Гара кьини Дагъусттаннал бакIчи Рамазан Аьб­дуллатIипов ва АьФ-лул шяраваллил хозяйствалул министр Николай Федеров лавгунни Гергебиллал райондалийсса КIикIуниннал консерварттал заводрайн. КIа предприятиялий дуккан дайссар кьунияхъайсса журардал консервартту.
Заводрай дуккан дайссар мукунна томатрал, ахъвазандалул, гьивчул сокругу, туртгу.
Заводрай федерал министр­нан ккаккан дунни ттизаманнул венгриянал ва германиянал технологиялул кьай-кьуй. Завод­рал каялувчи М. Шайховлул мукъурттийн бувну, модернизация дурну махъ заводрай дуккан дуллантIиссар шинай 10 миллион банкардал. Проектрал багьа бур 651,6 млн. къурушир­ттал, га проект ишакаш дурукун ялунгу дузал хьунтIиссар 300 зузи кIану.
«Умуд бишинну цIусса проект ишакаш дурукун Аьрасатнал рынокрай чIярусса конкуренция духIан бюхъайсса продукция хIасул хьуншиврийн. Предприятиялуща му даву бакIуйн ду­ккан дан бюхъанссар», — увкунни Николай Федоровлул.
Муния махъ Гергебиллал райадминистрациялул къатраву хьунни республикалул зунттал чулий багъру ва консерварттал промышленность лядуккан даврил хIакъиравусса совещание.
Республикалул бакIчинал увкусса куццуй, хъуннасса агьамшиву дур ва бутIувусса захIматшивуртту кIицI даврияр ххишала, ми духлаган дан­сса чараннугу лякъавриву, Да­гъусттаннал шяраваллил хозяйствалул бакIлахъия Аьрасатнал рынокрайн дакъасса, дунияллул билаятирттал рынокрайнгу ду­ккан даншиврул.
Цалвамур ихтилатраву Николай Федоровлул бувсунни Дагъусттаннал тамансса кумаг буллай бушиву шяраваллил хозяйство хьхьичIуннай хъит учин даншиврул. Ганал тавакъю бунни кьамул дурсса программартту чялишну ишакаш дуллан.
Совещаниялий ДР-лул ХIукуматрал Председательнал хъиривчу Шарип Шариповлул бувсунни зунттаву багъру баврил ва консерварттал промышленностьрал иширттая. Ганал бувсмунийн бувну, 1991 шинал рынокрал экономикалийн бувкIун багъру баврил хозяйствартту лирну дия.
Мунияту кьамул дурну дур «Развитие садоводства в Респуб­лике Дагестан 2011-2016 годы» тIисса республикалул программа. Тикку ккаккан бувну бур 2016 шинайннин цIусса багъру бугьан 6,2 азарда гектарданий (зунттал зоналий – 4,4 азарда гектарданий). Кьамул дурну дур «Развитие пищевой и перерабатывающей промышленности в Республике Дагестан на 2011-2020 годы» тIисса республикалул программа. Га ишакаш даншиврул федерал бюджетравату итадаркьуну дур 91,2 млн. къуруширттал. Зий бур цаймигу инвестициярдал проектирдаха.
2012 шинал Дагъусттаннай бувну бур 1700 гектарданийсса багъру.
Шарип Шариповлул бувсунни мукунна му давриву хьхьи­чIун дагьлагьисса захI­матшивурттаягу.
Совещаниялул хIасиллу дуллай, Аьрасатнал Минсельхозрал бакIчинал бувсунни мукунма багъирдавасса ахъулсса машай дуккан дансса ххуллурдаятугу.
Дагъусттаннал бакIчинал бувсунни зун аьркинну бушиву чялишну. «Социализм утти дакъар. Аьркинни яхъанан рынокрал экономикалул тагьардануву, конкуренциягу духIлай. Дур чIярусса паччахIлугърал программартту, миннувух Да­гъусттан сивсуну гьуртту хъанай бакъар. Микку дахханашиву дуван аьркинни. Жува ккаккан барду республика кризисрава дуккан даврил чаран хъанахъишиву агропромышленностьрал бутIа лябуккан баву. Мунийн бувну шяраваллил хозяйство цIусса шачIанттуйн диян дан аьркинни», — увкунни ДР-лул Пре­зидентнал.
ХIадур бувссар ХI. Аьдиловлул