Июнь зурул 13-нний «Дагестан» РИА-лул конференц-залдануву республикалул Жагьилтурал иширтталсса буллалисса комитетрал отделданул хъунмур Ирина Дружининал республикалул журналистурахь бувсунни оьрчIру гъинтнил лагерьдай бигьалагаврил даву цукунсса даражалий най дуссарив.

П. Рамазанова
— Аьмну 60 азара оьрчI игьалагантIиссар лагерьдай, миннавату дяхттасса лагерьдай бигьалагантIиссар 30 азаллий 298 оьрчI, шагьрулул кьатIувсса лагерьдай – 25 азаллий 490 оьрчI, республикалул кьатIувсса санаториярдайн тIайла уккантIиссар 2500 оьрчI, — увкунни мунил. – Жагьилтурал комитетрайхчIин лагерьдай бигьалагантIиссар кIай ялув кIицI лавгминнава 17 азаллий 400 оьрчI, захIматрал ва социал развитиялул министерствалийхчIин – 8 азара оьрчI ва Дагъусттаннал кIулшивуртту дулаврил ва элмулул министерствалийхчIин 278 ятинсса оьрчI.
Ирина Дружининал бувсунни лагерьданийнсса путевка тIалав дуллалисса аьрза чичин аьркиншиву, Жагьилтурал иширтталсса буллалисса комитетрайн ягу муниципал образованиялул министерствалийн.
Гьашину путевкардал багьригу гьаз хьуну бур, ларгсса шинал путевка диркIун дур 7 азарлий 520 къурушран, гьашину тIурчарив – 11 азаллий 500 къурушран.
Комитетрал оьрчIру бигьалагаврил хIакъиравусса кьутIи чирчуну дур 51 учреждениялущал, ми бур Буйнакскаллал, Гергебиллал, Гъуниннал ва цаймигу районнайсса лагерьду. Ми лагерьдал бигьалагаврил сезон дайдишинсса ихтияр ларсун дур Роспотребнадзорданул Управлениялия. Хьхьирил зуманицIухми лагерьдай бикIан тIий бур ххассал бувулт. Му бакъассагу, гьарцагу лагерьданий бусса бур полициянайн мугьлат бакъа оьвчайсса кнопка, дусса дур видеонаблюдениялул системардугу.
Лагерьдал цалчинмур смена дайдирхьуну дур, цIанакул микку бигьалаглай бусса бур зувиазаруннийн биявайсса оьрчIру.