Ларгсса нюжмардий Лакрал театрданул сахIналий хьунни испаннал драматург Алехандро Касонал чивчусса «Махъра-махъсса кьинигу…» тIисса пашмансса комедиялул премьера.
Залму АьбдурахIманова
Цаппара номердал хьхьичI премьералул хьунийн Дагъусттаннал лайкь хьусса артист, комедиялул режиссер Аслан МахIаммадовлущал дурсса интервьюраву увкусса куццуй пьеса бия психологиялул чулуха мяъна-мурадрал куртIсса, цIанагу агьамшиву хъуннасса, инсаннал дакIнинсса дармандалух луглагисса.
Лакрал театрданул артистурал гьунардан театрданул магьирлугърал пишакартурал ва тамашачитурал цакьнива бивщуссар лахъсса кьимат. Бивщунугу кIицI лаган ччива агьамсса, хъунисса роллу дургьусса артистурацIун комедиялуву чIири-хъунсса роллу дургьусса артистуралгу усттарну, пишакарну дургьушиву цалла роллу.
Хеновева амудадал роль дургьуну бия, Дагъусттаннал лайкь хьусса артистка, Жинасат ДинмахIаммадова ва ванил лас сеньор Бальбоал роль дургьуну ия, Дагъусттаннал лайкь хьусса артист, ХIажиаьли ХIажиаьлиев. Вайннал арснал арсшиву дурсса Маурисиол роль дургьуну ия театрданул жагьилсса артист Гурам Гаргацев ва чIумуйну ванал кулпат хьусса Марта Изабеллал роль дургьуну бия Мариян Аьлиева. ХIакьинусса оьхIалсса заманалул щатIал лавсъсса, Хеновевал ва Бальбоал мяйжаннугусса арснал арснал роль дургьуну ия, цалла даврил цIакьсса минахур, гьунар бусса Аслан МахIаммадов. Режиссернал увкусса куццуй артистуран захIматсса, гьарцагу махъ дакIнивух итабакьаву тIалав буллалисса роллу дия. Усттарну цалла роллу щаллу дурсса артистуран хьунадаркьусса захIматшивуртту тамашачитуран щуркIаллагу къархьуна. Сюжетрал чулуха комедия бия авадансса, асардал вибувцIусса, артистурал монологру мяъналул яргсса ва куртIсса. Бусанна чан-кьансса ваниягу.
ЧIярусса шиннардил хьхьичI къавкъиншиврухун агьсса, картардай уклай хъунисса буржирдалун агьну, баларду бакIрайн бувцусса цала арснал арс уккан ан багьну бия сеньор Бальбоан. Му кьининия тихунмай вайннал ужагъ пахъ багьну, ссалкIуй дакIру ххари къахъанахъи хьуну бур. Сеньор Бальбоа хъисгу пашманну акъар мукунсса арснал арснацIа шаврия, амма му хъинну цалла щарсса Хеновевал буруккинттарай ур. Му дур Маурисиол дардирдай хьхьугу-кьинигу. Бальбоан пикри хьуну бур щарссанил дакI чанссарагу ххари дан арснал арснаятур тIий, хъинну-ххуйну ура тIисса чагъарду чичлан. Маурисиогу усса ур Канаданаву гара цалла дургьусса туралийн хаиншиву къадурну. Утти му тиха цалва иширттай къари-къужлул ялун най уна, му нанисса жами бювкьун бур. Сеньор Бальбоан дакIнийн багьну бур му акъа-къатIа хьушивугу кьюлтI бувну, ихIсандалул бюрорайн лавгун, ца нюжмардийсса арснал арс ва мунал кулпат бувкIсса куннасса тагьар хIасул дан. Цалла щарссанил Хеновевал хияллу щаллу бансса мурадрай. КутIану бусан, ихIсандалул бюрорай икьрал дурсса, дакIурдиву цIимигу, дакIцIуцIавугу, инсаншивугу дусса жагьил ва душ цала хIакьсса оьрчIру кунма ххира хъанай бур къарин ва къужлун. Укун цанная ца рязину, арснал арсгу ккавккун му махъунай тIайла уккан хIадур хъанахъисса хIалатраву цакуну сагъ-саламатну, къатта бавххуну буржру лахъансса арцул заллу хьун тамахIрай ялун увкIсса къавкъинсса арснал арснал дардирал ахиргу Хеновева амудада ахиратрал хъанай дур. Комедиялул сюжетгу ишла дурну, тамашачи уцлай ур чил дардирал чIарах мауккара, чIаравнал ялун кьини дуркни баччибакъулшиву мадувара, вийрагу таратагу гара кьини дацIан бюхъайссар тIисса кIанттурдачIан.
ТIутIал кацIурдищал тамашачитурал щапI куну бувцIуну бия ва хьхьуну театрданул залгу, чIявуя миннавух жагьи-жугьулт ва мюрщултгу. КомедиялуцIун бавхIусса хияллу дузрайн букканнав тIий тIайлабацIу чIа тIий бура миллатрал театрданун ва укун лахъсса даражалул произведенияртту бихьлансса каши-кьудрат ва миннул мяъна-мурад лаласун кIулсса жула ялун нанисса жагьилмур ник.
