Къари-къужри жулва барачатри

«Ты – не один!» цIанилусса социал акция Аьрасатнал Почталул хьхьичIва-хьхьичI бувну бур 2012 шинал. Му акция Аьрасатнал социал проектирдаву язимунин ккалли бувну бур.Му акциялул лагрулуву, Аьрасатнал Почталул дартIун дур сайки 50 азаруннийн дирсса открыткарду, бахшиширттащалсса посылкарду ва чагъарду. Масалдаран, Къалмукьнал агьалинал дартIун дур оьрмулул бугьараминнал къатри бакьин бувансса арцу, Сахалиннай – бахшишру ласунсса арцу. Коми Республикалулми инсантурал дяъвилул ветерантуран кIинттулнинсса тIама ларсун дур.
Ва акциялувух хьхьичIунну, оьрмулул хъуними бакъасса, гьур­тту хьуну бур дуклаки оьрчIругу. Масалдаран, Рязань, Саратов, Смоленск, Тамбов шагьрурдал дуклаки оьрчIал, кадетътурал, детдомирттал тарбиячитурал цанма кIулвагу бакъасса къари-къужран, дакIнийхтунусса, гъилисса, миннал дакIру дувансса ххаругу чивчуну, гьан дурну дур цалла дурсса яргсса открыткарду, цалла дирхьусса сурат­ру ва цаймигу давурттив.
Ва акциялун чIяру шинну дакъанугу, ва хьунни хъинсса аьдатнугу, хъунмасса миллатрал суккушиннанугу, цилгу чIарав бацIаву дуллалисса оьрмулул бугьарасса цивппалу ливчIсса къари-къужрал. Оьрмулуву цикссагу захIматшивуртту дурхIусса, захIмат бувсса хъунисриннаннив махъа нанисса никирал дурсса бургаву, аякьа чара бакъа аьркинссар, ва тIайладакъашивурттал дурцIусса, оьхIалсса дунияллий цивппалу бакъашиву, иш багьни, цалва чIарав бацIанми бушиву кIулну бикIан аьркинссар.
Ва шинал дартIсса бахшишру ва арцурду къари-къужран дулунтIиссар халкьуннал дянивсса Оьрмулул бугьараминнал кьини, яни октябрьданул 1-нний.
Вай мукьвагу зурул дянив оьр­мулул бугьараминнан кумаг, аякьа дуван ччиманаща бюхъантIиссар жулва билаятрал почталул ччимур отделениялийн бувкIун, чагъар, открытка, бахшишру (арцуйнуссагу) гьан дуван. Ми давурттан хасну, почталул отделениярдай бивхьуну бикIантIиссар къуршив.