Спортрахагу зун бивкIунни

Май зуруй Новостройрай­сса ЦIуссалакрал шяраву цIуну буллалисса школалул чIарав кIива спортивный площадка бувансса давурттив дайдирхьунни. Ми давурттив ккалли дуллай бур Новостройрай бантIисса спортрал объектирдал хъиндайдихьуну. Буллай байбивхьунни футболданий ва волейболданий буклансса площадкарду.
ЦIуссалакрал райадминистрациялул бакIчи ХIажи Айдиевлул бувсунни кIивагу площадка июнь зурул ахирданийннин бувну къуртал буван дакIний бушиву, гихунмай лечлан гъира буминнансса дорожка, баскетболданий ва теннисрай буккайсса площадкарттугу буллан дакIний бушиву. Бувсуна кIицI лавгсса спортрал комплекс Да­гъусттаннал президентнал къуллугъ чIумуйну биттур буллалисса Рамазан АьбдуллатIиповлул ЦIуссалакрал агьалинансса бахшиш хъанахъишиву ва щаллагу райондалул цIанияту Рамазан ХIажимурадовичлуйн барчаллагьрай ушиву.
«ЦIуну сакин буллалисса ва комплекс райондалул агьалинан ххаллилсса бахшиш хьунтIиссар, ва комплексрал хIадур буллантIиссар республикалул ва федерал лагрулийсса спортрал бяст-ччаллил тIуркIурдаву хьхьичIунсса кIанттурду бугьлантIисса спортсментал.
Дуклаки оьрчIру бакъагу, комплексравун занантIиссар райондалул агьалигу: цIуллу-сагъшиврун мюнпатну чIун гьан дуван ччими, спортрахун машхулми, — увкунни ХIажи Шихамировичлул. – Жул мудангу хъуннасса къулагъас ду­ссия райондалул дуклаки оьрчIру, жагьилтал спортрахун машхул баврих, му даву Новостройрайгу цIакь дуллантIиссару».
Новостройрай спортрал комплексраха зий дур 2008 шиная шиннай спортрал объектру буллалисса даврил мухIлу-хIингу хъинну кIулсса, опытгу бусса компания «Академия спорта». Му компаниялул вакил Аьлиаги Мамедовлул бувсунни спортрал площадкарду ттизаманнул технологиярттайн бувну бувантIишиву ва цалла давриву ишла дувайшиву анжагъ ххуйсса качествалул материаллу.
Муналгу чIурчIаву дунни футболданий ва волейболданий буклансса площадкартту ца зурул дянив бувну къуртал бувансса ниятрай зий бушиву.

Добавить комментарий