Ирсирай нанисса гьунар

koll_8Вай гьантрай Ккурккуллал жяматран Москавлия ххарисса хавар бавунни. Ккурклиясса Санинал душ Зайдиева (Есаян) Рукьижатлул къуртал бунни И.М. Сеченовлул цIанийсса Москавуллал 1-мур медициналул университетрал стоматологиялул факультет ЯтIул дипломрай. Гьунар бусса цала выпускница мусил медальгу дуллуну кьамул бунни шиккувасса интернатуралувун.

Андриана Аьбдуллаева
2008 шинал «Вертикаль» тIисса (№1748) Москавуллал кIулшивуртту дулаврил центргу Рукьижатлул къуртал бувссия мусил медальданий.
Цуппа, Рукьижатлул агьлу-авлад кIулми, ванил медициналул ххуллийсса хьхьичIуннайшивурттая махIаттал къахьунтIиссар, цанчирча ва бур ирсирай нанисса гьунар.
Рукьижатлул ппу Санигу, аьпа баннав цал, хIакинъя, медициналул элмурдал кандидатъя.
Нину Зулайхатгу акушер-гинекологри, лавайсса категориялул хIакинни, медициналул элмурдал кандидатри.
Рукьижатлул буттал нину, медициналул элмурдал доктор, профессор Загьидат Набиевна къакIулсса нажагьссавагу акъахьунссар. Ниттил ппу Сайдун бусса оьрмулий Мос­кавлив зузисса, хъинну цIадурксса аьлимчури. Ва ур медициналул элмурдал доктор, профессор. Ниттил нину ва буттал ппугу аьлимталли, медициналул аралувусса бакъахьурчагу. КьурбанпатIимат филологиялул элмурдал докторди, профессорди. Буттал ппу Зайдилав, аьпа биву, юридий элмурдал кандидатъя.
Загьидатлул ва Зайдилавл душ, Рукьижатлул буттарссу Янсиятгу медициналул элмурдал докторди, профессорди. Гьамин, Рукьижатлул агьлу-авладрай цинявппа бусравсса хIакинтал ва аьлимтал бур. Рукьижатгу кьянкьасса шаттирдай миннал хъирив най бур. Ванил медициналул аралувусса хьхьичIуннайшивурттая жунма ттиния тихунмайгу балланшиврийн щак бакъар. Цинявппагу ккурккуллал цIанияту барча буллай бура Рукьижат дуккавривусса хьхьичIуннайшивурттащал. ЧIа тIий бура талихI-тирхханну, гьарица ишираву тIайлабацIу.