ЦIуминалийгу мизит бунни

otto_15Июнь зурул 7-нний Новостройрайсса ЦIуссалакрал шяраву цIусса мизит тIитIлатIисса хъуннасса шадлугъ хьунни. Му чирилул даву дансса харжлугъ цала бакIрайн ларсун дур Дагъус­ттаннал чулухасса Федерациялул Советрал член, цIадурксса предприниматель Сулайман Керимовлул.
Жяматран хIукму хьунни цIуну тIивтIусса мизитран машгьурсса аьлимчу, Дагъусттаннал ва Аьрасатнал диндалул, политикалул ишккакку Сайпуллагь-Кьади Башларовлул цIа дулун. Мизит тIитIлатIисса мажлисрай гьуртту хьунни Дагъусттаннал Духовное управлениялул вакилтал, диндалул аьлимтал, Джума мизитрал ва Лакрал, Ккуллал, ЦIуссалакрал мизитирттал имамтал, ДР-лул ХIукуматрал вакилтал ва цаймигу бусравсса хъамал.

А. Аьбдуллаева
П. Рамазанова
Мажлис тIитIлай, ихтилат бунни МахIачкъалаллал Хъун мизитрал имам МахIаммад-расул Саадуевлул. Гихунмай мажлис бачин бувмагу ва ия.
МахIаммадрасул Саадуевлул барчаллагь увкунни укун­сса Аллагь­нал къатри тIитIлай, жучIара дин, иман, инсап цIакь хьун кабакьу буллалисса Сулайман Керимовлухь. Мунал ихтилат къуртал хьуну махъ дурккунни мавлуд.
Хъирив жямат ва ххарисса иширащал барча буллалисса ихтилатру бунни Дагъусттаннал муфтийнал хъиривчу ШахIбан-хIажи Рамазановлул, «Нурул-Ислам» кказитрал хъунама редактор МахIаммад ХIажиевлул, муфтийнал кумагчитал МухIаммад-хIажи МухIаммадовлул ва Давуд-хIажи Тумалаевлул, Гъази-Гъумучиял шяраваллил имам МухIаммад-хIажи Саламовлул, Ккуллал райондалул имам Сиражуттин-хIажи Кьурбановлул, МахIачкъалалив вокзалданул чIарав бивхьусса мизитрал имам МухIаммад Муршиевлул ва м.ц.
Ихтилат буллалиминнал кIицI лавгунни хIакьину ва бигьа ба­къасса заманнай мизитирттахь ва мадрасарттахь цуксса бияла буссарив инсантал оьккимуния байщун бан, имандалийн кIункIу бан, дакI марцI дан, пикрирду чанна бан.
Шяраваллил жяматрал цIания ихтилат бунни шяраваллил аксакал НурмахIаммад-хIажи Айдановлул. Ванал барчаллагь увкунни ва мизит бан кумаг буллай бивкIминнахьгу ва хIакьину цалла ххаришиву кIидачIин бувкIминнахьгу. Райондалул жямат барча буллалисса ихтилат бунни мудангу ЦIуссалакрал агьулданул кьинилучIа ацIайсса ДР-лул Президентнал миллатрал политикалул управлениялул хъунама Артур Исрапиловлул. ЦIуссалакрал райондалул бакIчи МахIаммад-хIажи Айдиевлул дакIнийхтунусса барчаллагь увкунни мизит бан кумаг буллай бивкIминнахьгу, ва тIитIлатIисса мажлисрай гьуртту хьун бувкIминнахьгу.
— Ва цIусса мизит цинявппагу бусурман цачIун хьунсса багьана хьуннав, агьалинаву иман-инсап цIакь хьуннав, ЦIуссалакрал аьрщарай барачат ликканнав, — чIа увкунни ванал.
Сайки гьарица ихтилатчи дуаь дуллай ия Сулайман Керимовлуха, ЦIуссалакрал райондалун укунсса багьа бищун къашайсса бахшиш дурну тIий.
Ихтилатру къуртал хьуну махъ бувккунни Кьурандалул аятру ва МухIаммад Идавсил (с.аь.с.) хIадисру. БавчIунни цадакьа. Дунни мавлуд. ЦIуссалакрал шяраву тIивтIусса цIусса мизитрал имам икIантIиссар Дагъусттаннал исламрал университет къуртал бувсса ЦIуссалакрал шяравасса Амиров Давуд-хIажи. Ванал бувсунни мажлисрайн бавтIминнахь Шайх Сайпуллагь-Кьади Башларовлул оьрмулия.
Утти цIуссалакрал цIусса миналийгу буссар Аллагьнал къатта. ЦIуссалакрал агьалинащагу утти бюхъайссар чак бан мизитравун бучIаван.