Июль зурул 29-нний ХIуку­матрал хъунаманал цалчинма хъиривчу Анатолий Карибовлул культуралул министерствалул цIусса хъунаману Зарема Буттаева цIакь бувшиву баян бунни министерствалул коллективран.
Микку гьурттушинна дунни хьхьичIва кIицI лавгсса министерствалий каялувшиву дуллай бивкIсса Зумруд Сулаймановалгу.
«Зумруд Запировна мунил цилва хIасул бувсса музейрал хъунмамур зун наниссар, — увкунни А. Карибовлул. – Мунил хъунмасса бутIа бивхьуссар Дагъусттаннал культура хьхьичIуннай давриву. Мунил сипталийн бувну хIасул бувссар «Музей-заповедник», «Дагестанский аул» этнографиялул комплекс, хъунмасса захIмат бивхьу­ссар дагъусттаннал театрдал ва личIи-личIисса коллективрдал даву гьаз давриву».
Зумруд Сулаймановалгу дакIнихтунусса барчаллагь увкуна вице-премьернахьгу, коллективрахьгу. ЦIуну министрну бивтсса Зарема Буттаеван давриву ва оьрмулуву тIайлабацIу, хьхьичIуннайшивуртту чIа увкуна. Зарема Буттаевалгу Зумруд Сулаймановахьгу, цуппа ххарину кьамул бувсса коллективрахьгу барчаллагь тIий, махъ буллуна республикалий культуралул даву хьхьичIуннай хьун дуваву мурад­рай чялишну зун.

Зарема Буттаева бувну бур 1971 шинал МахIачкъалалив. 1996 шинал къуртал бувну бур Астраханнал паччахIлугърал консерватория.
ЗахIматрал оьрму байбивхьуну бур 1993 шинал Ма­хIачкъалаллал музыкалул училищалул преподавательну зий.
1998 шинал бивтун бур «Дагестан» ГТРК-лул хъунама редакторну. 2007 шинал ДР-лийсса Аьрасатнал УФМС-рал хъунама специалист – экспертну.
2013 шинал февраль зуруй бивтун бур ДР-лул культуралул министрнал хъиривчуну.
2013 шинал июль зуруй бивтун бур ДР-лул культуралул министрну.
Дагъусттан Республикалул культуралул лайкь хьусса зузала бур, Дагъусттаннал Президентнал цIа чирчусса каний дахIай ссятран лайкь хьуну бур.
Филологиялул элмурдал кандидат бур.

ДакIнихтуну барча буллай буру Зарема Буттаевал ва къуллугъ. Уттинингу цуппа Дагъусттаннал тарихгу, культурагу хъинну кIулсса, ххигу-ххирасса журналист, аьлимчу бушиву ккаккан бувсса Зарема Буттаевал уттиния тихуннайгу Дагъус­ттаннал культура гьаз дуваву мурадрайсса ххуй-ххуйсса давурттив дуллантIишиврий дакI дарцIуну буру. Ххарину буру жулва лакку душнил аькьлу-гьунарданий ябавцIуну, мунийн укун хъунмасса къуллугъ вихшала бувнутIий республикалул хъуниминнал.
Цуппа му къуллугъран мяйжаннугу лайкьсса бушиву Зарема Ажуевнал иширттайну, давурттайну ккаккан буванссар тIисса умудрай буру.
«Илчилул» редакция