Ниттил мазрах гъира бутлай

Интту ардай тIутIаяр
ТIутIайх бичу, ниттил маз!
Зунттай зяй щаращаяр
Зяй-зяй тIутIу, ниттил маз!

М. МахIаммадов
surat_12

Уттигъанну МахIач­къалаллал 22-мур лицейраву хьунни, ва лицейраву аьдат­равун дагьсса, шинай цал дайсса, ниттил маз ябаврин хас дурсса байран.
Дияхха ца тIааьнсса, даркьусса, интту бургъил гъили ва чанна дурсса кьини. Дуклаки оьрчIал байран хъун дан, миннан ссупра тIитIин лакку дук­рардащал бувкIун бия цаппара нину-ппугу. ТIайлассар, чIявуми буттал, ниттил нинухъру бия. ОьрчIал цалвами жагьилсса ни­ттихъал, цанма лакку маз щалва итххявххун къакIулну тIий, гьан бувхьунссия цаярва хъуними.
— Хъунмасса барчаллагь гьар шинах ва байрандалувух гьур­ттушинна дайсса дадахъан ва ттаттахъан. Масала, Шавлукьова Гуля цуппа ялапар хъанай бур Каспийскалий, амма гьарица ниттил мазран хас дурсса давривух, бувкIун Каспийскалия, чIун дакъар къаувкуну, хIала буххай. Цил оьрмулий барачат бишиннав.
ЧIявусса бур ттул лакку мазрал дарсирдайн бучIайсса оьрчIаву нину-ппу личIи-личIисса миллатирттаяссагу: нину – оьрус, ппу – лаккучу, нину – къумукь, ппу – лаккучу, нину – лакку, ппу — яручу. Мукунми оьрчIру лагайссар Да­гъусттаннал мазурдил дарсирайн, оьрус мазрай дишайсса. Амма миннал нитти-буттал язи дургьухьунссар лакку мазрал дарсру, ца бунугу лакку махъ лахьхьича тIий. Нагу, тIайлассар, ххишала бакъа рязину кьамул бара жулвамур мазрал дарсирдайн. Хъунна хьувча лакку мазралмур ккуран!
Бур дадахъул оьрчIал цамур миллатрал душ бувцуну, дянив хьусса оьрчIан лакку маз лахьхьин бан хIарачат буллалиссагу. Мукунминнавух бур ХьурукIратусса Къутиева Светлана. Ванил оьрчIал оьрчIал АхIмадлул нину оьрусри, амма, циняв лакку чIурдугу кIанийн багьан бувну, гъалгъа тIун икIай лакку мазрай. Светланал шаппа, цув бувчIингу, къабувчIингу, оьрчIащал лакку мазрай гъалгъа тIун бикIара тIар ва гъинттул каникуллай шяравун ХьурукIрав буцара тIар, — буслай бур лакку мазрал учительница Аьжа Аьбдулгъапурова.
Мукунма ппу ШавкIратусса Далидал нину оьрус миллатрал бур, цуппагу, лакку мазгу лав­хьхьуну, оьрчIащал лакку мазрай гъалгъа тIий бур.
5-мур классраву дуклаки­сса Русланал нину тIурча къумукьри, ппу – лаккучури, амма ниттил Руслана лакку мазрал дарсирайн гьан бай. КIункIу ба, аслийсса лакку маз, вилва кюр­ттаравун ранг-рангсса миллатрал оьрчIру, тIутIайх бичуча, авадан хьувча лакку маз.
Байран дайдирхьуна цинявн­нал, бивзун, нитти-буттащал жулла гимн учаврийну. Хъирив ниттил мазран хас дурсса жулва шаэртурал назмурду дурккунни оьрчIал. Шаэртурал му­къурттийну дакIнийн бивчунни тарихравун багьсса Аьрчча Тимурдул аьрал махIаттал бувсса зунттал душ ПартIу ПатIима, ТтурчIайнна зунттуй щалва Дагъусттан канихьхьун ласунсса Надир-шагьнал умуд бивчIан бувсса Муртазааьли.

Муртазааьлил мазри,
Чаннаннияр кьянкьасса,
ПартIу ПатIимал махъри
ЦIараяргу кIирисса.

Хъахъи ларгсса тарихрал лу­ттирал чIапIая оьрчIал дакIнийн дирчунни Хъун дяъвилий виричушиврул цIарду ларсъсса, лакку ниттил накI хIалал дурсса арсваврал цIарду, бувккунни чIивисса лакрал миллат щалвагу ил-аьламрайх машгьур бувсса Муса Маннаровлухасса М. Щурпаевал шеъри.
Байрандалийн бувкIсса оьрчIал нитти-буттал чулуха барчаллагь тIисса ихтилатру бунни Бархъаратусса Хизриев ХIамидлул ва ЧIятусса Мамедова ПатIиматлул.
Ххишала дакъа дакIний личIанну тIайла дурккунни оьрчIал ва бувкIсса хъамаллурал ва байран. Дуклаки оьрчIал ччарча балайрду увкунни, ччарча назмурду дурккунни. Ахирданийгу авурну лезгинкалий бивзунни.
А. Аьбдуллаева