Гьашину Лакрал райондалий школа къуртал буллай ур 212 дуклаки оьрчI.
Гъумучиял школа къуртал буллай бур 72 дуклаки оьрчI ва душ.
Гъумучиял лицей къуртал буллай бур 31 дуклаки оьрчI ва душ. Вайннава кIия ур мусил медальданийн кIункIу тIутIисса.
Гъумук
Гьарцагу шинал Лакрал райондалул администрациялул зузалт лагай райондалул школарттайн Махъра-махъсса занглил байрандалийн, школа къуртал буллалими барча бан, миннахь ххуллухъин учин.
Гьарца школалул дур шиннардий цIакь хьусса ва байрандалун хасъсса хъин-хъинсса аьдатру. Гъумучиял школалий, гьарца шинал кунма, ва кьинигу школа къуртал буллалими чут-чутну бувккуна хIаятравун. Яла къавтIун бивзуна школалул вальсрай. Муния махъ бавцIуна линейкалий. Гихунмай шеърирдайну, балайрдайну барчаллагь тIий бия учительтурахь ва школалухь. ХIисав къархьуну къаличIлай дия миннал симаннайсса ххаришивугу, хъювусулшивугу.
Шадлугъ тIигу-тIиртIуну, дачин дурну бия школалул завуч Зухра Аьлиева. Школалул 74-мур выпускрал оьрчIру барча буллай, директор Жяъпар Кканккаевлул бувсуна гьашину школа къуртал буллалиминнал дуккавриву ва спортраву дурсса хьхьичIуннайшивурттая.
Цалва итталу хъуни хьусса оьрчIахь ххуллухъин тIисса ихтилатру бувуна миннаву цалла дакI дирхьуну зий бивкIсса цалчинсса учительница ХIабибат Буттаевал ва ПатIимат Аьлиевал, классирттай каялувшиву дуллалисса Жавгьарат Алхасовал ва Минажат Муслимовал.
Оьрмулул кIи-шанбачIулул ххуллийн буклакисса школа къуртал буллалими барча бан, ва оьлувкъусса заманалий щаращисса дунияллий, вилаххав душмантал чIяву хъанахъисса республикалий цалвамур ххуллу лагу-лявкъуну му ххуллу бигу-битан бигьану къабикIантIишивугу кIицI лаглай, гьарца бивзсса шаттираву миннан тIайлабацIу чIа тIутIисса ихтилатру бувуна «Лакрал район» МР-данул бакIчи Юсуп МахIаммадовлул, КIулшиву дулаврил управлениялул управлениялул каялувчи Явсупи ХIамзаевлул, Гъумучиял шяраваллил администрациялул бакIчи Апанни Макьаевлул. Нитти-буттахъал цIания школа къуртал буллалиминнан тIайлабацIу чIа увкуна АьбдурахIимов Мурадлул.
Хъуними уссу-ссурваврахь чаннасса кьини барчагу дан, гихунмайсса оьрмугу га кьини кунма чаннану ва ххарину гьаннав учин бувкIун бия цалчинмур класс къуртал буллалими. Гайнналгу мюрщими уссу-ссурвавран, ацIра шинава цайрагу гара кьини дацIантIишиврий чIурчIав дуллай, хъамакъабитулунсса бахшишру дуллуна.
Ахирданий рирщуна Махъра-махъсса занг. Гихунмаймур бутIа бия куннал гьухърай кув тIайлабацIулул махъру чичлачисса.
Гъумучиял лицейравугу дур цилла аьдатру. Лицей къуртал буллалими чут-чутну бувккун бацIай, лицейрал хIаятравусса, дяъвилия зана къавхьуминнал аьпалун дацIан дурсса гьайкалданучIа. Школалухь барчаллагь тIутIисса цала хъуними уссурссуннал байран лахъа-хъун дан линейкалий бацIай арулчинмур классрал дуклаки оьрчIругу. Лицейрал директор МахIаммад Хъунбуттаевлул школа къуртал буллалиминнахь ххуллухъин увкуну махъ, выпускниктурал учай лицейрал гимн. Ххуллухъиндарал махъру миннахь ялагу увкуна «Лакрал район» МР-данул бакIчи Юсуп МахIаммадовлул, КIулшиву дулаврил управлениялул каялувчи Явсупи ХIамзаевлул, Гъумучиял администрациялул бакIчи Апанни Макьаевлул, цалчинсса учительницахъал: ХIабибат Буттаевал ва Шуаьнат Аьбдуллаевал, классрай каялувшиву дуллалисса Рая Куяевал. Дуклаки оьрчIал нитти-буттахъал цIания ихтилат бувуна Рукьижат Оьмаровал ва Рамазан МахIаммадовлул.
Лицей къуртал буллалими балайрдайну барчаллагь тIий бия учительтурахьгу, директортурахьгу, интернатрал зузалтрахьгу.
Гъумучиял школалийгу, лицейравугу Махъра-махъсса занглил байран чIюлу дуруна Гъумучиял оьрчIал магьирлугърал школалул къавтIалтрал.
Шадлугърал дязаннив ялун ивуна Гъумук цIуну дуллалисса РОВД-лул къатрал ялтту уккан увкIсса ДР-лул виваллил иширттал министр Аьбдурашид МахIаммадовгу. Ванал школа къуртал буллалими барчагу бувну, тIайлабацIу чIа увкуна ЕГЭ-рдайгу, гихуннайсса дуккавривугу, оьрмулувугу.
Зулайхат Тахакьаева
ДучIив
Гьарцагу инсаннал оьрмулуву цал дайсса шадлугъ дур Махъра-махъмур занглил байран. Вай махъсса шиннардий Махъра-махъсса занглил байрандалийн жу Новостройрайн лагару. Га лакрал миллатрал цIуну мина дихьлахьисса кIану хъанай буну тIий, школардал выпусниктал итабакьлай, мюрщулт цалчинми классирттавун занай, хIалли-хIаллих тIиссакссагу гийх оьрму нирхиравун багьлай буну тIий.
Лавгру жу гьашинугу ДучIинналмур школалийн. Му школалул учительтурал коллектив мудангу дакIнийхтуну ххари шай миллатрал кказитрал журналистал цачIанма бучIаврия. Жухва ялугьлай бунийн дакIгу дачайхха. Ва ялагу. ДакIру ххари шай шикку дарсирдал итххявхсса, кIулшивуртту дусса гьунар бусса оьрчIру ккавккукун. Ва школалий ляличIисса къулагъас дур классрал кьатIувсса даврих. Шикку зий дур оьрчIал гьунарду ялун личин буллалисса, личIи-личIисса кружокру, секциярду.
ДучIиннал школа зий бур 2000 шиная шинмай, зий ур аьмну 32 учитель. Миннавух тамансса бур лаваймур категориялул учительтал, личIи-личIисса хIурматрал лишаннан лайкь хьусса педагогтал.
2010 шинал дурну дур цIусса, кIира зивулийсса, ххуйсса къатри школданун. Школалий каялувшиву дуллай бур лавайсса категориялул учитель, АьФ-лул аьмсса кIулшиву дулаврил бусравсса зузала Къиталаева Шамсият.
КIюрххи-кIюрххила, марххалттанул рангирай пар-пар тIутIисса кIяла гьухъраву, школа къуртал бувминнахь ххуллухъин учин бавтIун бия мюрщими классирттал оьрчIру, нитти-буттахъул, учительтал. Выпускниктал барча бан бувкIун бия мукунма ЦIуссалакрал райондалул администрациялул бакIчинал хъиривчу Аьли Исрапилов, ДучIиннал шяраваллил администрациялул хъунама АбутIалиб Аминов ва цаймигу бусравсса хъамал. Гьар шинал кунма, дуккавриву хьхьичIунсса ва школ оьрмулул иширттавух чялишну хIала бувхсса выпускниктуран ва 9-мур классрал оьрчIан дуллуна ХIурматрал грамотарду. Выпускниктурахь ххуллухъин тIутIисса маслихIатрайсса ихтилатру къуртал хьуну махъ, школалул коллективрахь барчаллагь тIутIисса ихтилатру бувна выпускниктурал ва миннал нитти-буттахъал.
Юсупова Аьйшат, выпускница:
— На цалчинмур классрава байбивхьуну ва школалий дуклай буссияв. Ца чулуха, ххарину бура нава школа къуртал буллай, ттула хьхьичI цIусса оьрмулул ххуллу тIитIлай. Ччай бур студентка хьун, гихуннай ттулла кIулшивуртту цIакь дуллан, пиша лахьхьин. Вамур чулухагу пашманшиву дур, вайксса шиннардий архIал щябикIлай-бизлай бивкIсса архIал дуклакиминная, жулва ххирасса учительтурая личIи хъанай. Учительтурал чулуха жун хъунмасса тIайлабацIу хьуссар, цалла даву хъинну кIулсса учительтал – минахуртал бур ва школалий. Миннайн цинявннайн барчаллагьрай буру. ЛичIинува барчаллагь учин ччива 5-мур классрава тихунмай жулва классрай каялувшиву дуллай бивкIсса ПатIимат Оьмаровнайн.
Раджабова Гулизар, выпускницал нину:
— Цинявппа нитти-буттахъал цIанияту на хъунмасса барчаллагь учин ччай бура школалул директор Шамсият ХIайдаровнайн, завуч МахIаммад Неъматуллаевичлуйн, цинявппагу учительтурайн.
Ххарину бура ттулва душнил ва школа ххуйсса кьиматирттай къуртал буллай. ОьрчIан кIулшивуртту дулавриву хъунмасса бияла учительтуралгу буссар, ванияр хьхьичIсса ттул кIивагу душнилгу школа ххуйсса кьиматирттай къуртал бунни. Жул школалий оьрчIан дуккаврих гъира бутлатисса учительтал зий бур, миннал даврил хIасиллугу ххуйсса хъанай дур.
Кьурбанова ПатIимат, классрал каялувчи, «Шинал учитель» конкурсрайгу, «Лакку мазрал яла ххуйма учитель» тIисса конкурсрайгу кIил-кIилва ххув хьумур, Дагъусттаннал халкьуннал просвещениялул отличник:
— Ва класс бувцуну най бивкIра 5-мур классрава шихунмай. Арулла шинай хъунмасса захIмат бишин багьунни вай куннал кув чIарав бацIайсса, бавкьусса коллектив сакин бан. ЦачIу бувкусса ччатIул оьрчIру куннащал кув дус байшиву кIулну, на ми оьрчIащал цимилвагу экскурсия бав. Лавгру жу Гъунив, Сулакь неххал зуманив, Гъумукун, хьхьичIмур ватандалийн ДучIив (Новолакрайн), цалла гийхмур шяравалу ккаккан дан. Му бакъассагу, кьурчIишиврийгу, ххаришиврийгу кунначIа кув бавцIуру.
На ттулва захIмат дузрайн бувккун, гьай-гьай, ххарину бура. Амма вайнная личIи хъанай дакIниву пашманшиву дур.
Ва щалва школалунгу бусравсса, хъуннасса хъар лахълай бивкIсса, олимпиадарттай, спортрал соревнованиярттай, КВН-ннай хьхьичIунсса кIанттурду бугьлай, школалул цIа гьаз дуллай бивкIсса классри. Классраву 14 оьрчI ур, миннавату арула оьрчIал ххуйну къуртал бунни школа. Оьрмулул ххуллу тIайлабацIусса хьуннав тIий, чIа тIий бура вайннан цIуллушиву, ссавур. Нитти-буттангу хъунмасса барчаллагь тарбиялул, дуккаврил давриву, гьарца иширттаву жула чIарав бацIлай бивкIун тIий.
* * *
Школалул дуклаки оьрчIру, нитти-буттахъул ва учительтурал коллектив хъунмасса барчаллагьрай бия Махъра-махъсса занглил байран лахъа-хъун дуван МахIачкъалалия Лакрал театрданул артистал бучIан бувсса Райондалул Мажлисрал депутат КъитIалаев ХIайдардуйн ва шяраваллил администрациялул хъунама АбутIалиб Аминовлуйн.
П. Рамазанова
А. Аьбдуллаева
Ккулув
ГюнгутIул чIунихун жува муданмагу кIулшивручIан шару ласлай аьдат хьуну буру. Ттюнгъасса щютIуххул чIуниха лахьлахьисса макьандалул муксса гуж бурхха, му чIу хъанан бикIай инсаннал оьрмулул гьанулучIансса ххуллул дайдихьунугу. Аьдатравун дурххун дур школа къуртал буллалисса оьрчIру экзаменнайн итабакьлакьисса 25-мур майрал кьини ми цIусса оьрмулувун бухлахисса кьинилул байрандалун хIисав хъанай душивугу.
Ва кьини ттунгу бахтти хьуна Ккуллал райондалийсса Ккуллал шяраваллил кIилчинмур школалул оьрчIру цIусса оьрмулувун итабакьлакьисса байрандалух ябитан.
Байран дайдишиннин на ва школалия цIувххуссия школалул директор Мурачуев Аьбдул МахIаммадовичлухь. Ванал бувсуна ттухь укунсса затру:
— На директорну зузисса школалул тарихрал чIапIив дур укунсса. 1974-ку шинал Ккуллал шяраву тIивтIуссар кIилчинмур, мяйва классрал кIулшиву дулайсса, школа. Хъирив, 1981-ку шинал ва школалия бувссар дянивмур даражалул школа. 2008-ку шинал жул школа бизан бувссар ва цIуну дурсса школалул къатравун. Жул школалун, 1998-ку шинал, ЦIуссалакрал райондалий ватандалухлу жан кьурван дурсса жула выпускник Даххаев ХIамзат Рамазановичлул цIа дирзссар. Шиккура, школалул хIаятраву дуссар жул школалул выпускник, аьпа биву, Аьрасатнал Виричу Мурачуев Халид Рашидовичлун дирхьусса гьайкалгу. ЦIана школалий дуклай бур 270 оьрчI. Миннавату гьашину 11 класс къуртал буллай бур 38-ннал, гьарца кьини школалийн занай бивкIсса 19 экстерна дуклай бивкIсса оьрчIалгу. Школалий дарсру дихьлай ур 37 учитель. Ккуллал райондалийсса дянивмур даражалул школарду къуртал буллалиний дулайсса ЕГЭ-рдугу цинявннал жул школалий дулайссар. Мунин сававнугу хъанай бур жул школа цIуну бувсса, уттизаманнул тIалавшиннарду, шартIру дурурччусса школа бушаврийн бувну. Гайми затру винмагу ххал хьунссар школалул хIаятраву байран дайдишайхту…
Буниялагу ххуй-ххуйсса лаххиярттаву, тIутIал кацIурдищалсса выпускниктурал дакъагу, вайннал нитти-буттахъалгу, тамашалий бувкIминналгу хIаят дурцIуну дия. Ссят 10-нний дайдирхьуна байран. Школалул тарихрая, школалий дуклай бивкIсса оьрчIал дурсса виричушивурттая, пагьму-гьунардаяту кутIасса ихтилат бувуна школалул директор Мурачуев Аьбдуллул. Райондалул чулуха оьрчIру барча буван увкIун ия Ккуллал райондалул хъунаманал 1-ма хъиривчу Амучиев Кьурбан. Ккуллал шяраваллил администрациялул чулуха барча буваву дуруна АьбдурахIимова Сабринал. ОьрчIал нитти-буттал чулухасса тIайлабацIу чIа увкуна Исакьова ПатIиматлул. Гьай-гьай, га кьини хъуниминнал оьрмулул ххуттардийх ша ласласисса оьрчIал цалчинсса учительница Мурачуева Зинаидал цилла ххаришиву цинявннащал кIидарчIуна. ЧIявусса барчаллагьру увкуна такну цинявппагу выпусниктурал цалва учительтурахь. Га кьини лирика ва физика цаннийн ца хъямала дагьлагьисса ххаллилсса кьини дия. ГюнгутIи бивщуну махъ оьрчIал, нитти-буттахъал бувуна ссувхIат, увкуна ххуй-ххуйсса балайрду. Чара бакъа кIицI дуван ччива щалла байран нанисса мутталий синтизаторданух щяивкIсса макьанну руцу Аьлибеков Кьурбаннул цIагу. Хъамакъабитулун, оьрчIру, бугьарами цаннащал ца, аьмну суратру ришлай, хъямала багьлай, ххарину бия. ЩинчIав га байрандалия арх уцан къаччай, ахттая махъгу тяхъашивуртту дуллай, мадарасса ссятру дуруна.
ТIайлабацIу буваннав зун, жагьилтал!
ХIажимурад ХIусайнов
