Апрельданул 6-нний ДР-лул Президентнал кIанайма Рамазан АьбдуллатIипов къуллугърал аьрххилий лавгунни Лаващиял райондалийн.
Ганащал архIал лавгунни ДР-лул Президентнал ва ХIукуматрал Администрациялул каялувчи Шагьаьппас Шагьов, ДР-лул ХIукуматрал Председательнал хъиривчу Абусупиян Хархаров, ДР-лул финансирттал министр Аьбдуссамад ХIамидов, ДР-лул ФМС-рал Управлениялул хъунама Ражаб АьбдуллатIипов ва цаймигу.
Чуни тIисса шяраву Дагъусттаннал бакIчи гьуртту хьунни Хъурдуккаврил байрандалий. Цалчинсса хъарас щаву дайдирхьунни бусравсса хъамаличу Р. АьбдуллатIиповлул.
Шяраваллил жяматрахь аьла-ссалам буллай ДР-лул Президентнал кIанайманал увкунни: «Аллагьутааьланал кумаг байссар зузиманан, хъинсса даву дан ччиманан. Лаващиял жямат зий бур, мунияту миннан кумаггу булланну, цачIу зугу зунну».
Р. АьбдуллатIиповлул мукъурттийн бувну, жува циняв ца паччахIлугъраха зун аьркинссару. Дагъусттаннал иширайну чIярусса давуртту кьариртунни. ЧIявусса администрациярттал ва муниципалитетирттал каялувчитал 10-15 шиннардий зий бур цалва-цалва кIанттурдай, мюнпат бакъанма. ЧIявуми каялувчитал цIана хIадурну бур цIусса тIалавшинну биттур дуллан. «На ххарира миннал низам дихьлахьаврия, промышленностьрал, шяраваллил хозяйствалул пикри буллай байбишаврия. На дакI дарцIуну ура, Дагъусттаннай зун бюхъайсса команда дузал хъанай душиврий», — увкунни Р. АьбдуллатIиповлул.
Ганал шяраваллил школалун пишкаш бунни интерактивсса класс.
Яла Дагъусттаннал бакIчи лавгунни Лаващиял райондалул азархана ххал бан. ХIакьину азарханалувун 30 процентраял ххишаласса халкь занай бур. Бакъар шикку кардиологиялул отделениягу. Дагъусттаннал бакIчинал увкусса куццуй, поликлиникартту ххуйну зурча, азарханардай къашайшалт чансса бикIантIиссар. Лаващиял райондалул азархана шагьрулийминнуяр лувну зий бакъар.
Азарханалул чIарав буллай бур 20 инсаннансса реабилитациялул центр.
Азархана ххал бувну махъ Р. АьбдуллатIиповлул республикалул ХIукуматрайн тапшур бунни азархана бакьин бансса арцул чулуха кумаг бан.
Гара кьини Рамазан АьбдуллатIипов ва ганащал архIал бувкIми гьуртту хьунни райондалий дуллалисса волейболданул турнирданий. Турнир хас дурну дия ДР-лул Халкьуннал Мажлисрал депутатну ивкIсса Шамил Тайгибовлул цIа абад даврин.
