Июль зурул 22-нний «Анжилул» хъунама тренер Гус Хиддинклул клубрал хъуниминнащал хьунаавкьуну, цува хъунама тренернал даврия мурахас увара тIисса аьрза буллунни.
«Анжи» клубрал хъуниминнал мунал мурад щаллу буллай кIицI лавгунни, гьаманки Хиддинк хъунама тренершиву дуллалисса ппурттуву Аьрасатнал Премьер-Лигалуву чарвитул медальлу ларсшиву «Анжилул», клубрал даву хьхьичIуннай шавриву Голландиянал минахурнал хъунмасса бутIа бивхьушиву ва цивппа мунайн барчаллагьрай бушиву.
Гус Хиддинклул увкуна: «На мудангу учайссия, «Анжилущалсса» ттул даву къуртал хьунтIиссар нава аьркин къаагьнува клубрал даву гихуннай гьаз хъанан дикIайхту. Мукунсса чIун дуркIунни цIана. На ххарину ура му хъуннасса футболданул проектрал бутIану навагу ушиврия ва умудрай ура клубрал бучIантIимур ххаллилсса бушиврий».
Клубрал гендиректор Айваз КазиахIмадовлул командалул цIусса хъунама тренер Рене Мёленстеен ивтшиву бувсуна.
ХIадур дурссар П. Рамазановал
