Ттигу ца журналист оьрмулуцIа унни

Июль зурул 9-нний МахIач­къалалив Журналистурал къатраву хьунни га кьини бивтун увтсса «Новое дело» кказитрал хъунама редакторнал хъиривчу АхIмаднаби АхIмаднабиевлул аьпалун хас дурсса митинг. Муний гьуртту хьунни республикалул печатьрал ва информациялул министр УмархIусман ХIажиев, министрнал хъиривчу Зубайру Зубайруев, ДР-лул Президентнал ва ХIукуматрал пресс-службалул каялувчи МахIаммадбаг АхIмадов, Дагъусттаннал Журналистурал союзрал хъунама Аьли Камалов, «Дагестан» РГВК-лул директор Азнаур Аджиев, «Дагестан» ВГТРК-лул директор Луиза Аьлиханова, респуб­ликалул кказитирттал редактортал ва журналистал, журналистнал дустал, даврил уртакьтал, кIулми.

Зулайхат Тахакьаева
Митинг тIитIлай, Аьли Камаловлул увкуна: «Учинсса махъвагу къаливчIунни. АцIния арулчинну жува хIакьину шиккун оьзрусса иширал ялув батIлатIисса. Ва ацIния арулчинсса журналистри хIакьину жущава зевххусса. Къащи хъанай дур жущава жува буруччин къабюхълахъаврия. КьурчIину бур жуватува ца ттигу яла лагаврия. ЗахIматну бур жущава цичIав баххана бан къабюхълай буну тIий.
ДачIи шинал хьхьичI жува шиккун бавтIун буссияв АхIмаднабинал оьрмулийн кьаст лахIаврил ялув. Тани жува умудрай буссияв тахсиркарталгу лявкъуну, миннан багьайсса танмихI банссар тIий. Амма мукун къавхьунни. Да­гъусттаннай ивкIунни 17 журналист, амма хIакьинусса кьининийнгу дурар царагу дело аьч дан.
Ва иширая цанма баяйхтува ттучIан оьвкунни ДР-лул ХIукуматрал хъунама Мухтар Мажидовлул ва Президентнал администрациялул каялувчи Шахабас Шаховлул, бувсунни хьумур цанма хъинну бювххушиву ва АхIмаднаби ивчIаврил хъирив лаян кабакьу бан хIадурну бушиву. Жувагу ттигу къакьукьинну жула даврил уртакьтал ливтIуми лякъинссар тIисса умуд».
УмархIусман ХIажиевлулгу мукунма кIицI лавгуна цалва гьалмахтал ва коллегахъул литIаврил ялув ва залданувун журналистал цалгу-кIилгу бакъашиву батIлатIисса. Гьарца бавтIтаригу дащуй дихьлай бушиву Дагъусттаннал ялун бучIантIимунил ялув дакI цIуцIисса, цалва пишалийн дакI тIайласса инсантал ливтIусса терактру.
«ХIакьинугу мува иш сававну бавтIру жува шиккун – увтунни ца ттигу жула коллега. Цавай бакьлай бия ганал пикрирдацIун, цавайннан тIурча ганал чичлачимур тIааьн бизлай бакъая. Амма щихькIуй дакъассар ихтияр инсан, ганал хIуччардай дакI къадакьлай дурча куну, бивтун утланccа. Бур инсантал Дагъусттаннай дакьаву къаччисса. Миннал жула дянива яла чумартми, яла яхIлувми, гьунар ххими зехлай бур. Ччива цумацагу журналист, дагъусттанчу ивкIуми лягу-лявкъуну, ми багьайсса танмихIрайн кIункIу бувну. ХIакьину жулла республикалий, обществалуву ххуйчулийннайсса дахханашивуртту хъанай дур. Амма гьарцагу инсан ивкIусса иширал, терактрал байча щун буллалиссар жува гихунмай хьхьичIунмай шавриву.
ХIакьину жулла республикалий дакьаву хьуну, жулла республика хьхьичIуннай хьуну ччима хьхьичIа-хьхьичI жула Президент Рамазан АьбдуллатIиповри. Мунил ялув га цащава шаймур буллай ур. Жувагу ганан кабакьу буллалимиру. АхIмаднаби оьрмулуцIа аву, так журналистуран дакъассагу, щалла республикалунсса кьурчIишивур», — увкуна ДР-лул печатьрал ва информациялул министрнал.
АхIмаднаби АхIмаднабиевлул хIуччардацIун къабакьлакьисса чIявусса бивкIшиву кIицI лавгуна ДР-лул Президентнал ва ХIукуматрал пресс-службалул каялувчи МахIаммадбаг АхIмадовлулгу. «Амма га ия хъинну итххявхсса, гьунар бусса, жяматийсса иширттаву цалва хIучча бусса инсан. Ттигъанну жу ганащал буссияв жура дан дакIнийсса давурттая ихтилатрай. Га ия республикалий низам дишавриву уртакьну зун хIадурну. Хъинну байлсса бия ганал кьалан. Жува, мяйжаннугу, лайкьсса инсаннацIа, журналистикалуву яргсса личностьрацIа хьуссару. АхIмаднаби бивтун увтшиву цанма баяйхтува Республикалул чIумуйнусса Президентнал низам дуруччай органну буржлув бунни ва иширал хъирив лаян ва дело аьч давриву дурсса давурттая цанма баян буллан. ДР-лул Президентнал администрациягу ва иширал ялув зий буссар», — увкуна ванал.
Митинграй ялагу махъру лавхъуна АхIмаднаби АхIмаднабиевлул хьхьичIунсса дус Сулайман Улладиевлул ва цайминнал.