Июль зурул 9-нний ссят 07.00 хьусса чIумал МахIачкъалалив, цалла къатрая 50 метралул архну, бивтун увтунни «Новое дело» кказитрал хъунама редакторнал хъиривчу АхIмаднаби АхIмаднабиев.

А. Аьбдуллаева
АхIмаднаби АхIмаднабиев оьрмулуцIа увми ялугьлай бивкIун бур ва нанисса машина — арцул рангирайсса «Тайота карола» букканнин Убекинское шоссе ва Б. Мурадовал цIанийсса кIичIираваллал шанбачIулий, «Ашан» ттучандалул чIарав. Му гъан шайхту бивтун бур АхIмаднабиевлул бакIрайн. Мугу бивтун увтун, тахсиркартал ливхъун бур лухIисса рангирал «Приора» машиналий. Журналист усса кIанай къуртал хьуну ур. Ва иш хьусса кIанттай лявкъуну бур 10 гильза ва 2 ккулла. «Перехват» план баян бувну, тахсиркартурах луглай бур.

АхIмаднаби АхIмаднабиев оьрмулуцIа аврил хIакъиравусса ДР-лул Президентнал ва ХIукуматрал пресс-службалул оьвчаву

Июль зурул 9-нний Семендердай бивтун увтунни «Новое дело» кказитрал хъунама редакторнал хъиривчу АхIмаднаби АхIмаднабиев. Аьрасатнал Силистталул комитетрал Дагъусттаннайсса Силистталул управлениялий баян бунни журналист оьрмулуцIа ансса багьанану силистталул ккаклай бушиву ванал даву.
Мубараксса Рамазан барз байбихьлахьисса кьини АхIмаднаби АхIмаднабиев оьрмулуцIа аву – инсаншиврул ва мяърипатрал кьанунну дакъасса, жулла общество хьхьичIуннай шаврийн къарши буклакисса, Дагъусттаннай ва Аьрасатнавусса тагьар оьлукъин дан ччисса инсантурал дурсса тIулли, тIий ур Да­гъусттаннал чIумуйнусса Президент Рамазан АьбдуллатIипов. «Ва лавгмунивасса, Дагъусттаннал оьлувкъусса ва чапалсса чIумува жуйнма бивтсса ккуллар», — увкунни Рамазан АьбдуллатIиповлул.
Дагъусттаннал чIумуйнусса Президентнал республикалул низам дуруччай органнайн тапшур бунни ччясса мутталий ва иширал хъирив лаян ва гьарцагу дурсса давурттая цайнма баян буллан. «Инсан ивкIунан багьайсса танмихI бан аьркинссар», — увкунни Республикалул чIумуйнусса Президентнал.
«ХIакьину ца цIа ттигу ххи хьунни цалва оьрмурдая ка ларсун тархъансса мукъуйнсса, тархъансса прессалийнсса конституциялул ихтиярду дуручлачисса, жулла общество хьхьичIуннай дан хIарачат буллалиминнал дягъулул сияхIраву.
АхIмаднаби АхIмаднабиев ия респуб­ликалийгу, мунил кьатIувгу машгьурсса журналист, цала хIучча бусса инсан, яргсса щихачIав къалавхьхьусса публицист. Ва так ца журналистурал сообществалун дакъассагу, щаллагу республикалунсса кьурчIишивур.
Ва иттарщин дакъасса, кьадарсса тIул дурсса инсантурайн баян буллай ура, щищачIав къахьунтIиссар Да­гъусттан цIулаглагисса ххуллия баччан бан, дагъусттанлувтуравун нигь рутан, гьунттийсса кьинилийнсса вихшала кьукьин дан. ДакIнийхтуну хъуннасса кьурчIишиву кIидачIлай ура АхIмаднаби АхIмаднабиевлул кулпатращал, даврил уртакьтуращал, дустуращал».
ДР-лул Президентнал
ва ХIукуматрал пресс-служба

Дагъусттаннал Печатьрал ва информациялул министерствалул оьвчаву

АхIмаднаби АхIмаднабиевлул цIа ххи хьунни чил канил ливтIусса журналистурал сияхIраву. Машгьурсса журналист ивчIаву хъинну бювххунни Дагъусттаннал обществалун. Дагъус­ттанлувтал низам дуруччай структурардая тIалав буллай бур журналист оьрмулуцIа увми лявкъуну, миннан багьайсса танмихI баву.
Мура тIалавшинна дур Аь. АхIмад­набивлул коллегахъал – дагъусттаннал журналистуралгу.
Дагъусттаннал чIумуйнусса Президент Рамазан АьбдуллатIиповлул дачин дурсса, республика цIудуккан дансса, политикалул общество оьлукъин дан къаних бувкминнансса ххуллу кьукьлай бур. Политиктал, низам дуруччай органнал зузалт, журналистал литIаврийну республикалийсса тагьар оьлу­къин дан­сса миннал мурадру ссайнчIав къабуккантIиссар.
ДакIнийхтуну хъуннасса кьурчIишиву кIидачIлай буру АхIмад­наби АхIмад­на­биевлул гъан-маччацириннащал.