Ахъушиял райондалий­сса Уручрав вай гьантрай хьунни республикалул жагьилтурал дянивсса аьралиспортрал бяст-ччаллил тIуркIурду. Миннул сиптачитал бур армейский рукопашный бойрал Федерация, Жагьилтурал иширтталсса буллалисса комитетрал, патриот ва граждан тарбия дулаврил республикалул центр.Армейский рукопашный бойрал Федерациялул Президент Аскерхан ХIасановлул тIийкун, уку-укунсса бяст-ччаллил тIуркIурдал жагьилтуравун спотрахун машхул хьунсса гъира бутлатиссар, армиялий къуллугъ баврил ва гужирдал структурарду зузаврил сий гьаз дуллалиссар. Бяст-ччаллаву гьурттушинна дурну дур Дагъусттаннал шагьрурдаясса ва районнаясса командарттал. Миннувух дур Каспийск шагьрулиясса «Черные береты», МахIачкъалалиясса «Краповый берет», Ахъушатусса «Фортуна», Сергокъалалиясса «Спарта» ва цаймигу.
АцIния ххюра шинава кьуния цара шинавун бияннинсса, ттуршунниха ливчусса жагьил гьуртту хьуну ур конкурсраву. Бяст-ччаллил тIуркIурдугу жура-журасса бур: каруннай бияву, пейнтбол, регби, футбол, лечаву ва цаймигу.
ХьхьичIунсса кIанттурду бувгьуминнан буллуну бур хасъсса дипломру.
П. Рамазанова