ЦIуссалакрал райондалул Культуралул центрданий хьунни, «Балайрдавур халкьуннал дакI» тIисса цIанилу, халкьуннал балайрдан хас бувсса мажлис. Миккун оьвкуну бия ччянива халкьуннал балайрду тIий агьалинан ххира хьусса машгьурсса балайчитурайн.
ПатIимат Рамазанова
Андриана Аьбдуллаева
Мажлис бачин бувну бия Дагъусттаннал лайкь хьусса артистка Таибат Каллаева. Мунил халкьуннал балайрду ххираминнахь бувсунни лакрал агьалинал балайрду мудангу хьхьичIунну бивкIсса балайчитурая Минажат Шахмиловая, Саидат ЯхIияевая, Багъдада Оьмаровая ва Издаг Аьбдуллаевая. Ми личIи-личIисса пишардай зий бивкIсса хъами бур, буттахъал балайрдал кьиматрив цинявннучIава лахъсса бур.
Мажлисрайн оьвкуну бия ЦIуссалакрал школалул ниттил мазрал учительтурайн ва дуклаки оьрчIайнгу.
Халкьуннал тарих ва аьдатру лахьхьавривугу, яшавривугу халкьуннал фольклорданул, халкьуннал балайлул цукун агьамсса кIану бугьлагьиссарив бувсунни цалва ихтилатраву Культуралул центрданий каялувшиву дуллалисса Дагъусттаннал лайкь хьусса артист Ярагъи Аьлиевлул.
Халкьуннал колорит асар хьуншиврул, хьхьичIара ичIура ишла дайсса кьай-кьуйлул, ичIаллил тIахIни-кIичIулул мурцIугума хIадур бувну бия мажлисрал сиптачитурал.
Уку-укунсса мероприятиярдал ялун нанисса никиран мюнпат бушиврия бия социал зузала ПатIимат Кьубалаевал ва ЦIуссалакрал №1-мур школалул учительница Миясат Апанниевал ихтилатру.
Халкьуннал балайрду увкуна Дагъусттаннал лайкь хьусса артисткахъал Фируза Рамазановал ва Таибат Каллаевал. Оьрмулул шиннардих къабурувгун, Халкьуннал балайрду увкунни хIакьинусса никирачIан буттахъал балайрду ябувсса бусравсса хъамаллуралгу. «Жу чIун-чIумуй дувару халкьуннал балайрдан хас дурсса мероприятиярду, концертру. Микку мурадгу буттахъал заманнай учайсса балайрдал сий яларай хьун къаритавур, цалва ниттил мазрай балай къаучайсса миллат – му бивкIусса миллатри хIазран къаучайссар, Халкьуннал балайрдах мудангу хъуннасса къулагъас дикIантIиссар жучIа, — тIий бур райондалул Культуралул управлениялий каялувшиву дуллалисса ПатIимат Кьурбанова.
