ДачIишинай къалехлайгу диркIун авиаперевозчиктурал рынокрайн дурккун дур RED WINGS авиакомпания. Ларгсса нюжмар кьини июльданул 12-нний МахIачкъалаллал международный аэропортрай хьуну бур ва авиакомпаниялул цалчинмур рейс. Укунсса иш жулла республикалий шаврих ва авиабилетирттал багьри лагь хьуншиврийн, самолетру леххаврил тагьар къулай хьуншиврийн умуд бивхьуну ссавур дакъа ялугьлай бивкIссар ца пассажиртал бакъассагу, цурда аэропортрал каялувшиннагу.
Ца шинал хьхьичIва куна авиакомпаниялущал кIул бан ва рейсирай республикалийн увкIун ур генеральный директорнал хъиривчу Бушков Леонид Николаевич.
-Цаппара хIаллай къалехлайгу диркIун, жу авиакомпаниялул «Махачкала-Москва, Москва-Махачкала» маршрутрай па­ссажиртал ххилаххисса программа цIулаган дарду. Утти гьарца кьини МахIачкъалалия 20.30 ссятраву самолет лехлантIиссар, Внуковалий 21.10 минутраву щядикIлансса куццуй. Рейсру дузал буллантIиссар жучIара итадакьлакьисса уттизаманнул Ту-204 самолетирттал. Вай самолетру царагу чулуха чил хIукуматирттал самолетирттаяр къаоьккиссар. Жул паркравусса ца яла духмур самолетран 13 шинни, вайминнун яла шанна, шанна ва дачIи хъанай дур.
ХIакьинусса кьини жул компаниялун ца яла агьаммур суалну чIалай бур тарифирттал политикалулмур суал. Жу хъунмасса хIарачат буллай буру пассажиртал жуятува ххиен къабивтун, ми жучIанма кIункIу бан. Мунияту хIакьинусса кьини «Махачкала-Москва» маршрутрайнсса авиабилетирттал багьри 6000-25000 къуруширттайн бияннинсса буссар. Вания гихунмайгу тагьарданух бурувгун ва перевозкардал рынок­рах бурувгун, вай багьри баххана хьун бюхъайссар.
ЦIана тIурча, жул агьаммур мурад Дагъусттаннал гьарцагу инсаннаща ласун бюхъайсса авиабилетирттал тарифру цIакь бавур», тIий ур Леонид Бушков.
Мукунма ванал кIицI лавгунни авиакомпаниялул цIуну ивтсса каялувчи авиациялувун утти­гъанну увкIсса инсан акъашиву. Ва усса ур чIярусса шинну авиациялуву зий гьан дурсса, мадара хIаллай инженерно-авиациялул комплексрал каялувчишиву дурсса, Санкт-Петербурграйсса Аэрофлотрал вакилханалул генеральный директоршиву дурсса инсан.
«Республикалул бакIдур­гьуминнал ва авиакомпаниялул каялувшинналул дянивсса нахIу-хIаласса арарду савав хьуссар Дагъусттаннайнсса жул цалчинсса рейсру lангу», ххи буллай ур Л.Бушков.
Самолетрава рейсирая рязину ливксса пассажиртурал симанналгу, вайннал тIутIимунилгу ва кьини тасттикь буллай бия авиакомпаниялул вакилнал кIицI лавгмур.
ЧIа тIий буру авиакомпаниялул зузалтрангу, вайннал пассажиртурангу вания гихуннай някIсса, чаннасса ссав ва тIайлабацIусса аьрххи-ххуллурду!