив социал проектирттавату хъинну агьамсса духьувкун, вайннух ябитаву дуван бучIия цIуну ивтсса Дагъусттаннал Президентнангу. 2-мур ЦIувкIрав Ккуллал райондалул жяматращал хьунаакьин увкIсса чIумал, Рамазан АьвдуллатIиповлул увкунахха: «Дуллалисса давурттал чIарав ацIанна», — куну. Вана дучIавай чIун чIарав ацIаву ккаккан дувансса. Гания гихуннайми давурттурив строительтурал пишакартурал дуван тIий дур.
