Ларгсса нюжмардий МахIачкъалалив №1 шагьрулул азарханалул актовый залдануву хьунни «Актуальные вопросы ревматологии, гастороэнтерологии и гепатологии» тIисса Дагъусттаннал терапевтътал бавтIсса медициналул элмийсса конференция.

З. АьбдурахIманова
Конференциялул сакиншинначишиву дурсса ДР-лул ЦIуллу-сагъшиву дуруччаврил министерствалул ва ДР-лул МЗ-рал Дагъусттаннал медакадемиялул Дагъусттаннал терапевтътурал обществалул агьаммур мурад бур республикалул шагьрурдайсса ва районнайсса хIакинтал бавтIун, уттизаманнул медициналуву хъанахъимунищал кIул бан, лахьхьин бан. Конференциялул гьурттучитураща бювхъунни республикалий ва мунил кьатIув медициналуву цIа ларгсса профессортурал лекциярдах вичIи дишин, миннал опытращал кIул хьун, цанма аьркинсса суаллан жавабру баян.
Конференциялул даврия ва агьамми суаллая буслай, оргкомитетрал председатель, ДНМОТ-рал председатель, профессор Сулайман Маммаевлул журналистътурахь бувсунни республикалий уттинин цимивагу укунсса журалул конференцияртту бавтIшиву.
«ХIакьину жу батIарду ряххилчинсса элмулул ва практикалул конференция. Ттул пикрилий, укунсса журалул конференциярду батIлан ялу-ялун, шиная шинайн сававртту гьарза хъанай дур. Гьарза хъанай бур ревматологиялул, гастероэнтерологиялул ва гепатологиялул патологияртту дусса къашайшалт. Цумацагу хIакин, цанма кIулмуний къаавцIуну, ялу-ялун цалла кIулшивурттал хазна авадан буллан аьркинссар. Оьрмулухун кIулшивурттал хъирив агьну икIан аьркинссар учирчагума къааьйкьинссара. Жул иш бур укунсса батIавуртту сакин дуллан ва респуб­ликалул хIакин-терапевтътуран микку гьуртту хьунсса шартIру дузал дуллан. Дан дакIний буру чIярусса укунсса журалул давур­ттив», — бувсунни С. Маммаевлул.
Конференциялий гьурттушинна дан бувкIсса хъунисса хъамаллуравух бия И.М. Сеченовлул цIанийсса Цалчинмур МГМУ-лул терапиялул ва пишакарсса цIуцIавурттал кафедралул профе­ссор, д.м.н. АьбдурахIманов Ж.Т. ва вава Москавуллал ХIукуматрал медициналул университетрал профессор, д.м.н. Павлов Ч.С.