Вай гьантрай Журналистътурал союзрай хьунни ДР-лул физкультуралул ва спортрал министр МахIаммад МахIаммадовлул пресс-конференция. Га бачин бувну ия ДР-лул Журналистътурал союзрал председатель Аьли Камалов.
Най буна буллан бивкIуна суаллу.
- — ЛачIун буккаву олимпиадалул программалува дукьан дуллалиссар тIисса зат цуксса мяйжанссар, вил пикрилий?
— Ттул пикрилий, му хьун къабюхъайсса зат бур. Му иш щалва бия ФИЛА-лул председатель Мартинеттин оьвансса, ганайн къаршисса, МОК-рал каялувчинал Мартинеттищалсса ара лирну диркIун тIий. ЦIана лачIун буккаврил федерациялул хъунама цама ивтун ур. Мунияту, ттул пикрилий, сентябрьданий МОК-рал исполкомрай лачIун буккаврил кьадарданул хIакъираву хъинчулийсса хIукму хьунссар.
- — «Труд» стадион та щаллу хьунтIиссар?
— Тиккун арцу итадакьлай бур республикалул бюджетравагу, Аьрасатнал Спортрал министерствалулгу. Ттинин итадаркьуну диркIсса 50 млн. къуруширттал подрядчиктурал счетирдайн лахъан дурссар. Гьашину федерал бюджетравату итадакьинтIиссар 140 млн. къуруширттал. Ккаккан дурсса арцурду цила чIумал дичирча, га объект къуртал банну гьашину сентябрьданий.
Проектрай ккаккан бувну бур стадиондалуцIун 5 спортзал бан: илкинну лачIун буккаврилсса, грекнал-румуллал зумуну лачIун буккаврилсса, дзюдоралсса ва цаймигу. Стадиондалий тIурча зунтIиссар куклумур атлетикалул секциярду.
- — Ялун нанисса чIумуву хьунтIисса Ккавкказуллал тIуркIурдаву жулла командалул цимилчинмур кIану бугьанссар, вил пикрилий?
— Жува хьхьичIунмур кIану бугьаншиврий ттул щак бакъар, цанчирча жунма кIулли дагъусттанлувтуран спорт ххирашивугу, муданма ххувшавурттайн кIункIу тIутIавугу, спортрахсса гъирагу. Шиккува бусан, бюхъайссар Ккавкказуллал тIуркIурду Дагъусттаннай хьун.
- — Олимпиадалул цIарал эстафеталул маршрут Дагъусттаннайх наниссар тIисса хавар тIайлассарив?
— ТIайлассар, амма га цIу ларсун бачинсса ххуллу цуппа кьюлтI буллалиссар, мюхчаншиву щаллу даврил цIаний. Га иширавух гьуртту хьун ччиминнаща бюхъантIиссар заявкарду чичин.
Уттигу хьхьичI щаллусса шин дур, амма цIана му масъалалуха зий бур. МахIачкъалалив Эстафета хьунсса кьини къазузи кьинину баян бантIиссар, га кьини шадлугъругу хьунтIиссар.
- — Бюхъайссарив Дагъусттаннай спортрал кIинтнилми журарду байбишин, масалдаран хоккей?
— Дагъусттанлувтал спорт ххирасса инсанталли. Мунийн бувну, ттул пикрилий, жулва ватанлувтураща бюхъанссия машхул хъанан лачIун буккаврияр, боксраяр, футболдануяр, дзюдораяр ххишала кIинтнилми журардахунгу, учиннуча, хоккейрахун. Му захIматсса масъала бакъархха, аьркинссар так кIинтнил журардал спортрал федерация тIитIин, аьркинсса шартIру дузал дан, миннунсса арцу личIи дан. Ми цIана жучIара, цуксса хIайпнугу, дакъари.
— Жулла республикалий волейболданий буккаву хьхьичIуннай дан бюхъантIиссарив?
Му суалданухьхьун жаваб дулун анавар увккунни Аьли Камалов.
— ДакIнийри, 1990 шиннардий республикалий волейболданул федерациялул каялувчи на ивкIссара. Яла хьуна Рамазан АьбдуллатIипов, федерациялул бакIчину га зий ивкIсса чIумалгу волейболданул ишру хъинну бавчуна. Яла цайми инсантал бувкIсса чIумал волейболданухсса къулагъас чан хьуна, волейболданий чан-чанну тIий къабуклан бивкIуна.
— Зунттаву волейбол муданма ххирану бикIайва, буклайгу бикIайва – ххи бунни министрнал. – На нава жагьилний хъинну уккайссияв волейболданий, республикалул турнирдай ххув шайссияв.
Шиккува бусан, Рамазан ХIажимурадовичлун волейбол цIанагу ххирар. Ттун га ккавккунни ттуплий уклай, 5-6 партиялий лув-ялув уккайссар.
Журналистътурал спортрал министрнахьхьун цаймигу суаллу буллунни, хIатта спортрая архссагу. Ми цинявннухьхьун МахIаммад МахIаммадовичлул гъирарай жавабру дуллунни.
