Билаятрал Президентнал магьирлугърал советраву Дагъусттаннаясса вакил

fotso_16ДР-лул Культуралул министрнал хъиривчу, Халкьуннал творчествалул къатлул директор Марита МухIадова март зурул 25-нний гьуртту хьунни Москавлив магьирлугърал жагьилсса деятельтуран Аьрасатнал Президентнал премияртту дуллалисса шадлугърай, Аьрасатнал ПрезидентначIасса магьирлугърал советрал член хIисаврай.

Премияртту дуллай бия культуралул зузалтрал кьинилун хасну. В. Путиннул барча бувуна, так жагьилсса лауреатътал бакъа­ссагу, цинявппа культуралул зузалт. «ЧIявуми магьирлугърал зузалтран му, анжагъ, пиша бакъарча, аьрщарайсса цалва бюхттулсса буржри. Магьирлугърал зузалтрал ягу дурну, хьхьичIуннай дуллали­ссар мунил хъин-хъинми аьдатру, аьрасатнал авадансса культуралул рувхIанийсса гуж цIакь буллалиссар, жяматраву мяърипат тарбия дуллалиссар. Му даврий гьарцаннаща зун къабюхъайссар. Микку тIалавссар гьунар, кIулшивуртту, лагма хъанахъимур ляличIинува лаласун бюхъаву. Дмитрий Лихачевлул увкуну бур: «Культура миллатрал язисса хъусри,» — куну. Мяйжаннугу, жулва билаятрал бюхттулсса магьирлугърачIансса хIурмат жулва халкьуннал тарихрал аьпалия я буцан бан къашайсса, гихуннайсса творчествагу авадан дансса гьануну хъанахъисса бур», — увкуна Аьрасатнал Президентнал. Баян бувна литературалул ва искусствалул аралуву учредить дуршиву шанна цIусса премия (2, 5 млн. къуруш), оьрчIансса ва чIава жагьилтурансса яргсса произведениярттахлу.
Премияртту дуллуну махъ хьуна В. Путиннул Советрал члентуращалсса ихтилат. Муний гьуртту хьуна Аьрасатнал Федерациялул культуралул министр В. Мединский, Президентнал администрациялул ва пресс-службалул члентал ва цаймигу хъамал. Советрал члентуращалсса цалва гъалгъалуву Президентнал цIунилгу чIурчIав дуруна аьрасатнал халкьуннал этнокультуралул кьимат буруччин багьлай бушиву, мюрщисса шагьрурдай ва щархъаву культуралул идарарттан кабакьу буллан аьркиншиву.
Жул корр.