Миллатрал культура, литература ядавриву хъунмасса бутIа бихьлахьисса «Дараччи» ккурандалул чIун-чIумуй дувай миллатран хайр-мюнпатрансса давурттив. Мукунна ххуйсса даву дунни «Дараччилул» вай гьантрайгу – «Миллатирттал луттирду шяраваллал библиотекардан» тIисса цIанилусса акция.
П. Рамазанова
Расул ХIамзатовлул цIанийсса республикалул Миллатрал библиотекалущал архIал, Лакрал, Ккуллал ва ЦIуссалакрал районнал шяраваллил библиотекардан «Дараччилул» буллунни лакрал чичултрал ххюттуршлийсса луттирду: лакку мазрайссагу, оьрус мазрайссагу.
Лакку мазрайсса луттирдал кьимат гьаз буллалисса даврил сиптачи бур «Дараччи» клубрай каялувшиву дуллалисса, мудангу Дагъусттаннал бучIантIимуний дакIцIуцIаву душиву ххаллилсса давурттайну ккаккан буллалисса Мариян Илиясова.
Дагъусттаннал Миллатрал библиотекалул директор Таймыр Агъаевлущалсса хьунабакьаврий Мариян Илиясовал шяраваллил библиотекарттан пишкаш бувну бур лакрал чичултрал – Мирза Давыдовлул, Ссугъури Увайсовлул, Космина Исрапиловал ва профессор, публицист ХIусайн ХIусайновлул луттирду.
Ми циняв луттирду шаннагу райондалул культуралул управлениярдал хъуниминнахьхьун буллуну бур.
«ХIакьину, оьрчIру ва жагьилтал лакку мазрай гъалгъа тIунгу, ккалангу хьхьичIунмай къахъанахъисса ппурттуву, жува пасихIсса лакку мукъул кьадру-кьимат гьаз баврих ххишалану къулагъас дуллан аьркинссару. ПасихIсса лакку махъ – му чичултрал махъри, гьай-гьай. Луттирдал махъри. Лакрал буккултрачIа лакку маз биялну кIулну бикIаншиврул лакку луттирду бикIан аьркинссар, цумацагу буттал кIанугу, миллатгу ххирасса инсаннал цалва ниттил мазрай хъуннасса дакIцIуцIаву дикIан аьркинссар, уку-укунсса давурттив жу гихуннайгу дуллан дакIний буссару», — тIий бур Мариян Илиясова.
