Уттигъанну, май зурул 31-нний, «Новострой» трестрал хьхьичIсса майданнив ларгунни оьрчIру буруччаврил кьинилун хас дурсса хъуннасса шадлугъ.

Шадлугърай гьур­тту хьунни Новостройрайсса ряхва школалул – ЦIуссалакрал, ДучIиннал, Шушиял, ЦIуссаккуллал, Чапаевкаллал ва Аьхъардал дуклаки оьрчIру.

Ва шадлугърал сакиншинначитал хьунни ЦIуссалакрал райондалул Кулпатран ва оьрчIан кумаг баврил центр. Ва центрданул дурсса цумурцагу мероприятие дикIай цила дагьайкун, усттарну хIадур дурсса.
ОьрчIан хас дурсса ва байрангу дия чIюлусса, яргсса, тяхъасса. КIюрххила трестрал къатрал хьхьичIалу чIюлу бувну бия ранг-рангсса шардал. ЧIирттайн лархъун дия оьрчIал дирхьусса суратирттал стендру. КIири буллалисса бургъих къабурувгун, ххарину лечлай бия оьрчIру, мюрщултрая тIайла хьуну хъуниминнайн бияннин. Гьай-гьай, ва дия вайннал байран – ОьрчIру буруччаврил кьини.
ОьрчIан цIуллу-сагъшиву, талихI-тирхханну чIа тIисса бия ва кьинисса ихтилатругу, оьрчIан хас бувсса бия шеърирду ва балайрдугу.
Байрандалущал оьрчIру барча бан бувкIун бия ЦIуссалакрал райондалул хъунаманал хъи­рив­чу Аьли Исрапилов, ЦIу­ссачIурттащиял шяраваллил администратор Юсуп Аьлиев, ЦIуссалакрал КIулшивуртту дулаврил управлениялул методист Мисиду Шахмандарова. Шадлугърал мажлис тIитIлай, ихтилат бунни ЦIуссалакрал райондалул Кулпатран ва оьрчIан кумаг баврил центрданул хъунмур Аьбидат Аьбдуллаевал.
Ванил чIа увкунни оьр­чIан чаннасса, талихI-тир­хханнарайсса оьрму. «Зу цинявппа нитти-буттал дянив хъуни хьуннав. Зун амудадахъулгу чан къабаннав», — увкунни ванил.
Гихунмай шадлугърал мажлис бачин бувну бия центрданул хъунаманал хъиривчу Селминаз ХIасанова.
Ва байран кIицI дуллан хьхьичI школардай оьрчIал дянив баян бувну буссия сочинениярттал ва сурат дишаврил конкурс. Миннува язи дургьусса 15 яла ххуйми сочинениярттал ва 10 суратрал автортуран дунни бахшишру. Амма бахшиш дакъа ва кьини цаягу оьрчI къаивтунни. ОьрчIайх бавчIунни оьрчIи-кIурисса ттупру, кIукIлу игрушкартту.
КIири буллалисса бургъилу щябивкIсса хъунанайхгу, мюрщинайхгу дарчIунни мороженыйрду ва сокру.
ОьрчIал чирчусса сочинениярттавасса бутIри бувккунни Селминаз ХIасановал.
— Жун ччай дур байранну. Ччай бур качелардай бигьлан, футболданий буклан. Къачру жун дяъви. Жун ччай бур паракьатсса, байраннайн буккан нигьачIаву дакъасса оьрму, — чичлай ур Шушиннал школалул 5-мур классрал дуклаки оьрчI Бутта Шамилов.
— Ттун ччива дунияллийсса циняв оьрчIал дадахъулгу, бу­ттахъулгу буну. Дунияллул цавагу мурцIний пIякьучавуртту, битавуртту къахъанай, — тIий ур ЦIуссалакрал школалул 4-мур классрал дуклаки оьрчI М. ХIажиметов.
Вава школалул 4-мур класс­рал дуклаки душ ХIасанова Шахризат чичлай бур, цина уттигъанну аьпалул хьусса бу­тта цуксса ххирасса ивкIссарив. «Ппу-кулпатрал ттарцIри, кулпат буручлачисса къалар», — тIий бур ва.
— Ттул къатта – му чIивисса караматсса билаятри, — тIий бур Аьхъардал школалул 5-мур класс­рал дуклаки душ Б. Аьлие­ва.
— Кулпат – вил къалар, вил къинттар, вил цIакьри. Кулпатраву мудангу куннан кув бувчIлачIаву, нахIу-хIалимшиву, ччаву дикIан аьркинссар, — чичлай бур ЦIуссалакрал школалул 8-мур классрал дуклаки душ Анжела Салманова.
— Ттун къаччива дунияллий ятинтал буну, къаччива аваданми ва мискинми буну. Ттун ччива циняв цакуцну, бавкьуну, ххарину оьрму бутлай, — чичлай ур Аьхъардал школалул 6-мур классрал ученик Камил Раджабов.
— ОьрчIшиву – му дур хъуни хьунгу ччисса, амма мурхьирдайх лахълансса, дустуращал лечлансса гъирагу къалевшсса чIун, — тIий бур Чапаевкаллал школалул 7-мур классрал дуклаки душ Султана Рамазанова.
Укунсса цалва-цалва оьрмулуха лавхьхьусса кулпатраясса оьрчIшивриясса пикрирду чивчуну бур оьрчIал цалла сочинениярттаву. ОьрчIан бахшишру дурну махъ Селминаз ХIасановал центрданул зузалтрал, оьрчIал ва миннал нитти-буттал чулуха хъунмасса барчаллагь увкунни ва байран тIайла дуккан кумаг бувсса спонсортурахь: ДР-лул ХIукуматрал председательнал хъиривчу Шарип Шариповлухь, «Оскар» ттучандалул заллу Гулшан Хасаевахь, Чапаевка шяравусса калпушру бай завод­рал директор Эбадуллагьлухь, Чапаево шяравусса бетондалул заводрал директор Гьарун Аьбдуллаевлухь, ООО «Таис» бетондалул заводрал директор Вара УсттармахIаммадовлухь, «Гостиный дворданул» (гостиницардал комплекс) директор Бадруттин Саламовлухь, Сагид Сагидовлухь (ООО ССС «Частное охранное предприятие», ш. Чапаево), ТIюхчардал шяраваллил администратор Аьли Аьлиевлухь, ЦIуссалакрал райондалул администрациялул хъунаманал хъиривчу Аьли Исрапиловлухь, Гьамиящиял администрациялул хъунаманал хъиривчу ХIабиб Рашидовлухь, Юсуп Хайдакьовлухь (Газпром), райондалул МФЦ-лул директор Руслан Султановлухь, райондалул газрал службалул хъунаманал хъиривчу Аьвдуллагь ХIусмановлухь, райондалул ЦСЗН-лул пишакар Илияс Иллуевлухь, ТIюхчардал шяравасса Увайс Апанниевлухь, Рамазан Айдановлухь (ООО «Протекция»), Новостройрал ЖКХ-лул хъунама Эльдар Надировлухь, Электросетирдал Новостройрайсса отделениялул управляющий Юсуплухь. Ва байрандалий гьуртту хьуминнал цинявннал мукунма барчаллагь увкунни цалла чулуха байрандалийминнан мороженное диян дурсса Мамма Гамматаевлухь, сокирдал дузалшинна дурсса Рамазан ХIасановичлухь ва Камалуттин Кьурбановлухь, кIирисса бургъилу цивппа ччукъаччин кепкарду тIайла бувксса Пайзуллагь АхIмадовлухь. ОьрчIан байран хъиннура тяхъа дан, Новостройрай культуралул масъаларттаха зузисса ХIабибат Буттаевал шиккун оьвкуну бия Ссихьрал театрданул артистурайн, оьрчIан ва хъуниминнан ххира хьусса цIадурксса балайчитал Кристинайн, Марина Аьлиевайн, Ямлихан ХIажиевлуйн. ОьрчIал, миннащал бавцIуну, дакIний личIансса суратругу рирщунни. Ва кьини Новостройрал оьрчIан унгу-унгусса байран хьунни.