Мажлис бачин бувну бия му организациялул зузала Раисат ХIусманова. Ванил бувсунни цалва идаралул даврия, я нину, я ппу бакъа, цанма цивппалу ва дунияллий ливчIсса оьрчIан цалва буллалисса кумаграя, чIаравбацIаврия, миннал ихтиярду дуруччавриву, ми давурттал щаллу бавриву цалла дуллалисса давурттая, уттинин мукунсса оьрчIан буллушиву 60 квартира.
«Зу зувалу бакъассару, зу цинявппагу цава цассару, жугу зущал буссару», — увкунни Раисат МахIаммадовнал.

Бадрижамал Аьлиева
Жагьилтурал чIарав бацIан бувкIун бия республикалул балайчиталгу, миннавух ия гьунар бусса балайчи ва Лакрал театрданул артист Аьбдул Мурадовгу. Вайннал тIутIисса хъин-хъинсса балайрдахун къавтIун бизлай бия жагьилтал, хIатта хьхьичIппурттуву лякIлай, си­къаслай бивкIнугу. Залдануву щябивкIсса хъамигу бия куннихь кув: «Вай личIи-личIисса детдомирттавасса бухьувкун, сикъаслай, хIала къабухлай бур», тIий. Ятинтурал дакIрурив, туну, укуннарагу кIюласса дикIайхха. Чан-чанну тIий, хIала бухлай, тяхъа буклай бия оьрчIру. Мукун, хьхьичIунну гьуртту хъанай бия дуллалисса личIи-личIисса конкурсирдавух, бяст-ччаллавух. Мирив ва кьини къачансса дия.

Ва шадлугъ хIадур дуван кабакьу бувну бия хъаннил клубрал члентурал, «РусГидро» ОАО-лул, Республикалул Налогирттал инспекциялул ва мукунма цайминналгу. Цалла цIарду бувсун къаччисса спонсортурал дурну дия жагьилтурансса бахшишру.
Шиккува дакIнийн бутан, Москавуллал культуралул «Дагестан» центрданул соучредитель, ДР-лул Жяматийсса палаталул III созыврал член МахIаммад Аьбдулхабировлул сипталийну сакин дурсса «Дагестан без сирот» суккушиннарал сайки гьарца байрандалийн дуллай бур укунсса батIавуртту. Цува МахIаммад Аьбдулхабировгу, Сириянаву ялапар хъанахъисса цала дус, хIакин Аьли Дагестанищал, ятинтуран шайсса ка-кумаг буллай ур.
Шанна шинал дянив детдомирттал выпускниктуран, «Забота» интернатран, Дом ребенкалун, чил оьрчIру тарбия буллалисса ва ахIвал-хIал кIюласса кулпатирттан бувну бур 3 миллиондалия лирчусса арцунсса кумагру.
Гьарца шинал ЦIусса шинал байрандалий ва ОьрчIру буруччаврил кьини дуллай бур ихIсаниятрал акциярду. Гьарца шинал декабрьданул 3-нний ятинсса мушакъатсса оьрчIан дуллай бур Оьруснал ва Лакрал театрдал артистурал гьурттушиннарайсса байранну. Гьарца зуруй ятинтал бигьалаган бияй­сса бур «Амилэнд» оьрчIансса центрданувун («детский городок»). Ва суккушиннарал щаллу дуллалисса программарду чIярур: «Молодая мама», «Школа жизни», «Молодые таланты Дагестана», «Дорога к счастью», «Учись учиться» ва м.ц. Масалдаран, «Молодая мама» программалийн бувну, детдомирттал выпускницахъан ва ятинсса ниттихъан тIивтIуну бусса бур социал гостиница, ми душру интернатирттая махъсса цайнува цивппасса оьрмулийн аьдат шавриву кумаг буллалисса. Микку душваран лахьхьин буллай бусса бур ичIаллил давур­ттив дуллан, дукрарду дуллан, янна дуруххан, медициналул цалчинсса кумаг буван. «Я учусь зарабатывать» программалийн бувну, детдомирттал 17 выпускник даврил щаллу увну ур, миннавагу – 6 мушакъатсса оьрчI. Закондалийн дурну багьайсса, амма, личIи-личIийсса багьанттайн бувну, къадуллуну диркIсса 1 160 000 къуруш 6 ятинсса студентнан дуллунну дур. Гьарца шинах ятинсса оьрчIру бигьалаган гьан бувайсса бур пионертурал лагерьдайн ва Кисловодск, Нальчик шагьрурдал санаториярдайн. Вайннал дуллалисса давурттив цаймигу чIярур.
Жущавагурив, укун хъуни-хъунисса давурттив дуван къахьурчагу, жущава шайссакссавагу кумаг буван хьунссар личIи-личIийсса багьанттайн бувну ятинталну ливчIсса оьрчIан, цинявппагу цачIун хьуну, чан­ссавагу бигьа буван ятинтурал оьрму:
1. Зуща бюхъантIиссар *ДЕТИ тIисса смс-текст гьан буван 3533 номерданий – 10 къуруш ягу мува текст 3833 номерданийн гьан буван – 20 къуруш.
2. Зущава буван шайсса ка-кумаграл хIакъираву оьвчин бюхъантIиссар вай номердайн:
3. 8-988-293-50-64 – Раисат ХIусманова;
8-928-556-72-37 – Светлана Аьлиева;
8-988-448-96-70 – Жяъпар ХIажиев;
8-964-051-36-63 – Умужат АхIмадова.

Ятинтуран кумаг бувансса цаймигу кьяйдардая кIул буван бюхъантIиссар ва суккушиннарал сайтрай:
www.dagestanbezsirot.ru